گەشتەكەی گۆڕان و یەكێتی بۆ بەغدا چ پەیامێكـ بوو بۆ پارتی.!؟


... پاش ئەوەی هەوڵەكانی بزوتنەوەی گۆڕان لە بەرامبەر پارتیدا لە بێ ئومێدیەوە ‌تا ئاستی شكست و كەوتن ڕووبەڕوو بوویەوە كە بەتەنها و لە ڕیگەی ئەو كارت و میكانیزمە مەدەنیانەی گرتیەبەر بۆ ملكەچكردن و هێنانە باری ئەو حزبە كە دەست بكاتە چاكسازی و سنورێكـ بۆ بەحزبی كردنی دامو دەزگاكانی حكومەت و پەرلەمان و بە هەدەردانی سامانی گشتی وڵات دابنرێت ، ئیدی وەكـ لە مێژەوە وتراوە – پێاو لە ناچاریدا سەر بە هەموو ماڵێكدا ئەكات - !

هەر بۆیە بزوتنەوەی گۆڕان بە سەرپەرشتی ڕێكخەری گشتی و بەیاوەری زۆرینەی هەڵسوڕاوانی گۆڕان گەڕایەوە لای یەكێتی و لە ماڵە فراوانەكەی تاڵەبانیدا لەنگەریان گرتەوەو پاش پشوویەكی پڕ لە یادەوری تاڵ و شیرین دواتر لە ژێر ناوی ڕێكەوتنی نوێ و پرۆژەو هەڵوێستی نوێ دەرەنجامی دیدارو كۆبوونەوەكانی دوو ساڵی ڕابووردوی دەباشانی نێوان ڕێكخەر و سكرتێر وەكـ ئەمری واقیع گەڵاڵە كرایەوە ، وەلێ‌ لە سات و كاتێكی گونجاو دیسان هەستیار بۆ هەردوولا واژۆی لەسەركراو خرایە بواری جێبەجێكردنەوە !

دیارە ئەم هەنگاوەی گۆڕان جگە لە خواست و دوا بژاردەی سەركردەو هەڵسوڕاوانی گۆڕان لەبەرانبەردا بەشێكی بەرچاو لە سەركردایەتی یەكێتی پێشوازی گەرمی لێكرا ، چونكە بۆ یەكێتی بوو بەهەل و دەرفەتێكـ هەتا لە ڕێگای ئەم ڕێكەوتنەوە زیاد لە ئامانجێكـ بەدەست بێنێ گرنگترینیان بەستنەوەو لە قاڵبدانی گۆڕان بوو لەلایەكـ ، هەڵوەشاندنەوەی ئەو ڕێكەوتن و لێكـ نزیكیەی نێوان گۆڕان و پارتی كە لە ڕابوورددودا ئەنجامدرا لەسەروبەندی پێكهێنانی حكومەت و چۆنیەتی دابەشكردنی پۆستەكانی حكومەت و پەرلەمانی كوردستان بە دەستكەوتەكانی بەغداو حكومەتی ناوەندیشە‌‌وە ئامانجێكی تری یەكێتی بوو !

لێرەوە سەرباری دەیان لێدوان و بەیاننامەو هەڵوێستی فەرمی گۆڕان و یەكێتی بۆ ئەوەی پارتی قایل بكەن كە ئەم ڕێكەوتنەی نێوان هەردوولا دژ بە هیچ كەس و لایەنێكـ نیە ، بەڵام هەر زوو پارتی هێنایە سەرخەت لە بەیاننامەیەكی تووند ئامێزدا ئەم پێشهاتەی نێوان گۆڕان و یەكێتی بە‌ هەڕەشەو مەترسی جیددی بۆ سەرتەواوی دەستكەوتەكانی حكومەتی هەرێم و لایەنە سیاسیەكان وەصفكرد ، هەروەها بەلای ئەوانەوە جەمسەرگیریەكی‌ لەم جۆرە درز دەخاتە نێوان پێكهاتە جێاوازەكانی كوردستان و ئاشتەوایی كۆمەڵایەتی و سیاسی دەخاتە دۆخێكی خراپتر ! بۆ ئەم مەبەستەو بۆ ڕەوینەوەی گومان و هێوركردنەوەی نیگەرانیەكانی پارتی بڕیاریاندا بە لیژنەیەكی هاوبەشی سەركردایەتی هەردوولا سەردانی پارتی و سەرجەم لایەنەكان بكەن هەتا لە نزیكەوە ناوەڕۆكـ و ئامانجی ڕێكەوتنەكە بخەنەڕوو ، بە بڵاوبوونەوەی ئەم هەواڵە دیسان پارتی قەڵس بوو كە بەم پێشنیارە ڕازی نابن ،هەروەكـ لە یەكەم كاردانەوەدا ڕەتیانكردەوە ئەوان وەكـ پارتی پێشوازی لە وەفدێكـ بكەن لە هەردوولا پێكهاتبێ ، بەڵكو دووپاتیان كردەوە پارتی بەتەنها و بە جێا ئامادەیە لە گەڵ وەفدی گۆڕان و یەكێتی كۆ‌ببێتەوە !

لەو رۆژەوە هەتا كۆتایی هەفتەی ڕابووردوو وەفدە هاوبەشەكە بە هێمنی و بە ئارامی هەر ڕۆژەو بۆ شوێن و بۆ لای لایەنێكی سیاسی سەردان و بەسەركردنەوەكانیان تەواوكرد ، بە بڕوای بەندە ئامانجی هەموو ئەو سەردان و دیدارانەی گۆڕان و یەكێتی‌ تەنها یاریكردن بوو بە كات هەتا وردە وردە بەلای ڕێكخستن و جەماوەری هەردوولا ئاسایی دەبێتەوەو ڕێكەوتنەكە بەڕووداوێكی زۆر سەیر و نامۆ تەماشای نەكرێت ، هەروەها بۆ ڕاهێنان و كاركردن بوو لەسەر عەقڵێەتی تووڕەی پارتی و گۆڕین و هەڵمژینەی كاردانەوەی سەركردایەتی و قاعیدەی گشتی ئەو حزبە‌ هەتا دەگاتە جۆرێكـ لە قەناعەت لەوێشەوە بۆ دۆزینەوەی دەرچەیەكـ كارلێكی ئیجابیانە بداتەوە بەڕووی ئەو واقیعە تازەیەی كە گۆڕان و یەكێتی خستەوە سەبەتەكەی جاران و ئاوێتەبوونەوەی ڕوخسارەكانی ڕابووردوو وەكـ خۆی ! ئەگەر نا لە هیچ یەكـ لەو سەردان و كۆبوونەوانەی كە لە گەڵ لایەنەكاندا بەڕێوەچوو گوێبیستی ئەوە نەبووین لایەنێكی تر بچێتە نێو هاوپەیمانەكەو لە دوو قۆڵییەوە ببێتەوە بە سێ یان چوار ..هتد ! چونكە ئەوە ڕوونە كۆبوونەوەو واژۆكردنی هەردوولا بەربوومی هەوڵ و خەباتی دووساڵی ڕابووردووی هەردوولا بووەو بۆ خۆشیان نەبێ هیچ لایەنێكـ نازانێت جگە لەوەی ڕاگەیەنراوەو بڵاوكراوەتەوە چیتر لە ژێرەوەی هەگبەكە خۆی حەشارداوە‌ ! وەكـ لە پێشدا باسمان كرد سەردانەكان بە پایان گەیشت وەلێ هەڵوێست و نیگەرانی پارتی وەكـ خۆی جێگیرەو‌ هێشتا ئامادە نیە دانی پێابنێت ، ئەمەش پشوو درێژی یەكێتی و گۆڕانی پچڕاند و بڕیاریاندا خەبات و جموجوڵی هەردوولا بگوازنەوە ناوەندو لە بەغدای پایتەختی عێراقەوە پشتیوانی و دۆستی نزیكـ بۆ ڕێكەوتن و پرۆژەكەیان بە دەست بێنن ، لێرەوە دەچمە سەر وەڵامی ئەو پرسیارەی كە لە ناونیشانی بابەتەكەدا هاتووە :
:
1- پەیامێكە بۆ پارتی كە گەمەكە كۆتایی هاتووەو پێویستە پارتی دان بەوەدا بنێت كە ڕێكەوتنی گۆڕان و یەكێتی حەقیقەتێكی تاڵەو ئەوان چیتر نایانەوێ دەستبەرداری یەكتر بن !
:
2- هەروەكـ پارتی سیاسەتی بێ منەتی بەخەرج ئەدا و لە لوتكەی غروری سیاسیەوە مامەڵە دەكات پێویستە بە حیساب و ژمارەكاندا بچێتەوەو سەر لەنوێ ڕێكی بخاتەوە ، چونكە لەمڕۆ بەدواوە ئەوە گۆڕان و یەكێتیە ئەتوانن لە ڕێگەی زۆرینەی دەنگـ و ڕەنگەوە پارسەنگی بڕیارەكان بن و هاوسەنگی بە هەڵوێست و مانا بە فرەیی و دەستەجەمعی بداتەوە !
:
3- گەیشتنی وەفدی هاوبەشی گۆڕان و یەكێتی بۆ بەغدا و بینینی‌ دەسەڵاتداران و بەسەركردنەوەی دۆستەكانی یەكێتی بەتایبەتی ( حزبی دعوە ) پەیامێكی تری ئەو دوو حزبە بوو بۆ پارتی ئەگەر چی سەركردایەتی پارتی پشت ئەستوورە بە توركیا و مامەڵەی بازرگانی و ئابوری گرنگـ لە نێوانیاندا هەیە ، ئەوان وەكـ گۆڕان و یەكێتی لە ڕێگەی دۆستەكانیان لە عێراق و ناوچەكە بەتایبەتی وڵاتی ئێران بێ منەتن بەرانبەر بەهەر ئابڵوقەیەكی ئابوری كە لە داهاتوودا پارتی وەكـ كارتێكی فشار ئەزموونی بكات !
:
4- خاڵیكردنەوەی ئەو بانگەوازەی پارتی كە بۆ ڕیفڕاندۆم و دواتریش دەوڵەتی كوردی ئەیكات ، گۆڕان و یەكێتی لە میانەی دیدار و سەردانەكانیان لە بەغدا خەڵكی كوردستان و لایەنە سیاسیەكانی دڵنیا كردەوە كە ئەوان لە گەڵ ڕیفراندۆم و مافی چارەی خۆنووسینن وەلێ لە ئێستادا كاتی نیەو دۆستەكانمان لە ناوخۆی عێراق و دەرەوەشدا هاوكار و دەستبار نابن ! هەروەكـ پەیامێكی تر بوو بۆ هاوپەیمانان و وڵاتانی ئیقلیمی كە ئەوەی دەگوزەرێ و بانگەشەی بۆ دەكرێت تەنها تەعبیرە لە ڕای پارتی و هەر ئەویش لێی بەرپرسە !
:
5- پەیامێكی تری ئەم وەفدە هاوبەشە مسۆگەركردنی بڕە بووجەی زۆنی سەوز و ئیدارەی جارانی سلێمانی بوو ، لە ئەگەری تووندكردنەوەی مەرجەكانی پارتی و بیركردنەوە لە دوو ئیدارەیی و گەڕانەوە بۆ كەرتكردنی حكومەتی هەرێم گۆڕان و یەكێتی ناچار نەبن ملكەچی داواكاریەكانی پارتی بن ! سەردانی پێشوتری پارێزگاری سلێمانی بۆ بەغدا و بینینی ( نوری مالیكی ) و دەسەڵاتدارانی حكومەتی ناوەند سەلمێنەری ئەم حەقیقەتەیە !