وڵاتی... پێویستە و دەبێ‌!!!

لەگەڵ گۆڕانكاریە خێراكانی دنیا و پێشكەوتنی تەكنەلۆژیا و تەشەنەكردنی كەناڵەكانی میدیا،لە ئێستادا سەدان تی ڤی و رادیۆ و رۆژنامە و سایتی كوردی بوونیان هەیە، راستی زیاتر لە 20 ساڵە نەك رۆژانە بەڵكو هەموو دەقیقەیەك هەزار جار گوێ‌ بیستی وشەی (پێوستە و دەبێ‌) دەبین. سیاسیەكان دەڵێن دەبێ‌ عەدالەت بەرپا بكرێ‌ و زوڵم و گەندەڵی بنەبڕ بكرێ‌، پێویستە لێپێچینەوە لە سەرپێچی كاران بكرێ‌ و تاوان باران بدرێن بە دادگا، شارەزایانی پەروەردە دەڵێن دەبێ‌ پۆلەكانی خوێندن ئاوا نەبێ‌ و پێویستە رێكبخرێن و قەرەباڵغ نەكرێن و، بینا و كافتریاو ناوەندەكانی خوێندن بەم شێوەیە نەبێ‌ و پێویستە ئاستی زانستی ئاوا و ئاوا بەرز بكرێتەوە، لەم لاوە مامۆستایانی ئاینی دەڵێن پێویستە تاكی موسڵمان راستگۆ و لەخوا ترس بێ‌ و نابێ‌ ببێتە داردەستی زاڵمان و دەبێ‌ ئیمانداران فێڵ و تەڵەكە لە كڕین و فرۆشتندا نەكەن. پسپۆرانی تەندروستی لەسەر شاشەی تیڤیەكان هەر دەڵێن پێوستە خۆراكی تەندروست بخوێن و چەوری و شیرینی كەمكەینەوە و نابێ‌ رێگا بە قەڵەوی و تەمبەڵی جەستەمان بدەین، هونەرمەندە رەسەنەكان دەڵێن نابێ‌ رێگا بدەین هونەر و گۆرانی كوردی بەم دەردە ببرێ‌ و پێویتسە رێگا بگیرێ‌ لەم لافاوە بەناو گۆرانی بێژەو دەبێ‌ پارێزگاری لە رەسەنایەتی ستایلی گۆرانی كوری بكرێ‌. رۆژنامەنوسان دەڵێن پێویستە دەزگا ئەمنیەكان رێز لە پیشەكەمان بگرن و دەسەڵات رێگری لە كاری رۆژنامەوانی نەكات و، فەزایەكی ئازاد بۆ رۆژنامەنوسان فەراهەم بێنێ‌، مامۆستایانی زانكو دەڵێن زانكۆكانمان تەنها خوێندەوار بەرهەم دێنن نەك تاكی ئەكادیمی و پرۆفیشناڵ، بۆیە پێویستە ئەم دۆخە چارەسەر بكرێ‌ و دەبێ‌ رێگا لە بەردەوام بوونی ئەم حاڵەتە بگیرێ‌ و پێویستەو...دەبێ‌ و ....دەبێ‌.
سەیر ئەوەیە لەشكرێكی لەبن نەهاتوو لە (پێوستەو دەبێ‌) لەم وڵاتەدا بوونی هەیە و، مەگەر تاك و تەرە ئەگەرنا كەس نیە یان كەس خۆی بە بەرپرس نازانێ‌ تەنها یەك (پێویستە و دەبێ) لەسەر ئەرزی واقیعدا بەرجەستە بكات، چونكە هەموومان بە حاكم و مەحكومەوە دەڵێن راستە فڵان شت پێوستە وابێ‌ و نابی وابێ‌، بەڵام خۆ مەرج نیە من بچمە ژێرباری ئەم وەزعەوە، با كەسێكی تر ئەمە بكات و خۆ فەرز نیە هەر من ئەوە بكەم.
ئاخر ئەو كاتە ماڵ وێرانی و دەردەسەری و قەیران و كێشەكان روو لە بێ‌ ئومێدی دەكەن، كاتێك هەموومان خۆمان لەبەرپرسیاریەتی دەدزینەوە و هەر یەكێكمان پێمان وابێ‌، كەسمان هیچ ئەركێكمان لەسەر شان نیە و هەموو بەرپرسیاریەتی و ئەركەكە بخەینە ئەستۆی غەیری خۆمان، بەتایبەت دەسەڵات و لایەنی پەیوەندیدار، كە بە پلەی یەكەم هەموو شتێكی گەورەو بچوكی وڵاتی دەكەوێتە ئەستۆ. ئیتر ئەگەر بمانەوێ‌ ئەم هەموو (پێویستە و دەبێ‌)یە، كاریگەریان هەبێ‌ و چیتر لە گوێچكەی راست نەبیسترێ‌ و لە چەپەوە دەرچێ‌،هەستكردن بە بەرپرسیاریەتی و داخستنی لای چەپی گوێچكەی دەسەڵات و لایەنی پەیوەندیدار و تاك بە تاكی خەڵكی پێویستە،ئەگەر نا تا قیامەت هەردەبێ‌ غەرقی نێو دەریای (پێویستە و دەبێ‌)بین كورد وتەنی ئاسنی سارد بكوتین وقەوانی كۆن لێدەنەوە.