وا بڕوا كوردستان بەرەو كوێ .!؟

... سەرباری ئەو هەموو ئاگاداریی و وریاییدانەی لایەنە سیاسیەكان بە خۆیان و لەوێشەوە بۆ خەڵكی‌ كوردستان كە ناوچەكە بە گشتی و عێراقی پاش داعش ڕوو لە گۆڕانكاری و پێشهاتی تازە دەكات ، پێدەچێت جارێكی تر و لەسەر نەزمی سایكس بیكۆیەكی تر بەڕیوەبێت ، تیایدا نەخشەی سیاسی و ئیداری وڵاتان جێاواز لە سەد ساڵی ڕابووردوو داڕێژرێتەوە كوردستانیش بەدەر نیە لەو شاڵاوەی بە خراپ و چاكیەوە ، وەلێ لە ئەگەری نزیكبوونەوەی هەڵكردنی ئەو باهۆزە و گەیشتنی بە كوردستان و لێرە لایەنە سیاسیەكان لە خەوی یەكتر سفركردن و كەڵكەڵەی پانخوازی دەسەڵات و نەبوونی بەدیلێكی گونجاو بۆ پرسە جێاوازەكان لە لایان موعارەزە و خۆدزینەوەی جەماعی و ڕاكردن لە بەرپرسێارێتی قۆناغەكە ، بێ گومان كاریگەری خراپ بەجێدێڵێ ڕەنگە تەواوی ڕیسەكەمان بكاتەوە بە خوری و گەڕانەوە بۆ چوار گۆشەی سەرەتا ، بە داخەوە تەواوی ئەم حەقیقیەتانە وەكـ ئەوەی هەیە لێی ئاگادارن چونكە بۆ خۆیان تیایدا شارەزاو پسپۆڕی نێودەوڵەتی و بڕوانامەی ئافەرینیان هەیە ! كەچی هێشتا ئەم لایەنانە ئامادە نین كەمترین سازش و نەرمی لە بەرامبەر یەكتردا بنوێنن و تەكانێكـ بەو دۆخە بدەن لانی كەم پاراستنی ئەوەی كە بە دەستهاتووە ! من لێرەوە هەوڵ ئەدەم پەنجە بخەمە سەر ئەو هۆكارانەی كە ڕێگرە لە بەردەم لێكـ نزیكبوونەوە و كۆتایی هێنان بەدۆخی چەقبەستووی ئەم وڵاتە :
:
1- بێ دوودڵی بەشێكی زۆر لە كێشەو گرفتەكان دەگەڕێتەوە بۆ چەندین ساڵ لەمەوپێشی ژیانی سیاسی و باری دەروونی خودی سەركردەكان ، ئەگەر چی تەمەنی هەر ‌یەكـ لەو سەركردانە لەسەروی شەستەكانەوەیە بەڵام ئەوان لە قۆناغی هەرزەیی سیاسیدا ئەژین و مامەڵ و پەیوەندییەكانیان بەخەرج ئەدەن‌ ، خەریكە بڵێم ڕێكـ لەو ماڵە قەرەباڵغە دەچێت كە زیاد لە مناڵێكی لاسار و بزێوی هەیە بە حوكمی نزیكی لە تەمەن و دوور لە پەروەردەیەكی تەندروست و ژینگەیەكی گونجاو بۆ پێگەیاندن و تێگەیاندنیان پێكەوە لە گەڵ گەورەتر بوونی گرفتەكان سەركردەكان گەورە بوون و ڕاهێنران ! ڕەنگە ڕاست بێ بڵێین خوویەكەو بەشیری گرتوویانە مەگەر مەرگـ لە بیریان بەرێتەوە !
:
2- سەرباری بیست و ئەوەندە ساڵە لە ئەزموونی حكومەت و دەوڵەتداری هێشتا داهات و بەشە بووجەو سەرچاوەكانی دارایی ئەم وڵاتە بە دەستی حزبەیەوە ، هەر یەكە و بەجێا خاوەنی دەیان كۆمپانیا و پشكی داهاتی ناوخۆیی و دەرەوەن ، بە نهێنی و بە ئاشكرا دەستیان بەسەر ژێرخان و قووتی خەڵكیدا گرتووە و لەسەر حیساب ئەم گەلە بەش مەینەتە خۆیان بونیادناوە ، هەر بۆیە هەتا پارەو دەسەڵات تەنها قۆرخی ئەم حزبانە‌ بێ ئەوا بەرامبەر بە یەكتر بێ منەت و هەروەكـ چاو لە خوارن نین !
:
3- بانگەشەو بانگەوازی بەردەوامی لایەنەكانی و ڕێكخراوەكانی كۆمەڵی مەدەنی چین و توێژە جێاوازەكانی تری كۆمەڵگا بۆ ئاشتكردنەوەو نزیكردنەوەی ئەم سێ حزبە ، یەكێكی ترە لەو هۆكارانەی كە ئەم لایەنانە ناهێنێتە ژێر بار ، بەبڕوای بەندە هەتا بانگەشەی ئەوانیتر زیاد بكات ئەم برادەرانە تووشی غروری سیاسی و خود پەرەستی گرێی دەروونی دەكات !
:
4- ئاسەواری دوو ئیدارەیی و جەمسەرگیری هەردوولا هێشتا وەكـ خۆی ماوەتەوە ، كوردستان دابەشبووە بەسەر دوو زۆنی زەرد و سەوزی ئاڵێنراو بەشپن ، لە ڕووی تاكـ لایەنی لە دەسەڵات و بوونی هێزی چەكـدار و ناوچەیەكی جوگرافی دیاریكراو هۆكارێكی ترە لەوەی ئەم حزبانە نێتی حەقیقیان نە‌بێت ڕوو لە ئاشتی و ئاشتەوایی نیشتمانی بكەن !
:
5- بوونی باڵ باڵین و ڕاو ڕای جێاواز لە نێو ئەندام و تاكەكانی حزبەكان بە جێا ، خاڵێكی جەوهەری و ڕێگریەكی حەقیقیە‌ لەبەردەم یەكـلا نەكردنەوەی بڕیاره و‌ ڕاسپاردەكان لەوێشەوە بۆ هەڵوێست گرتن و كۆدەنگی‌ بەرامبەر بە پێشهات و ڕووداوێكـ خزمەت بە نێوخۆی حزبەكە یاخود كۆی پرۆسەی سیاسی لە كوردستاندا بكات !
:
لە ئەگەری درێژبوونەوەی نا ئاشتی و مانەوە لە دۆخی چەقبەستوویی دوورە پەرێزێ ئەوا كوردستان دەگەیەنێتە ئەم ڕاستیانەی خوارەوە :
:
1- پرسی ڕیفراندۆم و دەوڵەتی كوردی ئەبێتە خەونی شاعیران و دۆزی ڕەوای گەلەكەمان دەگەڕێنێتەوە دواوە ئەوەش كە هەیە دەكەوێتە بەر هەڕەشەی جیددی .
:
2- پشتگیری نێودەوڵەتی و بەرگری هاوپەیمان لاوازدەكات ، لە ئەگەری هاتنە ئارای گۆڕانكاریەكان ئەوان چاوەڕیی كێبڕكێ و ناوو ناتۆرەی كەس ناكەن و دواجار بڕیاری خۆیان دەدەن !
:
3- لە ئەگەری ڕەواندنەوەی مەترسیە جیددیەكان كوردستان دەگەڕێتەوە بۆ سەردەمی دوو ئیدارەیی و لەوێشەوە بۆ دەسەڵاتی بنەماڵەو خێڵ و حزب و تاقم و باڵ باڵێن !
:
4- هەوڵەكانی وڵاتانی ئیقلیمی زیاتر لە ئێستا مەحكەم تر ئەبێ ، لە ئەگەری ئاشتبوونەوەی حەقیقی توركیا لە گەڵ ئێران و عێراق و سوریا هەڕەشەكان دەچێتە قۆناغێكی كردەیی ترسناكەوە لەبری گێڕانەوەی ناوچە دابڕێنراوەكان ئەوەش بنیادنراوە هەرەس دێنێ !
:
5- هەڕەشەكانی حەشدی شەعبی و گروپە توندڕەوەكانی مەزهەبگەرای شیعە پەرەدەسێنێ ، لە غیابی بەرگری نێودەوڵەتی و بێ دەنگی وڵاتانی ناوچەكە كوردستان دەكەنە ئامانج و وەستان و ڕوبەڕووبونەوە لە دژیان زۆر ئەستەمە !
: