بە دڵنیایەوە كەس نیە ناوی فیرعەونی نەبیستبێ‌ و لەژیانی رۆژانەشمان هەموومان بەكاری دەهێنین، لە راستیدا فیرعەن خۆی ناو نیە، بەڵكو پلە و پۆستە، بەكورتی رەمزە بۆ هەموو دەسەڵاداریكی خۆسەپێن و بێ‌ ویژدان و زاڵم و ستەمكار.
دیارە بە درێژایی مێژوو لەهەموو چاخ و زەمانێك فیرعەونێك بووە،بەڵام بەداخەوە لە دوای شۆڕشی تەكنەلۆژیا و زەمانی عەولەمە و سەردەمی عیلم، ژمارەی فیرعەونەكان لەبری لەناو چوون زیادیانكردوە!!! بێ‌ گومان بەگشتی هەموو گەل و میللەتێك لە فیرعەونەكان بێزارن و، هەردەم لە هەوڵدان بۆ رزگاربوون لە ژێردەستەیی و گەیشتن بە خەونی ئازادیی و دادپەروەریی.
گەلان هەندێ‌ جار ئەگەر بۆیان بكرێ‌ و بتوانن رێگای خەباتی چەكداری دەگرنە بەر بۆ روخان و لەناوبردنی فیرعەونەكان. ئیتر هەندێ‌ جار فیرعەونەكان بەرگەی خەباتی شوڕشگێران ناگرن و دەڕووخێن. بەڵام دواتر دوای خەبانی چەندین ساڵە و بوونە قوربانی هەزار كەس،كەچی هیچ لە دۆخەكە ناگۆڕێ‌ و كورد وتەنی سەیر دەكەی هەر هەمان تاس و حەمامە بۆ؟
لەم بارەوە (علی شەریعەتی) قسەیەكی زۆر جوانی هەیە كە دەڵێ‌، كاتێ‌ شۆڕش دەكەین دیكتاتۆرەكان دەڕووخێنین، بەڵام سەركەوتوو نابین و شتێكی ئەوتۆ لە ژیاندان ناگۆڕێ‌، چونكەئەوانەی دیكتاتۆریان دروستكرد هەر لە شوێنی خۆیانن.
بەراستی جوانی پێكاوە، راستی فیرعەونەكان كە ئێستا بە دیكتاتۆر ناودەبرێن هیچ كامێكیان لە هەسارەیەكی ترەوە دانەبەزیوە بۆ سەر زەوی، بەڵكو هەموو دیكتاتۆریك رۆڵەی وڵاتەكەی خۆیەتی و، بە نان و ئاوی ئەو وڵاتە گەورە بووە، ئینجا هیچ كەسێكیش بە سەرۆك و دەسەڵاتدار لە دایك نەبووە، بەڵكو ئەوە میللەتانن كە دیكتاتۆر و فیرعەون دروست دەكەن.
ئاخر هەموو كەسێ‌ كاتێ‌ بۆیەكەم جار دەبێ‌ بە سەرۆك كەسێكی ئاساییە و، دواتر توێژەكانی كۆمەڵگا بەتایبەتی سیاسی و رۆشنبیر و سەركردە سەربازیەكان و، یاساناس و دادوە و راگەیاندكار و خاوەن قەڵەم و شاعیر و هونەرمەندەكان ئەوەندە بەشان باڵی هەڵدەدەن، تا خۆی لێی دەگۆڕێ‌ و دەبێ‌ بە فیرعەون.
پێم وایە زۆرجار فیرعەونەكان نەك هەر بێ‌ تاوانن بەڵكو زولمَیشیان لێكراوە!!! لەوانەیە بوترێ‌ ئاخر كێ‌ دەتوانێ‌ زوڵمیان لێبكات. بەڵێ‌ ئەوانە زوڵمیان لێكردوون كە قەناعەتیان پێكردوون كە بەهیچ شێوەیەك بەدیلیان نیە،ئەوان كەسێكی ئاسایی نین و موعجیزەی سەر عەرزن،ئەگەر ئەوان نەمێنن ئیتر شتێك نامێنێ‌ بەناوی میللەت و وڵات. ئاوا زوڵم لە سەرۆكەكان دەكرێ‌ و ئەوانیش دەبن بە فیرعەون بۆ گیانی میللەتی خۆیان.
هەزاران رەحمەت لە سەرۆك و سەركردە و فەیلەسوفی ئیسلامی (علی عیزەت بیگۆفیچ) كە رۆژێكی هەینی چووە مزگەت و كاتەكەی درەنگ بوو مزگەت پڕبوو لەخەڵك، كە بینیان سەرۆكە هەر هەموویان هەستانە سەرپێ و فەرمویان لێكرد، ئەویش پێی وتن(دانیشن بە دەستی خۆتان دیكتاتۆر بۆخۆتان دروست مەكەن)
راستی لەناو هەر میللەتێك فیرعەون دروستبوو، ئەوە ئەو میللەت و كۆمەڵگایە نەخۆشە، بۆیە تۆوی پیسی دیكتاتۆریەت لە هەناوی ئەم كۆمەڵگایەدا نەشونما دەكات و گەورەدەبێ‌، ئەی بۆ لە هەناوی كۆمەڵگا تەندروستەكان فیرعەون بوونی نیە؟! باشە ئەوان حەزیان لە خۆسەپاندن و مانەوەی هەتا هەتایی نیە؟ بۆ نا هەموو دەسەڵاتدارێك حەزی لە پیاهەڵدان و دەست ماچكردن و كڕنۆش بۆبردنە، بەڵام كاتێ‌ دەزانێ‌ بۆی ناچێتەسەر و كاسەلێس و ماستاوچی و پیسخۆر شك نابات،ئیتر ئەویش لەخۆی دەرناچێ‌ و نابێ‌ بە فیرعەون.
بەداخەوە زۆر جار دەوترێ‌ ئەوە ئیسلامە وای لە خەڵك كردوە كە زوڵم و ستەم لە فیرعەونەكان قبوڵ بكەن و بۆ جگە لە وڵاتانی رۆژهەڵاتی زۆرینە موسڵمان دیكتاتۆر بوونی نیە؟. ئاخر ئیسلام تا سەر ئیسقان دژە لەگەڵ زۆڵمی فیرعەونەكان و خەتای چیە؟. دەزانن یەكێك لە حیكمەتەكانی ئیسلام ئەوەیە لە سەردەمێكدا هاتووە كە بەهیچ شێوەیەك وێنەی پێغەمبەر و ئەسحابەكانیش بونیان نیە، ئەمە لەبەر ئەوەیە تا لە شوێنە پیرۆزەكان دانەنرێن و كڕنۆش و سوژدەیان بۆ ببرێ‌ و، دواتر خەڵك فێربێ‌ و بەلایەوە ئاسایی بێ‌ سوژدە بۆ شتی تریش بەرێ‌!!!
بی گومان لە پرەنسیپیەكانی ئیسلام هیچ كەس لە زاتی (پیغەمبەر) (د.خ)گەورەتر نیە، بەڵام ئەو زاتە گەورەیە خۆی دەفەرموێ‌(هێدە پێم هەڵمەدەن وەك ئەوەی نەسرانیەكان بە عیسای كوڕی مەریەمیان هەڵدا، من تەنها عەبدم، پێم بڵێن عەبد و رەسوڵی خوا) دەی كەسێ‌ بەم شێوەیە لە دینەكەی تێبگا و پێغەمبەرەكەی بە عەبد بزانێ‌، دەی چۆن دەبێتە هەوێنی دیكتاتۆریەت و فیرعەون بۆخۆی دەسازێنێ‌؟!.