ئەوترێ بۆچی نەوشیروان موستەفا بێ دەنگە ... !؟

 

:
..... ئەگەر چی بەپێی ڕێكەو‌تنی نێوان گۆڕان و یەكێتی بڕیار بوو (20) ئەم مانگە ئاڵۆگۆڕی ئاشتیانەی پۆستی پارێزگاری سلێمانی لە ئاسۆ فەریدون بۆ هەڤاڵ ئەبوبەكر بچێتە بواری كردەییەوە ، وەلێ بەبیانووی جیا جیاو پاساوی نایاسایی ڕێگری كرا لەو گۆڕانكاریەو نەیانهێشت دكتۆر هەڤاڵ ئەبوبەكر وەكـ كاندیدی شەرعی و یاسایی بزوتنەوەی گۆڕان ئەو پۆستە وەربگرێت ، سەرباری ئەوەی سەركردایەتی هەردوولا قەناعەتیان بەخۆیان هێنا گۆڕانكاریەكە بەم شێوەیەو‌ لە دەرەوەی دكتۆر هەڤاڵ جێبەجێ بكرێت ، بەڵام كاردانەوەكان بەتایبەتی لە ئاستەكانی خوارەوە كۆبوونەوەی ئەنجومەنی پارێزگای سلێمانی بۆ جاری دووەم دواخست ، ڕەنگە ئەگەری تر بەڕووی پرسەكەدا بكاتەوە‌‌ ، لێرەوە لەنێو هەموو ئەو دەنگە ناڕەزاییانەی كە لە هەناوی گۆڕانخوازانەوە وەكـ زریان تەقیوەتەوەو خەریكە جڵەوی بڕیارو ڕێكەوتنەكان بەرەو ئاقارێكی ترا ئەبا ، قسە لەسەر بێ دەنگی و بێ هەڵوێستی ڕێكخەری گشتی بزوتنەوەی گۆڕانە كە ئاخۆ بۆچی لە ئێ ستادا نەوشیروان موستەفا بێ دەنگی خۆی ناشكێنێت و قسەی یەكلاكەرەوەی لەم پرسە چارەنوسسازەدا ناكات ! من هەوڵ ئەدەم بەپشت بەستن بە ڕووداوەكانی یەكـ ساڵی ڕابووردوو بیسەلمێنم كە كاكـ نەوشیروان موستەفا بێ دەنگـ ئەبێ و هەڵوێستی ڕوون و ئاشكرا دەرنابڕێت چونكە :
:
1- لەسەر و بەندی كۆبونەوەی پارساڵی پەرلەمانی كوردستان بۆ هەمواری یاسای سەرۆكایەتی هەرێم كە لە ڕۆژی 19ی ئابی 2015 بەڕێوەچوو ، هەتا ئێستاش ڕوون نیە ئەگەر ئەو لە گەڵ كۆبوونەوەی ئەو ڕۆژەی پەرلەماندا نەبووە ! ئەی بۆ فراكسیۆنەكەی بە قسەیان نەكرد !؟
:
2- لە ڕۆژی 12ی ئۆكتۆبەری هەمان ساڵ كاتێكـ ڕێگری لەسەرۆكی پەرلەمان كرا بگەڕێتەوە بۆ هەولێر بۆ ڕاییكردنی دەستەی سەرۆكایەتی پەرلەمان ، هەموو دونیا هاتە دەنگـ‌ تەنها ڕێكخەری گشتی بزوتنەوەی گۆڕان نەبێ !
:
3- لەسەرو بەندی هەواڵە جۆراو جۆرەكانی گەڕانەوەی لە هەندەرانەوە بۆ كوردستان كە بە بیانوی چارەسەری نەخۆشی بۆ ماوەی حەوت مانگـ لە دەرەوەی وڵات بوو ، ئەوترا بەهاتنەوەی بۆ كوردستان لەسەر كۆی پرسەكان قسەو هەڵوێستی جیددی دەبێ ! بەڵام هەمومان شایەتی كات و سات و جۆری هاتنەوەكەی بووین ! تەنانەت بە‌ وشەیەكـ بەشداری چاوەڕوانیەكان نەبوو !
:
4- ئەگەر چی بۆ دەیان جار لە لێدوان و چاوپێكەتنەكاندا ڕادەگەیەنرا كە بەرسانی گۆڕان و خودی ڕێكخەری گشتی هەتا پەرلەمان و حكومەت كارا نەكرێتەوەو سەرۆكی پەرلەمان و تیمی وەزاری گۆڕان دەستبەكار نەبنەوە ئامادە نین پێشوازی لە نوێنەری بارزانی بكەن ، كەچی هیچ یەكـ لەمانە نەهاتە دی و نوێنەری بارزانی بۆ دووەم جار گەیشتە گردەكەو لەلایان ڕێكخەری گشتی و چڤاتی ئەو حزبەوە‌ پێشوازی گەرمی لێكرا !
:
ماوەتەوە بڵێم ئەگەر كاكـ نەوشیروان موستەفا لەسەر هەمان نەزم و ماجەرا مابێتەوە و گۆڕانكاری بەسەردا نەهاتبێ ، ئەوا بۆ ئەم پرسەش بێ دەنگی هەڵدەبژێرێت و هیچ شتێكـی تازەی نابێ بۆ ووتن ! بەپێچەوانەوەی ئەم تێڕوانینە ئەوا بۆ ڕوودانی موعجیزەیەكـ بەجێی دێڵین ..!؟
:
................................................................. غفور احمد .