نامەیەك لە ناخی دڵ، بۆ یەكگرتوو بۆ كۆمەڵ

بە حوكمی ئەوەی ئەم هەرێمە كراوە بە بەشێك لە عێراق و ، لەسایەی حاكمە دیكتاتۆر و زاڵمەكانیش ئەم وڵاتە پڕبووە لە ناعەدالەتی و بێ‌ بەشكردنی كورد لە مافە رەواكانی خۆی، بۆیە لە ماوەی سەد ساڵەی تەمەنی عێراقدا دەیان حیزب و لایەن بە چەندین فیكر و ئایدیالۆژیای جیا جیا هاتونەتە كایە.ئیسلامیەكانیش وەك بەشێك لە كۆمەڵگە زۆر دەمێكە خەمی خەڵك و خاك و دینی خوایان هەڵگرتووە. بۆیە بە شێواز و فۆڕمی جیا جیا هاتونەتە مەیدانی كار.

ئاشكرایە ئیسلامیەكان لە لایەنێك زیاترن، هەر وەك عەلمانی و چەپ و لیبڕاڵ و سۆشیال و قەومیەكانیش لە لایەنیك زیاترن.
لە دەیەكانی رابردوودا هەوادار و خەڵكی ئیسلام دۆست بەگشتی، زۆر جار داوای یەكگرتنی لایەنە ئیسلامیەكانیان كردوە. ئێستاش لە دوای كۆنگرەی( 7)ی یەكگرتوو زۆر بە جددی تر ئەم باسە هاتۆتە ئاراوە. دیارە لەم رۆژنەدا چەندین بەرنامە و مێزگرد لەسەر ئەم باس و خواسە لە میدیاكان بەرچاوو دەكەوێ‌ و هەر دەوترێ‌ چۆن و كەی یەكدەگرن؟پرسیارێكی زۆر كوت و سادەیە، بەڵام وەڵامێكی زۆر دێژ و ئاڵۆزی دەوێ‌ بۆ؟!
چونكە لە بنەڕەتا تێڕوانیی جیا و دنیابینی جیا و، تێگەیشتنی جیا و بۆچوونی جیا و، هەڵوێستی جیا و خەباتی جیا و،رابردووی جیا و پاشخانی فیكری جیا، لەنێوان لایەن ئیسلامیەكان داهەیە، كە ئەمەش شتیكی زۆر سروشتیە و عەجایەب نیە.
بەڵێ‌ تێگەیشتن لە دین و تەفسیركردنی دەقە شەرعی و فیقهیەكان چەندین خوێندنەوەی جیا لەخۆ دەگرێ‌. هەموو ئەمانەش لەگەڵ وەفاتی حەزرەت و بە كۆتا هاتنی وەحی ئاسمان سەریهەڵداوە، ئەگەر نا ئەم هەموو مەزهەب و تەفیسر و قوتابخانە فیكریە جیا جیایە چیە لە مێژووی موسڵماندا؟
بەدڵنیایەوە ئێستا خەڵكانێكی زۆر حەزدەكەن بە كونفەیەكونێك هەموو ئیسلامیەكان لە ژێر یەك ناو و لە ژێر فەرمانی یەك سەركردە كۆببنەوە، بەڵام ئیشی عەمەلی زۆر جیایە لە حەز و خۆزگە.
گومانم لەوە نیە كە مامۆستای زۆر حەكیم و زانا لەناو ئیسلامیەكاندا هەیە،ئەوانیش زۆر چاك دەزانن كە یەكگرتن یانی چی و چۆن دەكرێ‌ و لێكەوتە و دەرهاویشتەكانی چین؟ لەبەر ئەوە من لێرەوە پێشنیار دەكەم بۆ هەردوو لایەنەكە كە ئێستا سەرقاڵی كۆبونەوە و دروستكردنی لیژنە و بەدواداچونن، بۆ لەمەولا ناونیشان و تایتڵی دیدار و كۆبونەوەكانیان لە یەكگرتنەوە بگۆڕن بۆ هاوپەیمانی و هاوخەمی و هاوخەباتی و یەك بەرەیی. چونكە دواجار دوای كۆبونەوەكان كە بەدڵنیاوە لە پراكتیزەكردندا، هەروا سادە و ساكار نیە دوو حیزب و لایەن، یان راستر بڵێم چەند حیزب و لایەنێك لە بۆتەی یەك حیزبدا لە قاڵب بدرێن. بۆیە لە داهاتوودا كۆبونەوەكان دوو كێشەی گەورە دروست دەكەن، ئەوانیش یەكەم دۆستەكان تووشی بێ ئومێدی دەكات،دووەمیش بیانوو دەدات بەدەست نەیاری ئیسلامیەكان و سەدان قسەی نەشیاوی لەسەر دروست دەكەن و لە هەڵبژاردنەكاندا پَیان دەفرۆشنەوە.
راستی یەكگرتنی دوولایەن یا چەند لایەنێك وەك نەشتەرگەری و كردنەوەی كەللە سەری نەخۆشێك وایە، كە بە بچوك ترین هەڵە نەخۆشەكە لەبری چاكبوونەوە گیان لەدەست دەدات و دەمرێ‌. بۆیە گەر دكتۆرێكی زۆر زیرەك و لێهاتوو نەیكات، ئەوە لەبری شیفا دەبێ‌ بە بەڵا،هەموومان بیرمان دێ‌ كە لە كۆتایی نەوەتەكان دوو لایەنی ئیسلامی كە بریتی بوون لە (بزووتنەوەی ئیسلامی) و (بزووتنەوەی راپەڕینی ئیسلامی)یەكیان گرت و (یەكبوونی ئیسلامیان)راگەیاند،بەڵام دواتر چی بوو؟ لەبری یەكبوون بوو بە سێ‌ بوون!!!
بۆیە باشترین بژاردە بۆ ئیسلامیەكانی كوردستان زۆر راستگۆ و برایانە، بێ‌ بیركردنەوە لە موزایەدەی لایەنێك بەسەر لایەنێكی تردا، بریتیە لە رێكەوتن لەسەر چەند خاڵێكی گرنگ و ئیشكردن بۆ خەبات و بەرەی هاوبەش.ئەوەی ئێستا كراوە لە ئەنجوومەنی پارێزگاكان هەنگاوێكی دروستە و دەكرێ‌ لە هەڵبژاردنی داهاتوودا لەپەڕلەمانی كوردستانیش ئەزموونەمەكە دووبارە بكرێتەوە و كوتلەیەكی بەهێز دروست بكرێ‌. هەر چەند من یاسایی نیم بەڵام پێم باشە ئەگەر لەرووی یاساوە كێشەی نەبێ‌ ئەم كوتلەیەش دوای راگەیاندنی ئەنجامەكانی هەڵبژادن بە رەزامەندی هەردوولا لە ژێر ناوێك دروست بكرێ‌. تاكو كەس وانەزانێ‌ مافی خوراوە و ئەگەر لەبەر هەندێك ئیعتبار نەبوایە قبوڵی نەدەكرد، دواجار هەموو ئەم پەنگ خواردنەوە و هەستكردن بە بەشخورانە سەردەكێشێ‌ بۆ را جیای و، راجیایش سەر دەكێشێ‌ بۆ ماڵ جیای، ئەوساش نەك هەر واتا هیچ بە هیچ نەكرا، نا ئەو كات قازانج سەری دەست مایەش دەخوا. چونكە قانون و سوننەتی ژیان وایە، ئەوەی دەبێ‌ بە كردار و روودەدات تا قیامەت مەجالی سڕینەوە و گەڕانەوەی نیە بۆ پێش رووداوەكە.