كاتێك عوزر لە قەباحەت گەورەترە!!!


یەكێك لە خاڵە درەوشاوەكانی ئەدەبی كوردی، چیرۆك و بەسەرهاتە سەیرو سەمەرە و پڕ لە حیكمەتەكانی (هەیاس و سوڵتانە). بەسەرهاتێكی زۆر خۆش و ماناداری نێوان (هەیاس و سوڵتان)هەیە، پێم وایە رێك پڕ بە پێستی ئەم مەسەلەی گەندەڵی و نەوت دزی و ناشەفافیەیە، كە دواجار پەنا براوە بۆ كۆمپانیایەكی ژمێریاری.
دەڵێن جارێك (هەیاس)دەڵێ‌ قوربان جەنابی سوڵتان دەزانی هەندێ‌ جار عوزر لە قەباحەت گەورەترە؟(سوڵتان)پێدەكەنێ‌ و دەڵێ‌ هەیاس من بڕوام بەشتی وانیە. چۆن عوزر لە قەباحەت گەورەتر دەبێ‌؟هەیاس دەڵێ‌ قوربان رۆژێك پێت دەسەلمێنم.
ئیتر رۆژگار هات و رۆیشت،رۆژێك (سوڵتان)لە قادرمەكانی كۆشكەكەی دەهاتە خوارەوە، (هەیاس)یش دەست دەبات بۆ لەشی (سوڵتان)، سوڵتان هاواردەكات ئای هەیاس ئەوە چیە؟
هەیاس دەڵێ‌ قوربان ببورە بەخوا نەمزانی جەنابتی وامزانی خێزانتە!!!
كە ئەم قسە دەبیستێ‌ سوڵتان پەلاماری خەنجەرەكەی دەدات و دەیەوێ‌ هەیاس بكوژێ‌.هەیاس توند دەستی سوڵتان دەگرێ‌ و دەڵێ‌ قوربان، پێم نەوتی هەندێ‌ جار عوزر لە قەباحەت گەورەترە؟!!! ئینجا سوڵتان تێدەگات.
حكومەتی هەرێمش دوای 9 ساڵ لە تەڕاتێن كردنی لە بواری نەوتدا، تازە بە تازە گرێبەست لەگەڵ كۆمپانیای (دیلۆیت)ئیمزا دەكات كە وردبینی بكات لە داهاتی نەوت،كە خودی ئەم كۆمپانیایە 5 كەیسی یاسایی لەسەرە و تۆمەتبار كراوە بەگەندەڵی!!!
جارێ‌ هەر تەنها پەنا بردن بۆ كۆمپانیای ژمێریاری، دان نانە بە بوونی ناڕوون و گرفتی زۆر لەم بوارەدا، بۆیە مەبەست لە كۆمپانیا هێنان بۆ سپی كردنەوەی وێنەی تەڵخ و شێواوی دەسەڵاتە و هیچی تر.
ئومێد دەكەین كە بەدەر لە تۆمەتبار كردنی بە گەندەڵی، (دیلۆیت) لە بەرامبەر سەفقەیەكی زەبەلاحی ماددی، بە دەسەڵات نەڵێ‌ قوربان فەرموون ئێوە بینوسن و ئیمزاكەشی لەسەر خۆمان!!!
لە راستیدا نەك بەراورد بە وڵاتانی ئەوروپا، بەڵكو بەراورد بە وڵاتانی عەرەبیش، كێشەی ئێمە ئەوەیە لە وڵاتانی عەرەبی بەتایبەت وڵاتانی كەنداو، كەداهاتی نەوتیان زۆرە، بێ‌ گومان خۆیان بەئارەزووی خۆیان گەندەڵێ‌ تیا دەكەن،بەڵام ناهێڵن میللەت برسیبێ‌ و بەشی قوتی خەڵكیش دەدەن. بەڵام لەم وڵاتەی ئێمە وەك ئەم مەسەلەیە وایە كە دەڵێن(كابرایەك دوای ماندووبونی چەندین مانگ، گەنمەكەی پێدەگات و ئیتر دواجار خەرمان سور دەكات و حازر دەبێ‌ بۆ كۆكردنەوە و باركردن. نیوە شەو دزێك دەچێ‌ بە چەندین وڵاخ و گوێنیەوە، ئیتر هیچ بۆ كابرای خاوەن خەرمان ناهێڵێتەوە، لە بەرەبەیان كە خاوەن خەرمان دەچێ‌ سەیر دەكات كابرا دز، گەسكی پێیە و شوێنی خەرمانەكە گەسك دەدەات، بۆ ئەوەی بایی چولەكەیەكیش گەنمی لێنەمێنێ‌، لەبەر خۆشیەوە هەر دەڵێ‌ پاك پاك پاك بە پاكی، واتا گوناهە ئەم چەند دەنكە گەنمەش بمێنێ‌ و نەیدزی)
هیوادارین مەسەلەی (دیلۆیت) و نەوت و گەندەلێ‌، ئەنجامی روون و باشی هەبێ‌ و، دواجار عوزر لە قەباحەت گەورەترنەبێ‌ و، ئیتر دەسەڵاتدارانیش دوو دەنكە گەنم لەسەر خەرمانەكە بهێڵنەوە بۆ میللەت و هەمووی گەسك نەدەن و بە پاكی هەمووی نەبەن.