خرۆشانی لایەنگرانی صەدر بۆ ..!؟

 

...  بۆ جارێكی تر و هاوشێوەی زیاتر لە ساڵێكە موقتەدا صەدر سەرۆكی ڕەوتی صەدر و سەركردە و ڕێبەری ناسراوی ئاییی شیعەكان لەگەڵ هەزاران لە لایەنگرانی ڕەوتەكەی و جەماوەرێكی گەورە و بەرفراوانی بەغدای پایتەخت و شارەكانی ناوەڕاست و خوارووی عێراق گەیشتنەوە گۆڕەپانی تەحریر و بەدروشمی چاكسازی و بەڵێ بۆ وتەو وتارەكەی موقتەدا خرۆشانەوە و هەڕەشەی چوونە ناو ناوچەی سەوز و سزای گەل بۆ گەندەڵكاران بەرزكردەوە ، ئەگەر چی كەسێكی وەكـ موقتەدا الصدر كە كوڕی مەرجەعێكی گەورەی شیعەكانە لە عێراق ، باوكی بە هەڵوێستەكانی لەسەر ڕژێمی صەدام و دواتر لەسێدارەدانی بەدەستی بەعسیەكان كاریگەری ڕاستەوخۆی هەبێ لە جۆشدان و جوڵاندنی هەستی هاوڵاتیان و ڕژانە سەر شەقامەكان ، وەلێ لەدۆخێكی شێواو و بێ سەرو بەری وەكـ ئێستای عێراقیەكان لە هەموو ڕوویەكەوە جێگای گومانەو دەشێ چەندین خوێندنەوەی جێاواز هەڵبگرێت ، بەندەش وەكـ چاودێرێكـ كە بەلامەوە‌ مەبەستە بەم شێوەیە لە هەنگاو و هەڵوێستەكانی موقتەدا صەدرو شوێنەكەوتوانی بڕوانم :
:
1- ئاماژەیەكی ڕوون و ئاشكرای فراوانی سنوورو قەبارەی قووڵی ناڕەزایەتیەكانی هاوڵاتیانی عێراقە بەهەموو بیروڕا جێاوازەكانیەوە ، بوون و پاڵپشتی كەسایەتیەكی وەكـ موقتەدا صەدر بەڵگەیەكـ بێ بۆ بوونی ئەو حەقیقەتە ، هەروەها ئامادەیی ڕێبەری صەدریەكان بۆ دانیشتوانی عێراق دەرفەتێكـ بێ بتوانن ئازادانه ‌تر تەعبیر لەناڕەزایەتی و نیگەرانیەكانی خۆیان بكەن !
:
2- لەدوای ڕوخان و لەناوچوونی ڕژێمی صەدام و حكومەتی بەعس كە لەسەر سوننەی عێراق ئەژماركرابوو ، ئیدی شیعەكانی عێراق و ناوچەكە بەگشتی جارێكی تر بەئاسانی نەهێڵن ئەم هاوكێشەیە پێچەوانەوە ببێتەوە و ژێر دەستەیی بگەڕێتەوە بۆ شوێنكەوتوانی شیعە ، لەوێشەوە ئەوە ڕاست بێ هەموو ئەم هەڵایەی صەدرو لایەنگرانی صەدر بەو ئاراستەیە بێت ئیدی شیعەكان باڵادەست و بڕیار بەدەستی تاكـ لایەنەی حكومەت و ئۆپۆزسیۆنیش بن !
:
3- بەكەڵك وەرگرتن لە هەڵەو پەڵەی پێاوانی ئاینی شیعەكان تەوژمێكی تووندو دەمارگیری بێ باوەڕیی و ئیلحاد زۆر بەخێرایی لەناوەڕاست و خوارووی عێراق سەری هەڵداوە ، بەهەموو شێوەیەكـ ئاین و ئاینزا ڕ‌ەددەكەنەوە ، بەڵكو وێرانەو كاولبوونی عێراق بەهۆكاری شەڕو ئاشوبی پیاوانی ئایینی ئەبینن ، ڕەنگە هەوڵەكانی موقتەدا و ئەجیندای پشت مێزەركەی موقتەدا بۆ شكاندن و چاوترساندنی شەپۆلی دژە ئاین و ئاینزاو شوێنكەوتوانی زیارەتگاكان بێ !
:
4- ڕەنگە شەڕی دەرەوەو ئەجیندای وڵاتانی نێودەوڵەتی و خاوەن بەرژەوەندیە تایبەتەكان بێ ، لێرەوە شەڕی بەدیل و بەوەكالەت و بچووكردنەوەی شەڕە گەورەكانی دەرەوە بێ ، وەلێ بە بچووكەكان و لە ناوخۆ دا ئەنجام بدرێت !
:
5- ڕەنگە ئەو دەستە نادیارو دیارە بێ كە موقتەداو لایەنگرانی موقتەدا لە ئێستادا ئامادەو سازبكات هەتا بەهۆیەوە فشارەكان زیاتر بكات بەڕووی حكومەتی ئێستای عێراق ئەگەر بەتەواوی مەرجەكان ڕازی نەبێ ، موقتەدا و نوێنەرانی خۆپیشاندەران وەكـ بەدیل و جێگرەوە بخرێتە ڕوو !
:
6- ئەشێ ڕەنگدانەوەی تێكچوون و شپرزەیی ناوماڵی خودی شیعە‌و پەرتەوازەیی بڕیارو هەڵوێستەكانە لەسەر كۆی كێشەو گرفتەكانی ناوخۆی عێراق ، پێ ئەچێت فرەیی لەچاوگ و جوڵێنەری دەرەكی كاریگەری نەرێنی و بەرژەوەندی دژەیەكی بەڕووی ناوخۆدا دروست كردبێ !

م-ع-كانی