بۆچی گۆڕان لەڕێكەوتنەكەی لەگەڵ یەكێتیدا ناكشێتەوە !؟


..... لە چەند ڕۆژی ڕابووردوودا و لە بەرنامەیەكی تەلەفزیۆنیدا شۆڕش حاجی سەركردەو هەڵسوڕاوی دیاری بزوتنەوەی گۆڕان وتی : زۆرینەی مەكتەبی سیاسی یەكێتی نیشتمانی لە گەڵ ئەوەدا نین ناوەڕۆكی ڕیكەوتنەكەی نێوان گۆڕان و یەكێتی وەكـ خۆی جێبەجێ بكرێت ، بەڵكو بەپێچەوانەوە پێێان خۆشە بگەڕینەوە لای پارتی و لە گەڵ پارتیدا ڕێكەوتنی دوو قۆڵی ئەنجام بدەن ! ئەگەر ئەمە ڕاست بێ كەواتە هەر لەسەرەتاوە زۆرێكـ لە ئەندامانی مەكتەبی سیاسی دژی واژۆكردنی ئەم ڕیكەوتنەكە بوون و ڕەنگە هەمان ڕاو كەسایەتی زاڵی نێو مەكتەبی سیاسی بن كە هەتا ئێستا بۆیان چووەتە سەرو‌ نا‌هێڵن خاڵەكانی ناو ڕێكەوتنەكە بچێتە بواری جێبەجێكردنەوە ، كەواتە ئامادە نەبوونی بەشێكـ لە مەكتەبی سیاسی و سەركردایەتی یەكێتی لە ئێوارە ئاهەنگی واژۆكردنەی ماڵی تاڵەبانی و لەكاتی خۆیدا بەڵگەیەكی ڕوون بوو‌ە ، لێرەدا پرسیارێكـ دێتەپێش ئەگەر سەركردەو هەڵسوڕاوانی گۆڕان گەیشتونەتە ئەم قەناعەتە و باوەڕیان بەهاوپەیمانێتی حەقیقی نێوان گۆڕان و یەكێتی نەماوە ، ئاخۆ هەتا ئێستا مانەوەی گۆڕان لە چوارچێوەو وابەستەبوونی بە ناوەڕۆكی ڕێكەوتنێكی وەهمی بۆ ؟ واتە بۆچی هەتا ئێستا نایانەوێ لەم ڕیكەوتنەكە بەفەرمی بكشێنەوە ؟ پرسیارێكەو ئەوەندە ئەهێنێ‌‌ شرۆڤە بكرێت لێرەدا هەوڵ ئەدەین بە چەند دێڕێك بگەینە‌ بەشێكـ لە وەڵامەكانی :
:
• گۆڕان و یەكێتی ئەگەر چی خاوەنی دوو ناوونیشان و دوو تێڕوانین و دوو دونیابینی جێاواز بەیە‌كترن ، وەلێ هەتا ئێستا لەسەرەوە بۆ ‌خوارەوەو لەشوێن و پێگەو دەزگایەكـ بۆ ئەوانی تر ڕێكخستن و جەماوەری هەردوولا جیاناكرێتەوە و جۆرێكـ لە تێكەڵی و چوون بەیەكدا هەیە‌ ! ڕەنگە گۆڕان ئەم حاڵەتە بەهەل بزانێ بەخشكەیی و لەڕیگەی هەڵوێست و ناڕەزایەتیەكانیەوە بیەوێ بنكەیەكی زیاتر لە ڕێكخستن و جەماوەری یەكێتی بۆ خۆی بتەكێنێ و حزبەكەی پێ گەورەو فراوانتر بكات !
:
• بەهەمان شێوەی یەكێتی و وەكـ تەواوی حزبەكانی تر ڕاجیایی و جێاوازی لە بیركردنەوەو هەنگاونان لەكاری سیاسی و حزبایەتیدا لەناو چڤاتی گشتی و نیشتمانی ئەو حزبەشدا بوونی هەیە ، لە ڕابووردوودا نمونەی هەڵهاتن و وازهێنان و تۆرانی بەشێكـ لەسەركردەو باژیڕەوان و كادیرە مەیدانیەكانی شارە جێاوازەكانی كوردستان بەڵگەیەكی حاشا هەڵنەگرە ، دیسان پاپەند بوونی تاكـ لایەنەی گۆڕان بەبەندەكانی ڕیكەوتنەكەی لە گەڵ یەكێتی هەروەها سەرباری ئەو واقیعەی كەبەسەر سەرۆكی پەرلەمان و تیمی وەزاری بزوتنەوەی گۆڕاندا هات كەچی ئامادە نین بەفەرمی لەحكومەت بكشێنەوە ، هەموو ئەمانە پێكەوە دەرخەری نەبوونی ڕوئیایەكی ڕوون و یەكـ هەڵوێستیە لای سەركردەكانی گۆڕان ، ڕەنگە هۆكاری سەرەكی ئەم پەتایە‌ بگەڕیتەوه بۆ چوونە دەرەوەو گەشتی تولانی ڕێكخەری گشتی ئەو حزبە بۆ دەرەوەی وڵات !
:
• بەپێچەوانەی ناوچەكانی بندەستی پارتی و زۆنی زەرد زۆرینەی هەر زۆری لایەنگران و هەوادار و جەماوەری گۆڕان لەناوچەیەكی دیاریكراودا و ڕێكـ بەسەر‌ زۆنی سەوزدا چربوونەتەوەو دابەشبوون ، ڕەنگە ئەمەش وای لەم حزبە كردبێ‌ هەوڵبدا هەتا ئەو كاتەی وەكـ حزبێكی سەرتاسەری و هاوسەنگ لەهەموو شارەكاندا دەرئەكەوێت كەمترین بەركەوتن و لێخشانی لەگەڵ یەكێتیدا هەبێ ! یاخود یەكێتی نەگەیەنێتە ئەو قەناعەتەی هەمان هەڵوێستی دژو نەیاری پارتی ئەزموون بكات !
:
• ڕەنگە بەبەڵێ و بەڵینی ئەو بەشەی لە مەكتەبی سیاسی و سەركردایەتی یەكێتی كە لەگەڵ گۆڕاندا تەبا و هاوڕان هەتا ئێستا ماونەتەوەو بەتەواوی پشت لەڕیكەوتنەكە ناكەن ، بێ گومان بەڵینەكان بۆ پاش تاڵەبانی یاخود بۆ كۆنگرەی داهاتووی یەكێتی یان هەرجۆرێكـ تر بێ ، ڕەنگە ئەوەندە بهێنێ سەرباری سەغڵەتی و نیگەرانیەكانیان بە سیاسەتی كات بەڕیكردن درێژە بەم حاڵەتە نائاساییە بدەن !
:
• زاڵبوون و هەژموونی تاكڕەوانەی پارتی بەسەر بڕیار و سیاسەتی دەرەوەو ناوخۆی هەرێمی كوردستاندا دیارە ، لەوێشەوە بۆ سەر یەكێتی و حزب و لایەنەكانی تر ڕاستە ، ئەمەش كاریگەری ڕاستەوخۆی بەسەر بەشێكـ لەسەركردەكانی یەكێتی و سیاسەتی یەكێتی ئەو حزبەدا ڕەنگی داوەتەوە ، هەر بۆیە بزوتنەوەی گۆڕانی ڕاڕاو فرە ڕاكردبێ كە هێشتا زووە پشت لەیەكێتی بكات و بەتەنها ڕووبەڕووی پارتی و هەڵوێستەكانی پارتی ببێتەوە ! .