هەڵچوونەكەی شاسوار عبدالواحد بۆ !!؟

 

..... لەبەرنامەیەكی تایبەتی تاوتوێی كەناڵی ئاسمانی ( NRT )دا شاسوار عبدالواحد خاوەنی گروپی كۆمپانیاكانی ناڵیا ، جێاوازتر لەبەرنامەو دیدارەكانی تری ڕابووردووی بەتووندی و بە زمانێكی زبر هێرشی كردە سەر دەسەڵاتدارانی هەرێم و تەواوی حزبە كوردستانیەكان بەگشتی و بەرپرسانی پارتی و یەكێتی بەتایبەتی ، گوایە لە سەرەتای ئەم مانگەوە هێزێكی چەكداری سەر بە سكرتاریەتی یەكێتی چونەتە سەر پڕۆژە‌یەكی كۆمپانیای چاڤی كە لەكاتی كاركردندا بوون و بەهۆیەوە دەستیان گرتووە بەسەر چەند ئامێرێكی بیناسازی كۆمپانیاكە و ڕێگری دەكەن لەتەواوكردنی پرۆژەكەیان ، بەندەش وەكـ چاودێرێكـ كە لەشاشەی كەناڵەكەوە بینەری بەرنامەكەی بووم چەند سرنج و سەرەقەڵەمێكم لاگەڵاڵە بوون بەپێویستم بینی لە دووتوێی ناونیشانێكدا بڵاوی بكەمەوە :
:
• زۆر بەڕوونی ئەوەی دەخستەڕوو كە دەسەڵاتدارانی هەرێم بەرنامەڕێژی دەكەن بۆ لێدان و پەكخستنی پرۆژەكانی گروپەكەی و مەبەستیانە گێچەڵ و ڕێگری حەقیقی بۆ دروست بكەن ، ڕەنگە ئەم جارەیان ئەگەر بۆیان بچێتە سەر ‌زیانێكی گەورەی ماددی بەر گروپ و كۆمپانیانی چاڤی بكەوێ ! بە وتەی ئەو ئامانج لەم ڕێگری و گێچەڵیە بۆ ئەوەیە بەشێكـ لەو داهات و قازانجە بخرێتە سەر حیساب و بانكی بەرپرسانی شاری سلێمانی ، هەر بۆیە ویستی بەدەسەڵاتداران بڵی بەهەر نرخێكـ بووە ئامادە نیە لەهیچ پرۆژەیەكدا بەرپرسانی پارتی و یەكێتی بكاتە هاوبەش و شەریكە پشكی خۆی !
:
• ویستی پەیامێكـ بدا بەگوێی جەماوەر و لایەنگرانی یەكێتی كە ئەوە یەكێتیە ڕاستەقینەكەی ئێوە نیە كە سیاسەت دەكات ، بەڵكو ئەوەی ئێستا تەعبیر لە سیاسەتی یەكێتی و بەرنامەی ئەو حزبە دەكات پارتیە نەكـ یەكێتی ، هەروەها ویستی بڵێ بەهۆی نزیكی و پەیوەندیە ئابوریەكانی بەرپرسانی یەكێتی لەگەڵ پارتی هاوكارو دەستباری حەقیقین لەتەشەنەكردنی گەندەڵی و ئەم دۆخەش بۆ ئەوان تێناپەڕیت و گرفتەكان وەكـ خۆی كەڵەكە دەبێت و چارەسەر نابن !
:
• دەربڕینی ئەو پەڕی ناڕەزایی و نیگەرانی قووڵی ئەو بوو بەرانبەر بە بزوتنەوەی گۆڕان و خودی شەخصی ڕێكخەری گشتی ئەو حزبە نەوشیروان موستەفا ، ئەو ویستی بڵێ گۆڕانیش هاوشێوەی حزبەكانی تر جێاوازیەكی ئەوتۆی نیەو لەئاستی دروشم و بانگەشەكانی گۆڕانكاری و گۆڕینی سیستەمی سیاسی لەكوردستاندا نیە، بۆ دووپاتكردنەوەی ئەم نیگەرانیە ئەوەی ڕەددكردەوە كە ڕێكخەری گشتی بۆچارەسەری پزیشكی و بەهۆی نەخۆشیەوە لەدەرەوەی كوردستانە و ناتوانێ بگەڕێتەوە ! بەبڕوای بەندە ئەم توڕەبوون و هەڵچوونەی شاسوار عبدالواحد لە گۆڕان و ڕێكخەرەكەی بۆ ئەوە دەگەڕێتەوە ئەگەر چی كەناڵی ئاسمانی ( NRT ) كەناڵێكی بێ لایەنەو سەر بەهیچ حزبێكی دیاریكراو نیە ، وەلێ بەشێكـ لەبەرنامەو كاراكتەرە بەشداربوەكانی بەرنامەكان لە چوارچێوەی بەرژەوەندی گشتی هاوڵاتیاندا خزمەتێكی بەرچاوی بەبەرەی ئۆپۆزسیون بەگشتی و بەرنامەو ئەجیندای سیاسەتی بزوتنەوەی گۆڕان كردوە !
:
• بەبڕوای بەندە بچووكردنەوەو بێ ‌بایەخكردنی ڕۆڵی حزبەكان بەو جۆرەی كە باسیكردن ، ئەگەر چی لەبێ ئومێدی و دەسەوسان لەگۆڕانكاری و كۆتایی نەهاتنە بە دەسەڵات و ستەمی بەرپرسانی یەكێتی وپارتیەوە دێ ، ڕەنگە پەیامێكی نەرم و دوورهاوێژی نزیكیش بێ ، كە شاسوار عبدالواحد بیر لەپێكهێنان و دروستكردنی حزبێكی نوێ بكاتەوە بەو ستایل و چوارچێوەیە كە خەونی پێوەدەبێنی و لە بەرنامەو شێوازی كاری حزبی ئێستای حزبەكانی كوردستاندا بوونی نیە ! كە بێ گومان ئەوكات بۆ خۆشی ببێتە ڕكاربەرو بەتەنیشت ئەركە ئابوریەكەی ، ئیدارەی بەرنامەیەكی سیاسی و بەهەناسە و كێبڕكێ وگۆڕانكاری لەسیستەمی وڵات درێژە بەكاری سیاسەتیش بدات !
:
• پەیامێكە بۆ دەسەڵاتدارانی ئەم هەرێمە كە ئەوان وەكـ خاوەنی گروپی كۆمپانیاكانی ناڵیا ئامادە نین لەژێر هیچ فشارێكیدا دەستبەرداری مافە ڕەواكانی خۆیان بن ، لەولاشەوە تەواوی خەڵكی كوردستان بەشایەت بگرێ هەرچ مەترسیەكـ لە داهاتوودا ڕوو لەخودی شەخصی خۆی یان كۆمپانیاكەی بكات ، ئەوا دەسەڵاتدارانی پارتی و یەكێتی و دامو دەزگا ئەمنیەكانی حكومەتی هەرێم بەرپرسیار و تۆمەتباری سەرەكین !
: