گەشتەكەی ترەمپ لەنێوان پێگەی ئاین و بانگەشەی عەلمانیەتدا ..!؟

 

... پاش دەستبەركاربوونی وەكـ سەرۆكی نوێێ ئەمریكا دۆناڵد ترەمپ لەیەكەم گەشتیدا بۆ دەرەوەی وڵات بڕیاریدا هەر لەیەكـ لە ( سعودیە ، ئیسرائیل ، ڤاتیكان ) بەسەربكاتەوە ، ئەوە بوو لەبیستی ئەم مانگە بەسەردانێكی فەرمی و بەیاوەری هاوژین و كچەكەی گەیشتە پایتەختی سعودیە تیایدا دوو ڕۆژ لەو وڵاتە مایەوە و بەگەرمی و خۆشحاڵیەوە لەلایان پاشای سعودو بەرپرسانی حكومەت وخانەوادەكەی میوانداریەكی بێ وێنەی بۆ سازدرا ، دواتریش سەردانی ئیسرائیل و حكومەتەكەی محمود عباسی بەسەركردەوە لەوێشەوە بۆ ڤاتیكان و مانەوە لەكۆشی كڵێساكانی ڕۆما ، بێ گومان ئەم سەردانەی ترەمپ وەكـ یەكەم گەشتی پاش هەڵبژاردن و دەست نیشانكردنی سێ وەڵاتی جێاواز ، بەدەر لە ماجەرای كۆبوونەوەو دیدارو ڕیكەوتنە سیاسی و ئابوری و سەربازیەكان ، بەندە ئەخوازێ لە گۆشەیەكی ترەوە سەرنجتان بۆ چەند خاڵیكـ ڕاكێشم كە سەرنجی منی برد :
:
• ئەبێ ئەو ڕاستیە وەكـ خۆی بخوێنرێتەوە كە ئەمریكیەكان ئەگەر چی چوار ساڵ جارێكـ هەڵبژاردن بۆ سەرۆكی نوێی وەڵات ئەنجام دەدەن ، وەلێ دواجار ئەوەی حاكم و بڕیار بەدەست و سەروەره لەوێشەوە هەنگاوەكانی داهاتووی سەرۆكی تازە دیاری دەكات و ڕەنگـ ڕێژی سیاسەتی دەرەوەی وەڵات لەئەستۆ ئەگرێ ، دەزگا و ناوەندە فەرمی و تەشریعیەكان و تێڕوانینی دوورمەودای ئاسایشی نەتەوەیە وەڵاتە ، نەكـ دەقاودەق كۆپی پەیستی بیڕوڕاو سیاسەتی تاكە كەسێك كە پێ دەڵێن سەرۆكی تازە ‌هەڵبژێردراو ، چونكە ئەگەر بگەڕێنەوە بۆ تێڕوانین و جیهانبینی دۆناڵد ترەمپ لەكاتی هەڵمەتی هەڵبژاردندا كە چۆن وەصفی وەڵاتانی كەنداوی عەرەبی بەگشتی و وڵاتی سعودیە بەتایبەتی دەكات هیچی لەئێستا ئەم كەسایەتیە ناچێت و تەواو پێچەوانەوە بوەتەوە ، واتە ئەكرێ بڵێن بانگەشە لەپێش هەڵبژاردن و دوای هەڵبژاردن تەنها بۆ گەرمكردن و جۆشدانی جەماوەرە و قاڵكردنی ناوخۆ و دەرەوەیە بەو گەمە سیاسیەی كە پێی دەڵێن هەڵبژاردن !
:
• لەیەكەم گەشت و هەڵبژاردنی سێ وەڵاتی جێاواز لەبیروباوەڕو زمان و نەتەوەو هەژموون ، دەرخەری ئەو حەقیقەتە كە ئەم سێ وەڵاتە لەیەكـ كات و بەهەمان كێش و قورسایی بەلای ئەمریكیەكانەوە جێگای بایەخەو كۆڵەكەی ڕاگرتنی بەرژەوەندیەكانی ئەمریكایە لەجیهاندا ، هەروەها بەستنەوەی سیاسەت و تێڕوانین و بەرژەوەندی هاوبەشی ئەم سێ وەڵاتەیە بەسیاسەت و بەرژەوەندیەكانی دەرەوەی ئەمریكا ، لێرەوە بڕوانە بۆ جیهانی ئیسلامیی و ڕۆڵ و پێگەی سعودیە لەهاوكێشەكان و بەردەوامی حاڵەتی نا شەڕی تەواو و نا ئاشتی و ئاسایشێكی جێگیر لە ناوچەكە ! واتە لەهەڵكیرسان و داهێنانی شەڕو ململانێ و ئاشتی و ڕووبەڕووبونەوە‌ی تیرۆردا بۆ خۆیان سەرچاوەی كێشەكەو هێرش بەرو بەرگریكاری و پارێزەرن !
:
• جێاوازیەكـ ئەگەر هەبێ لە سەرۆكی ئێستای ئەمریكا لەوانیتری جیابكاتەوە ، دۆناڵد ترەمپ زیاتر لەپێشینانی خۆی ڕاشكاوانەتر و بەئاشكرا سیاسەت دەكات ، ئەم سەردانەی كە بە ‌یەكەم گەشتی دەرەوەی دێ بەنمونە وەربگرین ، سێ وەڵاتی جێاوازو چاوەڕواننەكراوی پێكەوە گرێدا ، ئەمه بۆ خۆی شتێكی جێاوازو داهێنانێكی تازە بوو لەسیاسەتی ئەمریكا، پێ دەچێ لەسەردەمی هاوپۆستەكانی پێشوودا ئەگەر سەردانی لەم جۆرەش هەبووبێ ئەوا بەنهێنی و دوور لەچاوی كامیرەكانەوە ئەنجام دراوە ، یاخود لەسێ كات و ساتی جێاوازو لەبۆنەو پێشهاتی دی بەتەنها بەسەركراونەتەوە !
:
• ئەگەر چی عەلمانی و لیبراڵ و سۆشیال دیموكراتەكان لەئاستی جیهاندا بەگشتی و وڵاتانی و عەرەبی و ئیسلامیی و بەكوردستانیشەوە بانگەشەی جیاكردنەوەی ئاین لەسیاسەت و دوورخستنەوەی ئاین لەكاروباری دەوڵەتدا ئەكەن ، وەلێ ئەم سەردانەی سەرۆكی گەورەترین وەڵات لەجیهاندا كە بە باوكـ و ڕوگەی دیموكراسیخوازان و بانگەشەكارانی ئازادی و خۆداڕنین لەبیروباوەڕی ئاینی ، هەموو ڕیسەكەی كردەوە بەخوری و بەگوێی هەمواندا چرپاندی ، كە ئاین بۆ سیاسەتە و سیاسەت تێكەڵ بە كرۆكی ‌ئاینە ! لێرەدا نەكـ سیاسەت بەشێكی زیندووە لە ئاین بەڵكو بەتەواوی مانا بەكارهێنانی ئاینەكانە و خستنە ‌خزمەتی سیاسەت و بەرژەوەندیە تایبەتەكانی زلهێزان و دەسەڵاتە خۆسە پێنراوەكانی ناوچەكەیە ، ئەڵبەتە بەپیرۆزبایی و ڕەزامەندی و تێۆرەزەكردنی بیرو تێڕوانینی هەڵگرانی بیری عەلمانی ! ئەوەش لەم حەقیقەتە ڕادەكات و ئەیەوێ خۆی گێل و گەوج بكات ئەوا با هەر لەنێو بازنەی داخراوی كۆڕو سیمینار و پانێڵ و پلاتفۆرمی دوابڕاوی بێ ئاكام بخولێتەوە و خۆی و دەوورووبەری پێ خەڵەفاو قاڵ بكات !
:
• خاڵیكی تری گرنگـ كە لەم سەردانەدا هاتوەو پێویستە ئاماژەی پێ بدەین ، بانگخوازان و زانایانی كیباری سعودیە لەوێشەوە بۆ تەواوی موسڵمانان و شوێنكەوتەی قوتابخانەكانی برایانی سەلەفی و ئەوەی لەژێر ڕۆشنایی و تێزە فیكری و زانستی و شەرعیەكانی زانایانی سعودیە بەخۆیان ئەڵێن ئەهلی سوننەوجەماعە ، ئەبێ ئەوە بەجوانی بزانن كە پادشاو كاربەدەستانی سعودیە و لەنێویاندا نەوەو خانەوادەی ئال سعود وەلی ئەمری شەرعی موسڵمانان نین ، ئەوان جگە لە سیاسەت و لەناو سیاسەتدا تەنها ڕەچاوكردنی بەرژەوەندیەكانی بنەماڵە بە هیچی ترەوە خەریكـ نین ، ئەوەندەی خەمی شەخصی و بۆ پاراستنی دەسەڵات و كورسیە لەرزۆكەكەیانە‌ هێندە لەخەمی ئاین و ئەخلاق و ڕەوشتی موسڵماناندا نەبوون ، پەیوەندییەكان دەرەوە و سیاسەتی ئیدارەدانی ناوخۆو و ڕاگەیاندن و كەناڵ و ڕێكخراوەو پشكـ و بەشداریان لە كۆمپانیا زەبەلاحەكانی بواری ئابوری له ئاستی ‌جیهاندا ، پێكەوە شاهیدی حاڵن كە ئەوان لەكوێی خەمی موسڵمانان و ئەركـ و فرمانە‌كانی ئاینی پیرۆزی ئیسلامن ! واتە ئەگەر ئەوان بەم شێوەیە لەسیاسەت و هەڵوێستە سیاسیەكانی بەرپرسانی سعودیە گەیشتتون و لەبێ دەسەڵاتیدا هیچ ناڵێن ئەوا‌ باشترە ! بەپێچەوانەوە كەواتە دەگەینە ئەو خاڵەی كە ئەڵێن زانایانی سعودیە بەوە ڕازی بوون سیاسەت ( بەناوخۆ و دەرەوە ) بۆ بەرپرسان و ئاین و تەنها لە ناو ئاینیشدا بواری مامەڵەو كڕین و فرۆشتن و هەندێ پرسیاری تایبەت بەئافرەتان و ئادابەكانی نوێژو ڕۆژوو هتد بۆ زانایان تایبەت و دیاریكراوە ! ئەمەش ڕێكـ ئەو ئاینەیە كە عەلمانێتی ئەمریكا و ڕۆژئاوا بەگشتی دەیان ساڵە هەوڵ و كۆششی بۆ دەدەن ، كە ئەوان ئاینێكیان ئەوی لەخولگەی بەرژەوەندی و بۆ مەرامی سیاسی ڕامبكرێت !