له ماناكانی بەرۆژووبوون هەستكردن بەیەكتر بەنمونە ؟

... ئەوەتا مانگی پڕ خێرو خۆشی و بەخشندەیی موسڵمانان هاتەوە ، لەكاتێكدا پێشوازی لەم مانگە خۆشەویستە دەكەین كەش و هەوای وەڵات لە‌ وەرزی هاڵاوو گڕو گەرمی هاویندایە‌ ، كەواتە هێندەی ناڕەحەتی و تینووێتی و برسێتی بەڕۆژوبوون تیایدا پاداشت و خێرەكەی چەند جارەیە و زیاتر دەكشێ بەرەوسەرەوە تا ئەو ئاستەی خوای میهرەبان وەری دەگرێ ، هەر ئەمەش نهێنی ئەو ڕۆحیەتەیە كە لەپەنایدا موسڵمانان ئەتوانن بەرگەی ماجەرای ڕۆژووگرتن و ئاسەوارە جەستەیی و دەروونیەكانی بگرن و ئامادەشن بۆ پاش ئەم مانگە پیرۆزە لەبۆنه ‌و یادەوەریەكانی تری مێژووی ئیسلام و ئاینەكانی تر وەكـ سوننەتێكی زیندووی سەروەرمان محمد ( صل الله علیه وسلم ) دیسان بەڕۆژووبن . 

هەتا ئێرە ئاساییە وەلێ زەرەرمەند و دەست بەتاڵی و مایەپووچی بۆ ئەو كەسانەیە كە ئەم هەموو ئەزێت و ماندووبوونە دەكێشن و خەرمانی ماندوو بوون و بەرهەمی كۆششەكانی ئەداتە دەم باو ڕەنج بەخەساری كردەوەكانی خۆی ئەبێتەوە ! زیاندمەند ئەو كەسەیە هەر بەوەی كە بەڕۆژووە ئیدی وادەزانێ له ‌لیستی چاكەكاران و چاكەخوازاندا ئەبێ ! كارەساتی گەورە ئەوەیە مرۆڤەكان بەو هەستەوە‌ بژین كە ئەوان لەكۆمەڵی خۆپارێزاوانن ! ( المتقون ) واتە بە ئەنجامدانی تەنها سروت و پەرستشێكی تایبەت لەئیسلامدا یەكسان نیە بەوەی لەسەربازگەو كۆمەڵی موسڵمانان بی !

ئەوەتا خوای گەورە باس لەهەندێ دەستەو گروپ دەكات كە ئەفەرمێت : ( ( قُلْ هَلْ نُنَبِّئُكُمْ بِالْأَخْسَرِينَ أَعْمَالاً * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعاً ) سورەتی الكهف ، واتە : ئەی محمد (صل الله علیه و سلم) پێیان بڵێ : ئایا هەواڵی ئەو كەسانەتان بدەمێ كه له كارو كردەوەیاندا زۆر زەرەرمەند و خەسارەتمەندن * ئەوانە ئەو كەسانەن كه هەوڵ و كۆششیان لەژیانی دنیادا بەزایه و بەهەدەر چووه ، لەكاتێكدا وایان دەزانی كه بەڕاستی كاری چاك دەكەن و كردەوەی باش ئەنجام دەدەن ) .

پەنا به ‌خوای گەورە ئەم زیان و خەسارەتە زۆر جار لەوەدا سەرچاوە دەگرێت كەسی موسڵمان لە ڕۆح و كرۆكی ئاینەكەی وەكـ ئەوەی پێویستە پێی نەگەیشتووە ، ئەوەی بیرچووە كە ئەصڵ و بنەمای هەموو پەرستشێكـ دانامەزرێت هەتا نیازو نێتێكـ نەبێ ، ئەو نێتەش ئەبێ لەڕووی شەرعییەوە ڕێگە پێدراوو حەڵاڵ بێت ، بەو مانایەی ئەبێ نێت و كردەوە‌ لەگەڵ تەرازووی ئیسلام و ئیماندا یەكبگرێتەوە ، ئەوجا تەواوی كردارەكە ڕاست و دروست ئەبێ ، بەپێچەوانەوە هەر لەسەرەتا و یەكەم هەنگاودا نێتەكە دانامەزرێت و كردەوەكەش بەتاڵ دەبێتەوە‌ ئەگەر چی زۆرو بۆریش بێ ، ئەمەش ئەو بنەماو بنچینەیە كە هەمیشە ئاینی پیرۆزی ئیسلام جەختی لەسەر دەكاتەوە ، بۆ ئەوەی هەموو جووڵەو كردارێكی موسڵمانان لەناخ و دڵێكی خاوێن و دەروونێكی زیندوەوە سەرچاوە بگرێ ، لەوێشەوە دووری بخاتەوە لە ناسازیی و پێكدادانی نێوان باوەڕ و كردەوە ( الاعتقاد و العمل ) .

بۆ ئەوەی زۆر نەڕۆین با بگەڕیینەوە سەر ناونیشانی بابەتەكەو چۆنیەتی گەیشتن بەماناو چییەتی رۆژووگرتن ، گەڕانەوەی مانگی پیرۆزی ڕەمەزان بە هەل و دەرفەتێكی باشی دەزانین بۆ كەسێكـ بیەوێ بەخۆیدا بچێتەوە و لەگوفتارو كردەوەو ڕەفتاریدا ڕابمێنێ و تەتەڵەی بكاتەوە بە پێوانەو سنوورەكانی خوای پەروەردگار‌ ، كە بێ گومان هەموومان پێویستیمان بەپیاچوونەوەو وەستان لەسەر كارو كردەوەكانمان هەیە ، هەموان پێویستە خۆی بناسێتەوەو لەبەردەم ئەركـ بەرپرسیارێتیدا ڕاوەستێ و بپرسێ لەخۆی : من لەكوێی ململانێی و ناكۆكی و دژایەتی نێوان ڕاستی و چەوتی‌ ( الحق والباطل ) دام ؟ ئاخۆ ئەوەی كە لە ناوچەكەدا دەگوزەرێ چەندە پەیوەستە بە منی موسڵمان و خاوەنی ئیمان و شوێنكەوتەی ئەم ئیسلامە !؟ ئاخۆ من كە بەم شێوەیە پابەندو خۆپارێزم دواجار لەسەر چ سەربازگەو كۆمەڵ و گروپێكـ ئەژماركراوم !؟ ئاخۆ لەوە گەیشتووم كە لەئێستادا شەڕێكی دەستەویەخە لەنێوان ڕاستی و چەواشەو ستەم و نادادیدا بەرپابووە تیایدا ئاین و ئەخلاق و بیروباوەڕی موسڵمانان بەئامانج گیراوە !؟ ئاخۆ لەو مەسجە تێ دەگەم كە ئەم سەربازگەو ئەم بەرەیە پێویستی بەمن هەیە وەكـ ئەوەی لە ئاینەكەمدا هاتووە و دەبێ بە ڕۆڵی خۆم هەستم !؟ ئاخۆ ئەم ئیسلام و ئیمانە منی لێ زیادە و پێویستی بە من نیە ؟ یاخود جێگەو كەلێنێكـ هەیە منیش لەپەنایدا خزمەتێكـ پێشكەش بكەم ؟ ئاخۆ هەر ئەوەندەی بڵێم من موسڵمانم و نوێژو ڕۆژووگرم ئەگەر گونجا و بۆم هاتە پێش حەجی ماڵی خوای گەورە بەجێ ئەهێنم .. هتد ؟

ئیدی ئەوەی ڕوودەدات و دێتە پێشەوە چ پەیوەندیەكی بەمنەوە هەیە ! واتە ئەم ئاستە لەتێگەیشتن لە ئیسلام و ماف و ئەركەكانی بەسە بۆ ئەوەی خوای گەورەم لێ ڕازی بكات !؟ ئایا هەرگیز بیرمان لەوە كردۆتەوە كە خوای گەورە هیچ ئاتاجی بەنوێژو ڕۆژوو برسێتی و تینوێتی و پەرستشەكانی تر نیە ؟


خۆ ئەوەش مەعلومە خوای گەورە لە قورئانی پیرۆزدا ئەفەرموێت :: ( إِنَّمَا الْمُؤْمِنُونَ إِخْوَةٌ ..) سوره‌تی الحجرات ، واتە : ئیمانداران برای یەكترن ، هەروەها ئەفەرموێت : (.. وَاذْكُرُوا نِعْمَتَ اللَّهِ عَلَيْكُمْ إِذْ كُنْتُمْ أَعْدَاءً فَأَلَّفَ بَيْنَ قُلُوبِكُمْ فَأَصْبَحْتُمْ بِنِعْمَتِهِ إِخْوَانًا ) سوره‌تی ال عمران ، واتە بەهۆی نازو نبعمەتی ئیمان و ئیسلامەوە ئێوە بوون بە برای یەكتر ، ئەی ئەركـ و ماف و داواكاری و سنورەكانی برایەتی ئیمانی لە ئیسلامدا چیە ؟! ئەزانی لە ئیسلامدا برایەتیەكە ئەوەندە تووندوتۆڵە پێغەمبەری نازدارمان ( صل الله علیه و سلم ) ئەیچوێنێ بە یەكـ جەستەو لاشە ؟‌ وەكـ لەم فەرموودەدا هاتووە : (عَن النُّعْمَانِ بْنِ بَشِيرٍ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: (  مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ؛ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى  ) رواه البخاری و المسلم : واتە نمونەی ئیماندار بۆ براكەی لەخۆشویستن و سۆزو بەزەیی و بەسەریەكەوە بووندا وەكـ یەكـ جەستەن : ئەگەر ئەندامێكی ئەو جەستەیە تووشی ئازارو ژانێك بوو تەواوی ئەندامانی جەستە بۆی بەخەبەرو ‌ بەپەرۆش و نەخۆشن ، هەروەها لە ئەنەسەوە هاتووە كە پێغەمبەری ناردار ( صل الله علیه و سلم ) ئەفەرموێت :( لَا يُؤْمِنُ أَحَدُكُمْ حَتَّى يُحِبَّ لِأَخِيهِ مَا يُحِبُّ لِنَفْسِهِ ) متفق علیه، واتە : ئیمانتان تەواو نابێ هەتا ئەوەی بۆ خۆتان پێی خۆشحاڵن‌ بۆ براكەشتان نەبێ .

ئایا ئەزانی دوو لە ماف و ئەركەكانی برایەتی لە نێو موسڵماندا : وەڵامدانەوەی سڵاوو گوێڕاگرتنە بۆ ئامۆژگاری و تێبینیەكانی براكەت!؟ ... عَنْ أَبِي هُرَيْرَةَ أَنَّ رَسُولَ اللَّهِ صَلَّ اللَّهُ عَلَيْهِ وَسَلَّمَ قَالَ : ( حَقُّ الْمُسْلِمِ عَلَى الْمُسْلِمِ سِتٌّ ) قِيلَ مَا هُنَّ يَا رَسُولَ اللَّهِ : قَالَ ( إِذَا لَقِيتَهُ فَسَلِّمْ عَلَيْهِ وَإِذَا دَعَاكَ فَأَجِبْهُ وَإِذَا اسْتَنْصَحَكَ فَانْصَحْ لَهُ وَإِذَا عَطَسَ فَحَمِدَ اللَّهَ فَسَمِّتْهُ وَإِذَا مَرِضَ فَعُدْهُ وَإِذَا مَاتَ فَاتَّبِعْه ) رواه المسلم . قال الشوكاني رحمه الله :  وَالْمُرَادُ بِقَوْلِهِ : ( حَقُّ الْمُسْلِمِ ) أَنَّهُ لَا يَنْبَغِي تَرْكُهُ ،،،، ئیمامی شەوكانی لەم بارەیەوە ئەفەرموێت : هەرگیز نابێ ئەم مافانە پشتی لێ بكرێ ،،! ئاخۆ چەند موسڵمانی ئەهلی مزگەوت لەچواردەرماندا بوونیان هەیە بە هۆكارێكی سادەو بێ ئەرزش‌ نا سڵاو لەیەكتر دەكەین و نا ئامادەشین وتەو ئامۆژگاریەكانی وەربگرین !؟


پرسیاریان كرد لە عبدالله كوڕی مەسعود ، ئێوە چۆن پێشوازیتان لەمانگی ڕەمەزان دەكرد ؟ : سُئل عبدالله بن مسعود ، كیف كنتم تستقبلون رمچان ؟ قال : ما كان أحدًا منا یجرء علی استقبال الهلال وفی قلبه ذرە حقد علی أخیه المسلم ، واتە هیچ یەكێ لەئێمە زاتی ئەوەی نەدەكرد پێشوازی لەمانگی ڕەمەزان بكات و تۆسقاڵێ گەردو نیگەرانی لەدڵیدا هەبێ بەرانبەر بە برا موسڵمانەكەی !! ماوەتەوە بڵیم ئەگەر بەم هەناسەیە بەڕۆژوونەبین و بەم جۆرەش‌ لەماناكانی تێ نەگەین ، ئەوا لەڕۆژی قیامەتدا و لەبەردەم دادگای دادگەریی پەروەردگاردا ڕووبەڕووی لێپەرسینەوەو سەركۆنەی تووند دەبینەوە و ڕەنگە لەزیاندمەندترین كۆمەڵ و دەستەو گروپەكان بین !