هەوڵێكـ بۆ خوێندنەوەی ئەو دیوی پێشنیارەكەی عەدنان عوسمان !

 

... عەدنان عوسمان پەرلەمانتاری خولی پێشووی پەرلەمانی كوردستان و ئەندامی دیارو باڵای سەركردایەتی بزوتنەوەی گۆڕان لە وتارێكدا پێشنیاری ئەوه ‌دەخاتەڕو هەرێمی ( سلێمانی ، كەركوكـ ، هەڵەبجە ) دروست بكرێت ، گوایە بەم هەنگاوە سەقامگیری و ئاشتی و ئارامی سیاسی و كۆمەڵایەتی بەدوایدا دێت و لەوێشەوە دەبێتە هەوێنی دەوڵەتی فیدراڵی كوردستان ! هەر ئەم هاوڕێ عەدنانە لە هەڵوێستیكی چاوەڕوانەكراودا بیرۆكەی پێكهێنانی یەكەی (90)ی كرد بۆ گۆڕان هاوشێوەی یەكەكانی (70 و 80) یەكێتی و پارتی ! ئەگەر چی لەسەردەمی كاری پەرلەمانتاریدا یەكێتی و پارتی بەوە تۆمەتباركرد كە هەردوولا خاوەنی‌ میلیشیای تایبەت بەخۆیانن ! بێ گومان پێشنیاری یەكەی (90) بۆ گۆڕان و جیاكردنەوەی (سلێمانی ، كەركوكـ ، هەڵەبجە) لە هەولێر و دهۆكـ پێشنیاری هەر حزبێكی تر و لەزاری هەر كەسێكی بوایە یەكەمیان بەئەندازیاری شەڕی ناوخۆ و ئەویتر بە دابەشكردن و كەرتكردنی نێوماڵی كورد تۆمەتبار ئەكراو ڕەنگە بڕیاری لەسێدارەدانی بۆ دەركرابا ! بەهەر حاڵ لێرەوە دەچینەوە سەر ناونیشانی وتارەكەو هەنگاوێ لە بزوتنەوەی گۆڕان نزیكـ دەبینەوە :

:
1- ئەم پێشنیارەی هەڵسوڕاوی گۆڕان ئەوەمان پێ دەڵێ كە بزوتنەوەی گۆڕان سەرباری ئیدیعاو دروشمە گەورەكانی كە وەكـ حزبێكی خاوەن پرۆژەو تێڕوانینی ستراتیژی‌ بۆ ئێستا و داهاتووی هەرێمی كوردستان ، وەلێ بەم پێشنیارە ئەم بزوتنەوه چالاكـ و بزێوەی‌ بوارەكانی سیاسی و كۆمەڵایەتی و فیكری و جەماوەری لەحزبێكی گەورەو خاوەن پرۆژەو دیدو تێڕوانینی گشتگیرو هەمەلایەنە بچوكـ دەكاتەوە‌ بۆ حزبێكی ناوچەیی و لە چوغزێكی دیاریكراوو جوگرافیایەكی سنوورداردا دەهێڵێتەوە‌ ، لێرەشدا ئەم خۆبچووكردنەوەو چوون بەیەكدا‌ی گۆڕان بە ڕیشەداكوتان و لەبنەهاتنی پارتی دەكاتە پاساو له ‌ناوچەكانی زۆنی زەرد !

بەداخەوە بیركردنەوەیەكی لەم چەشنە دان پێدانانێكی ئاشكرایە بەبەهێزو دەسەڵاتی ‌پارتی و كشانەوەی گۆڕانە لەبەردەم هەژموونی حزبێكـ كە هەمیشە بەوە دەناسرا ، بە فراوانبوونی مەوداكانی ئازادی و كرانەوه بەڕووی میدیای ئازاد و جێگێربوونی زیاتری پایەكانی دیموكراسی ‌، ئەم حزبە بەحوكمی ئەوەی كاراكتەرو دامەزرێنەرانی سەرەكی لە خێڵ و بنەماڵه سەرچاوەی گرتووە‌‌ پێش ئەوانیتر بەرگە ناگرێ و بەتەختی زەویدا ئەكەوێ !

دیسان بەدیویكی تردا خزمەتێكی باش و بێ تێچوون و سەرئێشە بەبەرنامەو پلان و ئەجیندای پارتی ، كەزیاتر لەجاران پێ ڕابكێشێ و گۆڕەپانەكەی بەتەنها بۆ چوڵ بكرێت !‌ لێرەوە ئەبێ ئەو حەقیقەتە بخرێتە ڕوو كە ئەم بیركردنەوەیە‌ خاڵی جەوهەری و خۆڕاگری و پشوودرێژیی یەكگرتووی ئیسلامیی كوردستانە لەوانیتر ، كە هەمیشە لە هەڵوێست و سیاسەتەكانی ڕابووردوویدا و لە لێدوانی ئەمیندار و سەركردەكانی ئەم حزبە ‌زیاتر لەبۆنەیەكـ جەختیان لەسەركردۆتەوە كە‌ هێشتا ڕێگاكە دوورەو سەرەتای هەنگاوەكانی چاكسازیە لەهەرێمی كوردستان ، ئەمەش بەرەو ئەو قەناعەتمان ئەبات كە بەشێكـ لەدیوی ناوەوەی هەندێ لەسیاسەت و هەڵوێستی حزبەكانی تر ‌بەرانبەر بەهەڵوێستە واقیعی و شێلگیریەكانی یەكگرتوو ، جگە لەموزایەدەی حزبی و خۆڵكردنە چاوی جەماوەر ڕاكردنە بووە لە گۆڕەپانی ململانێ و خۆدزینەوەو گەڕان بووە بەدوای دەرفەت و هەلێكدا تیایدا خۆیان بەسەر لایەكدا ساغبكەنەوەو قەناعەت بەخۆیان بكەن كە چیتر نایانەوێ لەناوچەكانی ژێر دەسەڵاتی پارتی درێژە بەخەباتی مەدەنی بدەن و توانای ڕووبەڕووبونەوەی ئەو هەموو فشارەی پارتی ناگرن ، ڕەنگە ئەمە دەرەنجامی خێرای هەڵوێستی گۆڕان بێ كە جار جار كۆبوونەوەو دیداری وەفدەكانی پارتی ڕەددەكاتەوە ،‌ هەر بۆیە واباشترە‌ زۆنی زەرد بەتاپۆكراوی بۆ پارتی بە جێبێڵن !
:
2- ئەگەر ئەمە تێڕوانین و بیركردنەوەی عەدنان عوسمان بێ وەكـ كەسێكی ڕۆشنبیر و دەستەبژێری نێو بزوتنەوەی گۆڕان ، كەواتە ئەوەش ڕاستە كە ئەم بزوتنەوەیە جۆرێكـ لەئیشكال هەیە لە چۆنیەتی دەستبردن بۆ چارەسەركردنی گرفتەكان و ئیدارەدانی ململانێی و دۆزینەوەی دەرچە بۆ دەربازبوون لە ڕێگرو لەمپەرەكانی بەردەم دروشم و بانگەشەكانی ئەو حزبە ، سادەترین خوێندنەوە بۆ ئەم هەڵوێستە غیابی هەناسەیەكی قووڵ و مەودادرێژە بۆ ناسینی چەمكی چاكسازی و حیساب نەكردن بۆ كات و تێچوونی میكانیزمە‌ گەورەكانی گۆڕانكاری و پێشخستنی پرۆسەی دیموكراسی و بەسیستمكردنی جومگەكانی دەسەڵات و دامو دەزگاكانی حوكمڕانی لەهەرێمێكی وەكـ كوردستان سەرەڕای هەڕەشەو مەترسیەكانی چواردەور هەردوو حزبی دەسەڵاتدار هەنوز بەعەقڵێتی شۆڕشگێڕی و شەرعیەتی شاخ و شار حوكم دەكەن ! ڕەنگە حیساب نەكردن بۆ واقیع و باش نەخوێندنەوەی عەقڵێتی پارتی و كاردانەوەی ئەو حزبە لەهەڵوێستە هەستیارەكاندا پاشخانی ئەم بیركردنەوەیە بێ كە تەواوی كوردستان و بزوتنەوەی گۆڕانی تووشی شۆككرد ، كاتێ بەبڕیارێكی حزبی و بە فەرمانی مەكتەبی سیاسی پارتی ڕێگری كرا لە چوونەوەی سەرۆكی پارلەمان بۆ ناو هۆڵی پارلەمان و پەكخستنی ئەو دەزگا شەرعیەی كە بەدەنگی هاوڵاتیان و لەپرۆسەیەكی هەڵبژاردندا پێكهێنرا ، دواتریش لەهەڵوێستێكی تری هاوشێوەداو وەلێ ئەم جارەیان به ‌فەرمانێكی دووقۆڵی ( حزب و حكومەت ) تیمی وەزاری بزوتنەوەی گۆڕان لەحكومەتی هەرێم كە ژمارەیان پێنج وەزیر بوون مۆڵەتدران و ڕەوانەی‌ ماڵەوە كران !

لەبەرانبەر ئەم دوو هەڵوێسته سەختەی پارتیدا بزوتنەوەی گۆڕان وەكـ لایەنەكانی تر جگە لە دەركردنی ڕاگەیەنراوی ئیدانەو سەركۆنەكردن هیچ كاردانەوەیەكی تری بەدوادا نەهات ! لەئەنجامی ئەو ڕێگریەی پارتی تا ئێستاش شاری هەولێرو زۆنی زەرد قەدەغەیە‌ لەگەشت و سەردانی سەرۆكی پارلەمان و بۆ وەزیرەكانیش هێشتا لەنێوان كشانەوەو مانەوە لەماڵەوە تیاماون و یەكلایی نەكراوەتەوە ! هەروەها بەبڕوای بەندە یەكێكی تر له ‌ئیشكالی گۆڕان بۆ داهاتوو كە ڕووبەڕووی دەبێتەوە ناسنامەی فیكری ئەم حزبەیە ، ئەوەش پاش ئەوەی كە لە كەش و هەوایەكی هێمن و سەقامگیری سیاسی و كۆمەڵایەتی كوردستاندا ، ئەگەر ئەم حزبە گۆنگرە ببەستێ چ جۆرە ناسنامەیەكـ بەخۆی ئەدا ! ئاخۆ حزبێكی عەلمانی ئەبێ بەبەشداری كاراو كاریگەری ئیسلامیەكانی ناو گۆڕان ، یاخود ئیسلامیی ئەبێ بەدەستەی دامەزرێنەرانی عەلمانیەكانی ناو گۆڕان ، یاخود لەسەر چ بنەماو فۆرمێكی ڕۆژهەڵاتی پێڕەوی ناوخۆی ئەو حزبە جارێكی تر شرۆڤە دەكرێت و دادەڕێژرێتەوە !
:
3- ئەگەر ئەم پێشنیارەی عەدنان عوسمان لەهەناوی بەرنامەو بیركردنەوەی خودی گۆڕانەوە هاتبێ و بڕیاری بە هەرێمی بوونی سلێمانی لێ بخاتەوە ، چ گەرەنتیەكـ هەیه بۆ گۆڕان‌ بەوە ڕازی دەبێ كە یەكێتی بۆی دیاری دەكات ، ئاخۆ ئەزموونی پارێزگاری سلێمانی و پشكەكانی گۆڕان لە پارێزگاكانی هەڵەبجەو ئیدارەكانی گەرمیان و ڕاپەڕین دوبارە نابێتەوە ؟! ئاخۆ لەسەر چ بنەماو ڕێكەوتنێكـ ئەتوانن پێكەوە حوكمڕانی ئەم دەڤەرە بكەن ؟ ئایا چارەنووسی ڕێكەوتنەكەی نێوان گۆڕان و یەكێتی بەكوێ دەگات بەئێستاشەوە جگە لەیەكـ خاڵی سەرەتایی تەواوی بەندەكانی ناو ڕیكەوتنەكه وەكـ خۆی ‌بەنووسراوی ماوەتەوە !؟ بێ گومان هەمان پرسیار ڕوو لە ڕێكەوتنە ستراتیژیەكەی نێوان یەكێتی و پارتی دەكات ! ئاخۆ بەچ زمانێكی دیبلۆماسی گۆڕان و یەكێتی ئەتوانن پارتی بەم واقیعه ‌تازەیە قایل‌ بكەن ؟ ئایا بژاردەی دەستبردن بۆ چەكـ و پێكهێنانی یەكەی ( 90 ) نابێتەوە‌ ئەمری واقیع ؟ ڕۆڵی وڵاتانی چواردەور و مامەڵەی ناوەند لەگەڵ ئەم دوو هەرێمە چۆن ئەبێ ؟ چارەنوسی پرسی ڕیفراندۆم و خەونی بەدەوڵەت بوون چی لێدێ ؟ حكومەت و پۆستەكانی ناو حكومەت چۆن دابەش دەكرێت ؟ ئەمانەو وەڵامی چەندین پرسیاری تر لە دووتووێی ڕووداوو پێشهاتەكانی ڕۆژانی داهاتووە ... !