نامەیەكی كراوە بۆ دوو سەرۆكایەتیەكە

 

نامەیەكی كراوە بۆ بەڕێزان :
سەرۆكی هەرێمی كوردستان ، سەرۆكی حكومەتی هەرێم ، وەزیری خوێندنی باڵا
دوای سڵاوو ڕێز بۆ جەنابتان
پێم خۆش بو لە سۆنگەی هەست بە بەرپرسیاریەتیمەوە ئەم نامەیەتان بۆ بنوسم بە هیوای ئەوەی سودێك لە شوێنی خۆیدا بگەیەنێت .
لای جەنابتان شارەوە نیە گرنگی و پێگەی خۆیندن لە ژیانی گەلان و پێشكەوتنیاندا ، هەروەها هیچ ئامانجێك بە بێ بوونی بەرنامە و پرۆژە تەنها لەسەر پەڕە دەمێنێتەوە و لە بازنەیەكی داخراودا ئەو گەلە دەمێنێتەوە .
بۆیە بە بۆنەی كۆتایی هاتنی تاقی كردنەوەكان بەتایبەتی پۆلەكانی (12) و سەرقاڵ بونی خەڵكێكی زۆر بە قوتابی و خانەوادە و ڕاگەیاندنەكانیشەوە بە ئەو كەسانەی كە نمرەی باشیان بە دەست هێناوە , پێم باش بوو چەند بیرو بۆ چونێكم لەلا گەڵاڵە بوە بیخەمە پێش چاوی ئێوەی بەڕێز بە هیوای سوود گەیاندن .
• تاقی كردنەوە بە شێوەیەكی گشتی ویستگەیەكە بۆ جیاكردنەوەی زیرەك و توانای تێ گەشتن و لێ هاتوەكان لە كەسانێكی تر كە ئەو تواناییانەیان نیە , كە ئەمە واتە تاقی كردنەوە تا ئێستا لە هەموو جیهان تەنها ڕێگایە بو ئەم جیا كاریە .
• بە پێی زانیاریەك كە لای بەندەیە ساڵی پار ئەو قوتابیانەی لە پۆلی (12) نمرەكانیان لە سەروی (90) وە بوە ژمارەیان لە سنوری (10000) دە هەزار قوتابی بوە ، ئەم ساڵ پێم وابێت ئەو ژماریە دابەزیبێت بۆ خوار پێنج هەزار قوتابی هێشتا خولی دوەم نەكراوە .
• ئەگەر سەرنج بدەین هەم قوتابیەكان ، هەم خانەوادەكانیان ، هەم بەرنامەو پلانی وەزارەتی خوێندنیش لەسەر ئەو ڕێڕەوە كار دەكەن كە هەرچی قوتابی زیرەكە ، واتە ئەوەی كۆنمرەی لە سەروو 95وە یە بەرەو بە شەكانی پزیشكی بڕۆن و ئیتر بە پێی گرنگی كولیژەكان كۆنمرەكان دادەبەزن .
• پرسیاری گرنگ ئەوەیە حكومەتی هەرێم بۆ هەڵوێستەناكات ( ئایا تا چەند ئەم ڕێڕەوە خزمەت بە داهاتوی گەلێك دەكات كە وازی لە بەرەو چون بەرەو دەوڵەت نەهێناوە هەتا ئەمرێت خەوی پێوە دەبینێت ، یان هەر هیچ نەبێت خۆ ئێستا گەلی كوردستان خاوەنی هەموو ئەو دەزگایانەیە كە حكومەت و دەوڵەتی لێ پێك دێت ؟
• پرسیارەكە كەمێك شیكاری تری بۆ بكەین ، گەلی كورد بۆ چی دەبێت هەرچی توانا تایبەتەكانیەتی بیان بات لە گۆڕستانەكانی پزیشكی و ئەندازیاری بیاننێژێت ؟ ( ئەمە بە مانای كەم كردنەوەی ئەم بەشانە نیە ) ، واتە ئێمە ئێستا بوچی گرنگی نادەین بە بە شێكی وەكو كۆمەڵناسی لە كاتێكا دونیایەك گرفتی كۆمەڵایەتیمان هەیە و نازانین چۆن و لە ژێر سێبەری چ بیردۆزێكدا چارەسەریان بكەین ، دیارە قوتابیەكی توانا كەم بەهۆی كۆنمرەی كەمەوە كە دەچێتە ئەم بەشە دوای چوار ساڵ دەبێتە خاوەنی بڕوانامەیەكی هەڵواسراوو بە بێ ئەوەی بتوانێت بكەوێتە دوای گرفتێك و چارە سەرە كرداریەكان بداتە دەست دەزگا تایبەتەكان ، بەشی كۆمەڵ ناسی ئەگەر پیاوێك وەك ( عەلی وەردی دروست نەكات ) واتە هیچی نەكردوە .
• بەڕێزان لە دوای 30 ساڵ لە حوكم داری و بونی زیاد لە (30) زانكۆ لە كوردستان ناكرێ واقعی كارگێڕیمان هیچ گۆڕانكاریەكی بەخۆیەوە نەدیبێت ، ئەمە ئەگەر هۆكاری زۆر بێت ، یەكێك لە هۆكارە سەرەكیەكان ئەوەیە كە كۆلیژەكانی كارگێڕی كەسە بەتواناكانی بۆ ناچێت ، یانی ئەگەر كەسێك بە كۆنمرەی 90وە بچێت بۆ كۆڵیژی كارگێڕی لەوانەیە بەدەست كۆمەڵگا بێت بیبەن بۆ شێتخانە .
• بۆیە پێویستە ساڵانە ژمارەیەكی باش لەو قوتابیە بە توانایانەی كە لە سەرووی 90 وە نمرە دەهێنن كۆمەڵێك پاڵنەر بەكار بهێنرێت تا نەچن بۆ كۆلیژەكانی پزیشكی و ئەندازیاری ( ئەم جوّرە پیشانە ئەگەر كەمیشمان هەبێت ئەكرێت بەهۆی توانای مادیەوە لە شوێنی تر بیان هێنین و خزمەتی خۆمانیان پێ بكەین ، بەڵام كەس ناتوانێ بێت گرفتی كۆمەڵایەتیمان بۆ دیاری بكات و دراسەی لە سەر بكات ئەگەر خۆی بەشێك نەبێت لەوكۆمەڵگایە .
• دیاری كردنی ئەو كۆلیژانەی یارمەتیمان دەدەن بۆ زاڵ بوون بە سەر گرفتە كۆمەڵایەتی و كارگێریەكاندا .
• هەر قوتابیەك بە كۆنمرەی 90 بەرەو ژوور بچێت لە ڕوی مادی و مەعنەویەوە یارمەتی بدرێت .
• هەر بانكێكی ئەهلی یان كەرتی تایبەت پێویستە چەند قوتابیەكی لەو زیرەكانە بگرێتە خۆی كاتێ دەچن خوێندنی زانستی بەنكەكان دەخوێنن و پاشان یارمەتیان بدەن بۆ خوێندنی دوای زانكۆ و لەهەمان بانك یان كەرت خزمەت بكەن لە بەرامبەردا حكومەت بە ڕێژەیەك لە باجی ساڵانە یان خۆش بێت .
• كۆبونەوەیەكی جدی بكرێت بە سەر پەرشتی وەزیری خوێندنی باڵا و پەروەردە بۆ كەڵك وەرگرتنی كۆلیژەكانی ( زانستە مرۆڤایەتیەكان ) لە نمرەكانی سەروو 90. شاد بن


ئەركان رەشید / راوێژكار لە دەستەی راویژكاریی ئەنجومەنی وەزیران/ عیراق