یەكڕیزی ئیسلامیەكان لەنێوان پێویستی قۆناغەكەو موزایەدەی سیاسی ‌.!

 

... بەحوكمی ئەوەی گەلی كورد بەدرێژایی سەدساڵی ڕابووردوو بەتایبەتی پاش جەنگی جیهانی یەكەم و دواتریش كەوتن و ڕوخانی دەوڵەتی عوسمانی و لێكـ هەڵوەشانەوەی سنورو قەڵەمڕەوی خەلافەتی عوسمانیەكان ، كورد دەربەدەرو ئاوارەی وەڵات و خاكـ و نیشتمانی خۆی بووە ، دیسان بەهۆی ستەمی وەڵاتانی جیهان و دابەشكردنەوەی بەسەر چوار وەڵاتی ( ئێران ، عێراق ، سوریا ، توركیا ) و چەوساندنەوەو قڕكردن و دامركاندنەوەی شۆڕش و ڕاپەڕین و جوڵانەوە سیاسی و كۆمەڵایەتیەكەی بەدرێژایی مێژوو بوەتە بەشێكـ لەناسنامەو ناسینەوەی گەلی كورد ، لە ڕابووردوودشدا ناكۆكی و ململانێی نێوان خێڵ و میرنشین و هۆزەكانی گەلەكەمان هۆكارێكی تر بووه كە میللەتی كورد و كێشە ڕەواكەی نەگەنە خەونی سەربەخۆیی و دروستبوونی دەوڵەتی كوردی و قەوارەیەكی سیاسی !

لەئێستاشدا سەرباری هەبوونی جۆرێكـ لەسەرەوەری و خاوەن بڕیاری سیاسی ، وەلێ بەهۆی حكومەتێكی بێ ئەركـ و وەزیفەو پەرلەمانێكی پەكخراوو دەیان كێشەو گرفتی نێوان لایەنە سیاسیەكان و ناوخۆی خودی حزبەكان نەكـ نەیتوانیوە پرسە نەتەوەیەكە هەنگاوێ بەرەو پێشەوە بەرێت بەڵكو بەهۆی كێشەی شەخصی و حزبی و بنەماڵەو باڵباڵینەوە زۆر جار مەترسی ئەوە دەكرێ ئەوەش كە هەیە لەدەستی بدەین ، هەر بۆیە ئەركی ئیسلامیەكان چووەتە قۆناغێكی ترەوەو هێندەی تر بەرپرسیارێتیەكەی قورستركردوە ! واتە لەئێستادا خەونی زۆرینەی میللەتی كورد بەهەموو پێكهاتەكانیەوە ئەوەندی لەخەمی ژیانێكی ئاسایی و بژێوی ڕۆژانەو دابینكردنی ئاشتی وسەقامگیری سیاسی و ئاشتەوایی كۆمەڵایەتیە ، ئەوەندە كەیفی بە دروشم و ناونیشان و پێڕەو پرۆگرامی حزبی و هەڵوێستی ڕۆژانەی حزبەكان نین ! لێرەوە دوور لە ڕۆشنایی بنەما شەرعیەكان و خواست و خەون و پەرۆشی تەواوی موسڵمانان بۆ یەكدەنگی و یەكبوونی ئیسلامیەكان ، لە ئێستادا چ پاڵنەرێكـ بوەتە ئەمرای واقیع نزیكبوونەوەو یەكڕیزی ئیسلامیەكان بەكردەیی بكات ، بەندە ئاماژە بەبەشێكـ لەو پاڵنەرانە دەكەین :


1- ئەگەر لەسەرەتای بانگەوازی ئیسلامیدا مشت و مڕی گەرم و گوڕی جێاوازیەكانی نێوان ئیسلامیەكان لەسەر دارولئیسلام و دارولكوفر و مۆسیقاو هەڵبژاردن و پەرلەمان و چەكـ و جیهاد و وەلائو بەڕا بۆ بیروڕاوو ئایدۆلۆژی نائیسلامیی وچوونە ناو حكومەتێكی زۆرینەی عەلمانی و هاوبەشی لە ئیدارەو دەسەڵاتدا و هاوپەیمانێتی لەگەڵ لایەنێكی عەلمانی و بوون و ئامادەیی خوشكان لە نێو كاروباری‌ سیاسی و لەناوەندی بڕیاری سیاسەتی حزبدا ... هتد ئیشكال و ناحاڵیەكـ بووبێ ! خۆ ئێستا سوپاس بۆ خوای گەورە ئەوەندە لەیەكەوە نزیكین و لەیەكـ ئەچین هەست بەجێاوازی و جیاكاری ناكری ! تەنانەت ئەوەش بووەتە بەشێكـ لەحەقیقەتی حاڵ لەئەمڕۆدا ئیسلامیەكان بەسەر لایەنەكاندا دابەش و ئاماژە بۆكراون ! ئەم هەستكردنە بەخاڵەكانی لێكچوون و ڕەنگگرتنی یەكتر و زیادكردن ڕەددەكاتەوە نەكـ قسەی دەرەوەی ئیسلامیەكان بێ یاخود ڕەخنەگرێكی نەیار بەئیسلام و موسڵمانان بەڵكو بۆخۆشمان جار جار ئەو قەناعەتە دروستبووە لامان ، ئەپرسین ئەگەر بۆ دەسەڵات و زیاتر لە كورسیەكـ نیە دەی بۆچی یەكڕیزو یەكـ لیست نەبین !؟

2- هەتا ئیستا بە هەموو ئەزمونەكانی ڕابووردوومان بەچەكـ و بێ چەكی و بەبەشداری و دوورەپەرێزی و باوەڕبوونمان بە‌ پرۆسەی سیاسی و قۆستنەوەی هەل و دەرفەت و بەرزكردنەوەی دروشمی گەورەی ئاینی و نیشتیمانی وبەكارهێنانی ڕەمزو سەرمایەی ‌ئەخلاق و بەهای كوردەواری و پەرۆشی و دڵسۆزیمان بۆ نەتەوەو گرێدانی ئاین و ئیسلامەتی بەنیشتمان و كوردایەتی .. هتد ، سەلەمێنراوە كە تەواوی دەنگدەرانی ئیسلامیەكان لە 15% ی كۆی دانیشتوانی كوردستان تێناپەڕێنێت‌‌ ! واتە پێكەوە و لەیەكـ سەبەتەدا ئەوە سەنگـ و قەبارەو پێگەی ڕاستەقینەی ئیسلامیەكانە ! ئەمە لەكاتێكدا لەهیچ خول و كابینەیەكی حكومەتدا نەمانتوانیوە ئەزموونێكی وەهای سەركەوتوو پێشكەش بكەین ببێتە هاندەرێكی باشتر و دڵخۆشكەر جەماوەرو دەنگدەرێكی زیاتری كورد لەخۆمان كۆبكەینەوە !

3- بەگەڕان وپشكنینێكی خێرا بە مێژووی خەباتی ئیسلامیەكان لە دەرەوە‌ی وەڵات و ناوخۆی كوردستاندا وەكـ ئەزموونێكی بەردەست و نمونەیەكی بەرجەستەی هاوچارەنووسی عەلمانی و حزبەكانی دەرەوەی بازنە ئەخلاقیەكەی ئیسلامیەكان بۆ سیاسەت و حزبایەتیكردن ، جگە لە ئەزموونی بزوتنەوەی نەهزەی ئیسلامیی لە وەڵاتی تونس نمونەیەكی تر نیە چاوی لێبكرێ ! بەڵكو بەپێچەوانەوە دەركەوتووە هاوپەیمانێتی و هاولیستی و گرێدانی دروشم و بەرنامەی هەڵبژاردنەكانی هەردوولا بۆ گرتنەدەستی جڵەوی دەسەڵات و حوكمڕانی هەتا بەردەم سندوقەكانی دەنگدان بووەو نەبوەتە شەفاعەت و تكاركار بۆ ئەوەی ئیسلامیەكان هێندەی عەلمانیەكان سوودمەندبن لێی ، وەكـ لە میسر و لیبیا و یەمەن و سوریا تەنانەت ئەردەن ، لە كوردستاندا لیستی كوردستانی ئەگەر بەنمونە بهێنینەوە ئەو كاتەی یەكگرتوو لەناو لیستی كوردستانی بوو ، لێدوانی عەلمانیەكان بۆ ناساندنی یەكگرتوو بریتی بوو لە دوورە لەتیرۆرو دەستی سوور نیە بەخوێنی ڕۆڵەكانی گەلەكەمان ، تەواو مەدەنی و ئاشتیخوازی نیشتمان و نەتەوه پەروەرە ! وەلێ بۆ خولێكی تر بڕیاری لیستی سەربەخۆو بەتەنها ئەدا كەچی تۆمەتباركرا بە بەعسی و عەرەبچێتی و خۆفرۆش و بێگانە پەرست ! بەداخەوە ئەوەندە پرپاگەندەو چەواشەكاری بەڕیوەچوو تەواوی بارەگاكان لە بادینان سوتێنراو و چوار سەركردەی مەیدانی شەهید بوون ! دواجاریش تەنها وەزیرێكـ پشكی یەكگرتوو بوو لە بەغدا درا بەبرا عەرەبەكان و كۆنە بەعسیەكانی دوێنێ !

4- دۆخی ئێستای سیاسەتی نێودەوڵەتی و جموو جووڵ و چالاكی ڕێكخراوە گوماناویەكان كە لەژێر پەردەی ئاینی پیرۆزی ئیسلامدا بۆ ناشیرینكردنی ئیسلام و مێژووی موسڵمانان داهێنراون ، لەولاشەوە ململانێی نێوان وەڵاتان و پیلانی ناوخۆی دیكتاتۆرو دەسەڵاتە لەرزۆكەكانی جیهانی بەناو عەرەبی و تێكچوونی شیرازەی كۆمەڵ و كۆمەڵگاكان و ڕەوەو چاولێگەری و لاساییكردنەوەی كوێرانە و خۆداڕنین لەهەموو بەهاو ئاكارێكی جوانی كەسێتی تاكی موسڵمان و ڕۆژهەڵاتی ، پێكەوە لەیەكـ بازنەو ئەڵقەیەكی داخراودا بوەتە مەترسی و هەڕەشەی جیددی لەسەر ئیسلام وەكـ ئاین و ئیسلامیەكان وەكـ تاكێكی خاوەن پەیام ، وەكـ ئەبینرێ كۆمەڵی برایانی موسڵمانان ( الاخوان المسلمین ) سەرباری خەباتێكی دوورو درێژی كاری مەدەنی و خزمەت و بەدەمەوەبوونی گەل و نیشتمان و پارێزەری ئەخلاق و بیروباوەڕی موسڵمانان و خۆبواردان لەفیكری پەڕگیری و توندڕەوی ، كەچی ئەكرێتە ئامانج و بەرگی تیرۆرو تەقاندنەوەی بەسەرا ئەسەپێنن ! جا ئەگەر حزبێكـ بۆ خۆی پێشینەیەكی توندڕەوی و چەكداری هەبێ و بەشداری لە جەنگـ و شەڕی ناوخۆدا كردبێ ئاخۆ چارەنووس و دواڕۆژی ئەو بەكوێ دەگا !؟ هەربۆیە ئەگەر پێكەوە خوێنمان حەڵاڵكراو ڕژایە سەرزەوی ئەوا لەیەك بەرەو یەك لیست ویەك ناونیشان بین سەربەرزو شەرەفمەندانەترە لەوەی لەدوورەوە تەماشاكارو شاهیدی مردنی یەكتربین ! ئەوەش مەعلومە ژیانی ئەم دونیایە وەكـ وتراوە - چەند پێچێكی مێزەرە - جیلی یەكەم و دووەمی ئەم ڕابوونە لەئاخروئۆخری كۆتا پێچەكەیەو خەمی نەوەكانی داهاتووی ئەم گەلە لەبەرچاوبگرین !؟