... بۆ ئەوەی لەناونیشانەكەی بگەین وا پێویستە پیناسە بكرێ و بزانین مێگەلی بەمانای چی و بۆچی هاتووە ؟ لە فەرهەنگەكانی زمانی عەرەبیدا لەبەرانبەر مێگەلی وشەی ( القگیع*) دانراوە بەواتای كۆمەڵی لە ئاژەڵی پەلەور كە لەلایان شوان یان ئەو كەسەی بەخێویان دەكا و بەرپرسە لەئاراستكردن وبەڕێكردنیان ، یاخود بەمانای كۆبوونەوەی بەشێكی زۆر لەئاژەڵ له یەكـ شوێندا یان پێكەوە بەڕێكەوتوون ! دیسان گردبوونەوەی كۆمەڵێ لە خەڵكی هاوشێوەی ئاژەڵ لەڕووی ڕێكخستن و بەڕێكردن و ئاراستەكردنیان ! بەكورتی و بەپوختی میگەلی بریتیە لە : كۆمەڵێ لە ئاژەڵ بەهەموو جۆرەكانیەوە كە لەلایان شوان یان كەسێكـ بەرپرسیارە لە سەرپەرشتیكردن یان ئاراستەكردن یاخود كۆكردنەوەیان لە شوێنێكی دیاریكراو و بۆ ئامانج و مەبەستێكی دیار !

لێرەوە ئەمەوێ سەرنجتان بۆ ئەوە ڕابكێشم كە ئاخۆ ئێمەی خوێنەوارو سەردەرچووی كۆمەڵ و تا ڕادەیەكـ بەشێكی زۆر لە كۆمەڵگای كوردەواریمان لەكوێی پێناس و پێناسەی ڕاست و دروست بەخۆمانین ؟ ئاخۆ هەر بەجیاكردنەوەی هێڵی ڕەش لەسپی و نووسین و خوێندنەوەو ستایلی جل و بەرگـ و پۆشاكـ و وتنی چەند وشەیەكـ ڕەنگە ئەوەندەی ڕاهاتووین لەوتنی و دووبارەكردنەوەی كەمتر لەماناو مەبەستەكانی گەیشتوون ئیدی جێاوازی و جێاكاریەكی ئەوتۆ هاتوەتە بوون بەئاسانی منی ئێستای دوورەپەرێزو جێاواز لە ئەویتری ئەوسای خۆماڵی دیارو ئاماژە بۆ كراوبین ؟ 

ئەوترێ جاران خەمەكان بچووكبوون خەونەكان زۆر بچووكتر ، مامەڵەو ئاڵوێر لە سنوڕێكی كەم و مەودایەكی دیاریكراودا ئەخولایەوە و تازەو كۆنەی پێ ئەكرا ! ئەوترێ پێش هاتنی سۆشیال میدیا یان تۆڕی كۆمەڵایەتی فەیسبوكـ هەموو خێزانیكـ لە گەل سەردەم و بارودۆخی خۆیدا دەژیا ، دەوڵەمەندەكان لەناو نازو پڕ لە نبعمەتی هەمەچەشنەدا ژیانیان دەگوزەراند ، ماڵە هەژارو گەڕەكە هەژارنیشینەكان سكی خۆیان دەگوشا و ئەوەی بەردەست و ئاسان وكەمترین تێچووی مادی و كاتی ئامادەكردنی پێویستبا ئەوەیان دەپۆشی و دەیانخوارد و دەیانخواردەوە ، دواتر هەر لەو ‌شوێنەی كە شوێنی نانخواردن و پێشوازی و پشوودان بوو بێ ئەركی زیاتر و زۆر لەخۆكردن پاڵیان لێ ئەدایەوەو بێ خەم لەخەوی قووڵی خۆیاندا لەگەل خەون و ئاواتە سادەو ساكارەكانیان دەست لەملانی یەكتر یاریان دەكرد ! بەمانایەكی تر خواردن و خواردنەوەكان گازی و پڕ لەپرۆتین و چەوری نە‌بووە هەتا ببێتە مایەی هەناسە سواری و خەو لێ توۆران و زوو بەخەبەر هاتنەوەو هەستان لەخەوو دانیشتن وەدیار ئازاری جەستەو فشاری دەروونی و دواجاریش دەركەوتنی نیشانەكانی نەخۆشی و كەوتن و ڕاكشانی ناچاری ! وەلێ دوای هاتنی سوشیال میدیا ئیدی سەرپەشتیاری خێزانە هەژارەكان ئەو ئازادی و سەربەستیەی جارانی نەما و كەوتە ژێر فشاری پێوەرو پێودانگە تازەكانی ژیان و بازاڕی بەناو ئازادی بازرگانی تێكەڵ بە سیاسەت و ڕێكلامی كەناڵ و ترش و خوێكردن و ڕازاندنەوەی كە لەلایان خەڵكانێكی بەئەزموون لە سەرنج ڕاكێشان و پیشاندانی لە سایت و پەیجەكانی تۆڕی كۆمەڵایەتی لە فەیسبوكـ و تویتەرو ئینستگرام و سناپ و چاتەوە ئاراستە دەكرێن و هەر ئەوانیش ڕەوتی ئاراستەكان دەگۆڕن كە لە ئێستادا یان لەچ وەرزو بۆ چ بۆنەیەكـ جۆر و شێوازی خواردن و خواردنەوەو جل و بەرگـ و كاڵاو تەنانەت شتومەكەكانی ناوماڵیش دیاریدەكەن !؟ 

ئیدی لێرەوە سەرپەرشیاری هەژار بەبێ ویست و ئارەزووی خۆی ڕووبەڕووی دووڕیانێكی سەخت و دژوار دەبێتەوە ! ئەگەر لەگەڵیدا دەڕوات و هاوشێوەی ڕۆژو و اقیعی باو مامەڵەو كڕیار دەبێت ، بێ گومان خۆی لە قەرزداری نگرۆ دەكات و وون ئەبێ ، خۆ ئەگەر لەئاستیدا بێ دەنگی هەڵبژاردو پشتی لێكرد ئەوا ڕوانین و چاوتێبڕینی مناڵەكانی دەیكوژێت و لەناخەوە بێ دووكەڵ و هەستكردن بەقرچەی برینەكانی ئەسوتێ ! بەداخەوە ئەمە گرفتێكی ڕاستەقینەو واقعێكی تاڵەو ڕۆژ لە دوای ڕۆژ گەورە دەبێ و پەرەدەسێنێ ، كارەساتی گەورە لەوەدایە بۆ هیچ كەسێكـ نیە گرنگی و بایەخی پێ بدا و ببێتە بەشێكـ لە چارەسەر یاخود كار بۆ كەمكردنەوەی ئاسەوارو لێكەوتەكانی ئەم تارمایە بكات ! چونكە ئیدی ئەوە بەسەرچووە كە تاكـ بەپێی خواست و توانا ماددیەكانی خۆی بتوانێ لایەنەكانی خەرجی خێزان و ماڵەوە دیاری بكات ! بەڵكو هەمووان وەكـ مێگەلیان لێهاتووەو بەدوای یەكتریدا كەوتوون وچاولێگەری ئاسا تەسلیم بەو ئاراستەیە بوون كە هەمووان پێكەوە ڕێگا دەپێوون و دەڕۆن ! تەنها گوێبستی ئەوانە دەبن كە پێان دەڵێن جل و بەرگەكانت لێرە بكڕە و لە چێشتخانەی فڵان نانی ئێوارە نۆش بكە ! فڵان هەرزانە بازاڕ لێرەیە‌و بۆ تۆی هاوڵاتی و بەنرخێكی گونجاو بۆ خزمەتی ئێوە دابینكراوە‌ !؟ بەداخەوە ئەم گرفتە سەرباری بەردەوامی و گەورەبوونی تەنها یەكـ چارەسەر لەبەردەمدا هەیە و زۆر ئاسانە و قابیلی جێبەجێكردنە ئەوەش بەسەرلەنوێ دروستكردنەوەی پردی متمانە بەخۆ دەبێ بەداڕشتنەوەی جارێكی تری خود دەست پێدەكات ، واتە ئەوە دەپۆشم كە من بۆ خۆم بەجوانی ئەبینم ! ئەوەش دەخۆم و دەخۆمەوە كە بەلای منەوە بەتامەو چێژی لێدەبینم ! ئەوەش بژاردەو دیاری منە كە بەلای منەوە جوانەو هەر ئەمەشە ماڵەكەم دەڕازێنێتەوە .. هتد ! ئەگەر گەیشتینە ئەم قەناعەتەو كارمان پێكرد ئیدی وادیارە ئەتوانین لە ڕیزی مێگەلی بێینە‌ دەرەوە و بۆ كۆتاجار پشتیان لێ بكەین و لێگەڕین بۆ خۆیان با بەتەنها بەردەوام بن !
:
*. بیرۆكەی ئەم وتارە لەوتارێكی كورتی عبدالله النعیمی ئیماراتی هاتووە لەتویتەر بەناوی (الخروج من القطیع) بەڵام بەدەستكاری و دەوڵەمەندكردنیەوە !