مەریەم ... (هاوناز)ـە بێ نازەكەی هەڵەبجە ..!

 

دۆسیەی مناڵە وونبووەكانی هەڵەبجە و هەوڵەكان بۆ دۆزینەوە و گەڕاندنەوەیان بۆ زێدی خۆیان و بۆناو باوەشی خێزان و كەس و كاریان، لەو دۆسیە هەستیار و ناسكانەیە كە خوازیاری وردەكاری و بەرنامەڕێژییەكی زانستی و عەقڵانیە، و بەهەمەجی و سۆزكاری و بە سیاسی كردن و بازاڕگەرمكردنی حیزبی و ئیعلامیدۆسیەكە زایە دەبێت و دەرەنجامی دڵخۆشكەری نابێت.

ئەو پرۆسەیە لەیەك كاتدا لەچەند ڕەهەند و ڕوویەكەوە ئیشی جددی گەرەكە، هەر لەلایەنی پەیوەندی نێوەدەوڵەتی و دبلۆماسیەوە تا دەگاتە ڕێكاری یاسایی و پزیشكی ورد ، لەوێشەوە بۆ ڕێوشوێنە ئیداری و حكومیەكان ، ئەمانە و جگە لە ڕەچاوكردنی پلان و بەرنامەی كۆمەڵایەتی و دەرونی تایبەت بۆ كەسە وونبوەكە و بۆ خێزانە چاوەڕوانەكەشی ، چونكە دوای زیاتر لە چارەكە سەدەیەك لە دابڕان و وون بوون و هێنانەوەی كوڕێك یان كچێك و تێكەڵكردنەوەی بە خێزانەكەی كارێكی هەروا سانا و ئاسان نیە و دنیایەك لێكەوتەی دەرونی و كۆمەڵایەتی و یاسایی و دارایی لێ دەكەوێتەوە ..ئەوەتا چیرۆكی تراژیدیای مەریەم لە دوای دۆزینەوەی كۆتایی نایەت بەڵكو دوای دۆزینەوەی و شادبونەوە بە خێزانەكەیچیرۆكەكە تراژیدی تر دەبێت بەتایبەت دوای ڕاگەیاندنی پشكنینی دی ئێن ئەی و دواتر ڕەت كردنەوەی ئەنجامەكەی ..!


دۆزینەوەی (مەریەم-هاوناز) لەو كەیسانە بوو كەدنیایەك ئاڵۆزی و دۆخی ناخۆش و كێشەی كۆمەڵایەتی و ئیداری و گرفتی ناسنامەی لێكەوتەوە ، بەداخەوە ئەو كەیسە هەر لەسەرەتاوە لەبری ئەوەی وەك كەیسێكی پیرۆز و هەستیاری مرۆیی تەماشا بكرێت و ئەخلاقیانە مامەڵەی لەگەڵ بكرێت، كرا بە ماددەیەكی ئیعلامی و زیاتر بازاڕی پێ گەرم كرا و و ڕیكلامی پێوەكرا و سیاسێنرا، بەجۆرێك وردەكاری و دەرهاویشتە و لێكەوتنەكانی ئەو كەیسە ڕەچاو نەكرا تا كار گەیشتە ئەوەی دوای نزیكەی دووساڵبابەتی ناسنامەی مەریەم بچێتە دادگا و بە بڕیاری دادوەر لێی بسەندرێتەوە.!


(مەریەم) تەنها ناوی كەسێك نیە ، بەڵكو بەتەنها خۆی شارێكە، بۆیە بێ باكی و لاموبالاتی دەسەڵات و لایەنی پەیوەندیدار لەمەڕ ئەو كەیسە و دەرك نەكردنی ئەو حاڵە ئاڵۆزە دەرونی و ڕۆحیەی مەریەم هەیەتی، كە بەتەواوی تووشی نائومێدی و بێ هیوایی و خەمۆكی كردووە، هیچی كەمتر نیە و بگرە زیاترە لەخودی وون بوونەكە و لەو كارەساتەی بووە هۆكاری وونبونی مەریەم لەسەرەتاوە كە خودی كیمیابارانەكە بوو ، ئاخر ئەنجامدەری كیمیاباران لەنەتەوەیەكی جیا و خاوەن زمانێكی جیاواز بوو و كە بەمانای كەلیمە دژی كورد بوو ، بەڵام ئەم تاوانە كە دەرهەق بە مەریەم (هەڵەبجە) دەكرێت لەلایەن دەسەڵاتی خۆماڵی كورد و بەزمانی كوردییەوە دەكرێت .


جیاوازییەكی دیكە ئەوەیە لەكاتی كیمیابارانی ساڵی (1988)دا زۆربەی گەلانی ناوچەكە و دنیا بەداخ و حەسرەتەوە بوون و هاوخەم و هاوسۆزمان بوون و فرمێسكی خەمبارییان بۆ شەهید و قوربانی و ئاوارەكانمان ڕشت ، بەڵام ئێستا و لەم تاوانەی بەرامبەر مەریەم كراوە ئەوەی ئاگادار بێت و زانیاری هەبێت لەسەر وردەكارییەكانی بێگومان تفو لەعنەت دەنێرێت بۆ سەبەبكارانی و سەرزەنشت و لۆمەی ئەو كەسانە دەكات ئەگەر بە نوكە قەڵەم و لەتە قسەیەكیش بێت بەشداربووبن لە هێنانە كایەی ئەم حاڵەتە نەخوازراوەدا .


دەبوو ڕێكخراوەكانی كۆمەڵگەی مەدەنی و خەڵكی سەربەرزی هەڵەبجە لەئاست بەسیاسی كردنی ئەو كەیسە و ئەو بێ حورمەتیە بێ دەنگ نەبونانە و فشاری جددیان بخستایەتە سەر لایەنی پەیوەندیدار بۆ چارەسەركردنێكی یاسایی و ئاسایی ئەو مەلەفە، دەبوو بە بەرزكردنەوەی سكاڵا و گەیاندنی بە داواكاری گشتی نەوەستانایە، بەڵكو بە خۆپیشاندان و ڕێپێوانێكی هێمنانە هاوسۆزی و هاوخەمی خۆیان بۆ مەریەم و هەموو لایەك نیشان بدایە، مەریەمێك كە نیگەرانی و خەم و شۆكبونەكەی گەیشتۆتە ئاستێك كە بڵێت : دەگەڕێمەوە ئێران و ئاگام لە دایكە فارسەكەم دەبێت .!!


لەكۆتاییدا دەڵێم جێی خۆیەتی تەنها بۆخۆی و تایبەت بەخۆی مۆنۆمێنتێك یان لانیكەم پەیكەرێكی شایستە بۆ مەریەم دروست بكرێت ، تا خۆشمان و نەوەكانی داهاتووش لەئاست ئەو بێ موبالاتی و بێ ئیحساسی و ناجوامێرییەی بەرامبەر بەو كچە بێ نازە ئەنجام درا بێ خەبەر نەبن و بۆئەوەی نەوە دوای نەوە لەو مۆنۆمێنتەدا یان لەبەردەم ئەو پەیكەرەدا دەست بەسنگەوە بگرن و داوای لێبوردنی لێ بكەن .