بۆچی داعش لە بۆرما بوونی نیە !؟

... لەم ڕۆژانەدا و به ‌بەرچاوی كۆمەڵگای نێودەوڵەتی و كەمتەرخەمی و بێ باكی زلهێزانی جیهان و هەست نەكردن بەبەرپرسیارێتی ئیمانی و ئەخلاقی دەسەڵاتدارانی جیهانی ئیسلامیی و ڕێكخراوەكانی كۆمەڵی مەدەنی و بانگەشەكارانی دیموكراسی و دروشمە بێ ناوو ناوەڕۆكەكانی ئازادی و یەكسانی ! جارێكی دڕندەكانی سوپاو سەربازانی میانمار قەتڵوعامێكی تریان بەرانبەر موسڵمانانی كەمینەی ڕۆهینگا لە میانمار دا بەرپاكرد ، كە بەهۆیەوە جگە لە سوتاندنی ماڵوحاڵی موسڵمانان و دەربەردەركردن و ئاوارەیی سنورەكانی وەڵاتی بەنگلڵادیش وەكـ لە سەرچاوەكان هەواڵدا ڕاگەیەنرا لە چەند ڕۆژی ڕابووردوو دوو بۆ سێ هەزار موسڵمان كوژراون و ژمارەی ئاوارەبوون و هەڵهاتنی دانیشتوانەكەی هەتا دێ ڕووی لە هەڵكشانە ! هەربۆیە بەشێكـ لەدانیشتوانی موسڵمانانی كوردستان بۆ دەبڕینی هاوسۆزی و بەشێكی تری وەكـ نیشانەی پرسیارو ئەویتری بەمەبەستی سیاسی ئەو پرسیارە دەوروژێنن كە ئاخۆ بۆچی داعش و هاوشێوەكانی بەهانای موسڵمانانی بۆرما ناچن ؟ لێرەوە بەندە وەكـ هەوڵێكـی سەرەتا لەڕیگەی شیتەڵكردنەوەی هاتنی داعش و ئەركـ و ئامانجەكان بەدەستهاتووەكانی ئەم ڕێكخراوە لەئەرزی واقیعدا ئەمەوێ وەڵامی‌ بەشێكـ لەم پرسیارە بدەینەوە ! هەر بۆیە بۆ وەڵامی ئەم پرسیارانە‌و بۆ گەیشتن بە حەقیقەتی بابەتەكە زۆر ئەستەمە ئەگەر نەگەڕینەوە بۆ مێژووی دروستبوونی داعش و ئەو قۆناغ و ڕووداوانەی كە یارمەتیدرو ژینگەیەكی لەباربوون بۆ هەڵتۆقین و ڕاگەیاندنی ڕێكخراوی ناوبراو .


وەكـ مەعلومی هەمووانە مێژوو و سەرەتای هاتنی داعش دەگەڕیتەوە بۆ ‌ساڵی 2004 ئەو كات لەسەر دەستی ( ئەبی موصعەبی زەرقاوی و بەناوی جماعە التوحید والجهاد ) ڕاگەیەنرا ، وەلێ پاش بەیعەتدان بە ئوسامە بن لادن ناوەكەی گۆڕدرا بۆ ( القاعدە فی بلاد الرافدین ) ! دواتر و بەكوشتنی زەرقاوی و بڕینی چەند قۆناغێكی تر لەناو سەرپەرشتیكردنی ڕێكخراوەكە لە مانگی نیسانی ساڵی 2013 بەتۆبزی و لە ڕاگەیەنراودا ئەبوبكر بەغدادی تێكەڵابوونی ئەم ڕێكخراوەی لەگەڵ جبهە النصرە دا ڕایگەیاند بەناوی ( الدولە الاسلامیە فی العراق و الشام ) ئەگەرچی ئەمەی دوایی هەر لەو سەرەتاوە ڕەددیكردەوە كە تێكەڵ بە بەڕێكخراوەكەی بەغدادی بووبێ ، وەلێ ئەبوبكر بەغدادی بەبێ گوێدانە ڕەددكردنەوەی سەركردەكانی النصرە و ئەیمەن الزواهری ئەمیری القاعیدە هەر سووربوو لەسەر ڕاگەیەنراوەكەی و بەردەوام بوو ! ئەو مێژووەی كە داعشی تیا‌ ‌لەدایكـ بوو ڕێكـ لە گەرمەی ڕاپەڕێنی گەلانی سوریا و لاوازبوونی ڕژێمی ئەسەد بوو لەسوریا !

زۆرێكـ لەچاودێران لەو كاتەدا لەوباوەرەدا بوون بەهاتنی داعش ئیدی ڕژێمی ئەسەد ئەڕووخێ و چارەنووسی ئەویش هاوشێوەی كەوتن و لەناوچوونی دیكتاتۆرەكانی ناوچەكە دەبێ ! وەلێ نەكـ ئەمەی پێشبینی بۆدەكرا ڕووی نەدا بەڵكو بەپێچەوانەوە ناكۆكی و ململانێ كەوتە ناو ڕیزەكانی پۆپۆزسیۆن و جار جارەش لەبری شەڕ لەگەڵ سوپای داڕووخاو لاوازی ڕژێمی ئەسەددا بەردەبوونە گیانی یەكتر و بەخۆیانەوە سەرقاڵ دەبوون !؟
بەهەموو پێوەرو لێكدانەوەیەكـ داعش بۆ بەرگری و پاڵپشتیكردن لە سوننە هاتبوو ، لەوێشەوە بۆ دژایەتی مەزهەبی شیعەو ڕوخاندنی ڕژێمی سوریا و لەسێدارەدانی ‌ بەشار ئەسەدو سەركردەكانی تری حكومەتە ستەمكارەی ئەو وەڵاتە ! وەلێ ئەگەر تۆزێكـ لەئەركـ و ئامانجە بەدەستهاتووەكانی داعش وردببینەوە تێدەگەین جگە لەماڵوێران و كاولكردن و ئاوارەبوونی سوونەكان بۆ وڵاتانی بیانی و هەڵهاتن لە شارو زێدی باوباپیران و لەناوچوون وهەڵوەشانەوەو لاوازبوونی گروپ و حزبە سووننیەكان نەبێ هیچی تری بەدوادا نەهات ! لەبەرامبەریشدا بەشار ئەسەد وڕژێمەكەی وەكـ خۆیان مانەوەو نەڕووخا !


هەرچی دەبارەی داعشە لەعێراق سەرەتا بۆ زەمینه ‌خۆشكردنی هاتنی داعش و بەهێزبوونی ئەم ڕێكخراوە تیرۆریستیە بەپلەبەندی كار لەسەر لاوازكردن و هەڵوەشانەوەی سوپای عێراق كرا و بەجۆرێكـ پەراوێخرا تەنانەت توانای فەرمان و جوڵانەوەو جوڵە پێكردنی هیچ یەكەیەكی سەربازی نەما ! ئیدی بەم جۆرە سوپای عێراق كە لەسەردەمی ڕژێمی لەناوچووی بەعسدا بە بەپلەی پێنجم دەهات لە ئاستی جیهاندا متمانەی لەدەستداو وردە وردە سەربازو ئەفسەرەكانی لەڕیزەكانی سووپادا هەڵدەهاتن و سوپای نیزامی و فەرمی دەوڵەتیان بەجێهێشت ! هەموو ئەمەش بۆ شەرعیەتدان بوو بەهاتنی داعش و لەبەرامبەردا پێكهێنان و دروستكردنی گروپە توندەڕەوكانی حەشدی شیعە كە لە ئێستادا ‌بەدەیان ڕێكخراوو گروپی جۆراوجۆر ئەژمار دەكرێن و هەریەكـ لەو ڕێكخراوانە سەر بەحیزب و پێكهاتەیەكی ناو پێكهاتەكانی كوتلەی هاوپەیمانی شیعەن !
لەبری القاعیدە بۆچی داعش داهێنرا !


قاعیدە ئەگەرچی وەكـ یەكەم ڕێكخراوی تیرۆریستی و دایكی هەموو ڕێكخراوەكانەو بیدعەیەكی سەییئەی جاریە بۆ ئەوانیتر ، ڕەنگە ئەم پرسیارە بێتە گۆڕی مادام قاعیدە هێشتا ماوەو كۆتایی بە ‌چالاكی و كردەوە تیرۆریستیەكانی نەهاتوە‌ بۆچی خودی قاعیدە ناگاتە ناوچەكەو لەبری داعش بۆخۆی درێژە بەكردەوكانی بدا !؟ بەبڕوای بەندە گرنگترین هۆكارەكانی جێگرەوەی قاعیدە بەداعش بۆ ئەم چەند خاڵە دەگەڕێتەوە :
:
• دروشم و ئیدیعای قاعیدە گەورەو فراوان بوو كە خۆی لە هەڵگیرساندنی جەنگی ئایینیەكان ناساند ، وەلێ داعش بچووكرایەوە بۆ نێوان كەمە نەتەوەیی و ئاین و ئاینزاكان و لەسنورێكی كورت و دیاریكراودا !


• قاعیدە لەڕووی جوگرافیا‌وو سنورەوە لەناوچەكە دووربوو‌ بۆیە داعش داهێنرا ! دیسان ( ڕۆژهەڵاتی ناوەڕاست ) بەدەیان كێشەو گرفتی جۆراوجۆر دوگیانە ! ئاسان نەبوو بۆ قاعیدە لەتەنیشت ئەركی مێژووەكەی لە ئەفغانستان ! بتوانێ لەهەمان كاتدا سەرپەرشتی ناوەندو لە گەرمەی ڕووداوەكاندا ڕۆڵی مەیدانی هەبێ لە عێراق و شام !!


• بۆ هەر سەردم و جوگرافیاو ژێنگەو وەرچەرخانێكی تازە ناوو لۆگەی نوێ ئەخوازێ ! داعش بەرهەم و نمونەیەكە لەو سیاسەتە !


• لەساتەوەختی سەرهەڵدانی داعشدا جەماوەری وەڵاتانی عەرەبی لەسەرپێ و ئامادەسازیبوو بۆ ‌گۆڕانكاری و شۆڕش و بەهاری عەرەبی هەڵگیرسابوو ! بۆ كاردانەوەو ئیدارەكردنی پێشهات و ڕووداوە تازەكان داعش پێویستیەكی حەتمی قۆناغەكە بوو !


• لەهەمووی گرنگتر بەلای بەندەوە بۆ سوریا و هەڵتۆقینی داعش لەو وەڵاتە بۆ ڕێگریكردن بوو لە ئەگەری كەوتن و لەناوچوونی ڕژێمەكەی بەشار ئەسەد بوو !
داگیركردنی شاری موصڵ


هەموو دەزانین بەپیلانێكی وردی پێشوەختە و بەهەڵهاتن ‌و چوڵكردنی ئەو شارە لە سوپای عێراق و ڕادەستكردنی بەداعش لەگەڵ تەواوی كەرەستەو چەكـ و تەقەمەنیەكانی ئەو سوپا گەورەیی كە پێشتر لە شاری موصڵ وچواردەوریدا جێگیركرابوو! ئەمەش بووە مایەی پرسیارو دەیان لێكدانەوەو مشتومڕی ناوخۆیی و دەرەوەی بەدوای خۆیدا هێناو دواجاریش لەبیركرا !؟ خۆ ئەگەر پرسیار بكەین بۆچی ‌شاری موصڵ كرایە ئامانج ڕەنگە سەد دەر سەد وەڵامەكەمان دەست نەكەوێت وەلێ بەچەند خاڵیكـ ئەكرێ بگەینە بەشێكـ لەسەرەداوەكانی لەوانە :


• دووەم شاری گەورەی عێراقبوو لەڕووی دانیشتوانەوە هەروەها زۆرینەی پلەدارو ئەفسەرەكانی سوپای پێشووی عێراقی لێبوو !


• دیسان پێكهاتەی دانیشتوانەكەی فره ‌مەزهەبی و نەتەوەیی و ئاینی و ئاینزایی بوو ئەمەش ڕێكخۆشكارو ئاسانكاری دەكات بۆ دەستێوەردانی وەڵاتانی دوورو نزیكـ وەكـ لەهێرش و پەلاماری داعش بۆ شەنگال و دەستێوەردانی كۆمەڵگای نێودەوڵەتی و بەخشینی پۆستی ( باڵیۆزی نیازپاكی ) لەنەتەوه ‌یەكگرتووەكان بەكچێكی ڕزگاربووی یەزیدیەكان لە دەستی داعش ! هەروەها هەڵاو نیگەرانیەكانی پاپای ڤاتیكان و مەسیحیەكانی جیهان لەسەر ئاوارەبوون و دەربەدەری مەسیحیەكانی ئەو شارە !

 

• بەحوكمی ئەوەی موصڵ هاوسنورە لەگەڵ سوریا بەمەش دەوڵەتەكەی داعشی پێ فراوان دەكرێت و لەڕووی هاتووچۆ و گوزەری‌ نێوان سوریا و عێراق هیچ گرفت و لەمپەرێكی ئەوتۆ بۆ داعشەكانی هەردوولا دروست نەكات !


• تەواوكردن و جێگیركردنی شەرعیەتی سیاسی و شەرعی ناوی دەوڵەتەكەی داعش بوو كە بە ( دەوڵەتی ئیسلامی لە عێراق و شام ) ناسراوە !
ماوەتەوە بڵێین لەهاتنی داعش كێ سوودمەند بوو ؟ وەڵامدانەوەی ئەم پرسیارە بەشێكە لەوەڵامی ناونیشانی وتارەكەو ئەو پرسیارەش كه ‌بۆچی داعش داهێنرا !؟


:
• بۆ دژایەتیكردنی ئیسلام و شێواندن و ناشیرینكردنی ئیسلام وەكـ ئاین و مێژووی ئیسلامیی و موسڵمانان بەگشتی ! چونكە دوژمنانی ئەم ئاینە لەڕابووردوودا لەدەیان هەوڵ و پیلانی ئاشكراو نهێنیدا سەركەوتوو نەبوون واتە ئەمەش تەواوكارو زنجیرەیەكی دانەبڕاوی ئەڵقەكانی ڕابووردووە !


• بۆ ڕێگریكردن بوو لەبزاڤ و جوڵانەوەی ئیسلامیەكان و شۆڕشەكانی بەهاری عەرەبی و مەترسیەكانی ئایندەی دەسەڵات و ئەوحكومەتانەی كە بڕیاربوو پێچەوانەو دژە ئاراستەی سیاسەتەكانی ڕژێم و دەسەڵاتدارانی ڕابووردوو بێ !


• بۆ پاراستن و مانەوەی دەسەڵاتە ستەمكارو خوێنڕەژەكانی ناوچەكەبوو ، وەكـ ئاشكرایە‌ زۆرینەی حاكم و دەسەڵاتدارانی جیهانی ئیسلامیی بەزەبری هێزو بەهەڵبژاردنی ساختەو وابەستە بە ئەجیندای دەرەوە لەسەر كورسی دەسەڵات ماونەتەوەو هەتا ئێستا درێژەیان هەیە،بۆ ئەمەش داهێنانی كێشە لەدوای كێشە و هەڵتۆقینی قەیرانەكان و تووندكردنەوەی ململانێی نێوان پێكهاتەكان سیاسەتێكی باوو كارپێكراوی ڕژێمەكانی ناوچەكەیە !


• بۆ بەردەوامی ناوچەكە لەحاڵەتی نا شەڕی تەواو و نا ئاشتی و قامگیری یەكجارەكی ، واتە لەدۆخێكی تەموومژاوی وەكـ ئەوەی لێرەدا و لەڕۆژهەڵاتی ناوەڕاستدا بەڕیوەدەچێت شەرعیەتدانە بەحوكم و دەسەڵاتی شۆڕشگێڕی و مانەوە بۆ خاوەنی هێزو دەسەڵاتی ناوخۆ و دیبلۆماسیەتی دەرەوە ، ئەمەش پێكەوە دەڕژێتە دەفری پاراستنی ‌بەرژەوەندیەكانی وەڵاتانی نێودەوڵەتی و ئیقلیمی و لەوێشەوە وەدەستهێنانی هاوكاری و پشتیوانی ماددی و مەعنەوی دەسەڵاتداران !

• هەڵتۆقینی داعش و شەڕو كاولكاریەكانی ئەم ڕێكخراوە بیانوویەكی باشە بۆ ساغكردنەوەی عەمبارە كۆن و نوێكانی چەكـ و تەقەمەنیەكانی وەڵاتانی هاوپەیمانان كە ساڵانە سەدان ملیار دۆلار تێچوو و بەهای دروستكردن و خستنە بازاڕ و بەكارهێنانی بەرهەمە سەربازیەكانە ! واتە لەپاڵ ئامانجەكانی تری داهێنانی داعش ئامانج و مەبەستیكی ئابوری و بەبازاڕكردنی كەرەستە جەنگیەكانی لەپشتە‌ !

• ڕۆژهەڵاتی ناوەڕاست بەگشتی و وەڵاتانی عەرەبی بەتایبەتی خاوەنی دەیان جۆری كانزاو ژێرخان و یەدەكێكی باشە لەڕووی نەوت و داتاشراوەكانی ، دروستكردنی شەڕو ئاشوب بۆ ئەم ناوچەیە شەرعیەتدانە بەدزین و تاڵانكردنی سەروەت و داهاتی ناوچەكەیە بەتایبەتی نەوت و داتاشراوەكانی چونكە هەتا ئێستا جێگرەوەی نیەو نەتوانراوە ماددەیەكی تر لەبری نەوت دەربهێنریت و بەرهەم بهێنرێت !

• لەئێستادا بەهەزارەها ئەندامی چالاكـ و هەڵگری بیری توندڕەوی له ‌ئەوروپا و ڕۆژئاوا نیشتەجێن و خاوەنی ناسنامەی بیانین ، ڕەنگە بۆ لە ناوبردن و بنەبڕكردنی ترس و مەترسیەكانی ئایندەی وەڵاتەكەیان كار بۆ هەناردەو ڕەوانەكردنی ئەو ئەندامانە بكەن ، لەلایەكـ بەهۆیەوە تەمەنی داعش درێژدەكەنەوە لەلایەكی ترەوه دەرفەتێكی زێڕینە بۆ بەكوشتدان و ڕزگاربوون لێان ، چونكە یاسا و ڕێساكانی ڕۆژئاوا بەشێوەیەكـ داڕێژراوە ڕێگرە لەبەردەم دیپۆرتكردن و ئاودیوكردنی ئەو هاوڵاتیانەی چەندین ساڵە هاوشێوەی كەسانی ئەوروپی مامەڵەو خزمەت دەكرێن !

لێرەوە ئەگەر بەراوردێكی خێرا بكەین لە نێوان ڕۆژهەڵاتی ناوەڕاست و میانمار ( بۆرما ) دا لەڕووی ئاینی و هەڵكەوتەی جوگرافی و جۆری سیستەم و دەسەڵات و پێداگیری لەمانەوە لەسەر كورسی دەسەڵات و بەهەر نرخ و بەهایەكـ و بەهەر جۆرە قوربانی و خیانەتێكی نیشتمانی و نەتەوەیی ، هەروەها كاریگەری و زیندوویەتی و گەشەی خێرای ئیسلام و ڕۆڵی موسڵمانان لە ئێستا و لەڕابووردوودا ‌و ئامادەییان لە ئەمریكا و ئەوروپا ، بەشێكی تر ململانێی نێوان وەڵاتانی زلهێزان و داسەپاندنی دەوڵەتی ئیسرائیل و قەوارەی جوولەكە ، دیسان دەوڵەمەند بەكانزاو ژێرخانی ئابوری و ماددە خاوو بەنرخەكانی ، لەلایەكی ترەوە بەكارهێنانی‌ ناوچەكە لەلایان زلهێزان و وەڵاتانی ئیقلیمی بەهاوكاری ڕژێمە بوودەڵەكانی بۆ یەكلاكردنەوەو حیساباتی یەكتر لەسەر حیسابی ئێسكـ وپروسكی دانیشتوانی ناوچەكە ... هتد هەموو ئەمانەو بێ گومان هۆكاری تر هەن پێكەوە بۆمان ڕووندەكاتەوە كە ژینگە و هۆكاری سەرهەڵدانی داعش لێرەو نەبوونی لە میانمارو و بێ خەمی ئیدیعای داعش و داتاشراوەكانی لە قەتڵوعامكردنی ئێستای موسڵمانانی بۆرما ئاسمان و زەمینەو پرسەكە چەندە پەیوەستە بەبیرو باوەڕی خودی ئیسلام و موسڵمانان زیاتر شەڕو جەنگێكی ئایدۆلۆژی سەپێنراوی دەرەكیەو فرە ئامانج و زیاد لە ڕەهەندی سیاسی و ئابوری و پاراستنی بەرژەوەندی و هەژموون و مانەوەیە لەناوچەكە !؟