لە ونبوونی ئێستادا هەوڵێكـ بۆ ناسینەوەی ڕابووردوو !

... لەدونیادا بۆ هەر شتێكی چەسپا وجێگیر سنورو پەرژینێكی تایبەت بەخۆی هەیە ، لەمپەرە ‌ویژدانی و ئاینیەكان بۆ عورفەباووجوانەكانی كۆمەڵگا لەوێشەوە بۆ تەلیسمەكانی بەردەم یاسا و ڕیسا كارپێكراوەكانی وەڵاتان گەرەنتی پاراستن و تێ نەپەڕاندنی ئەدرێ ! وەلێ لای خۆمان بۆ شتگەلێكی سادەو كاتی و ڕاگوزەر تێپەڕاندنی هەموو سنوورەكان شەرعیەتی پێ دەدرێ و بەبەرگێكی ساختە پیرۆز دەكرێت !

ئەو سیاسەتەی كە بە درێژایی بیست و ئەوەندە ساڵە حكومەتی هەرێمی كوردستان لە بواری پەروەردەو پێگەیاندنی تاكـ بەتایبەتی گەنجان و لاوان پێڕەویكرد ، كاركردن بووە بە ئاراستەی دابڕانی یەكجارەكی ئێستا و ئایندە لە ڕابووردوو ، بەداخەوە جۆرێكـ لە بەرنامەو پیلانێكیان بەڕێوەبرد ‌ گەنجان و لاوانی ئەم گەلەیان گەیاندە ئەو باوەڕەی بە شانازییەوە‌ حاشا لە بوونی خۆیان بكەن ، ڕابوودوو بە نەفرەت بێ بەچاوێكی سووكەوە بڕواننە خوو ئەخلاق و دابونەریتی كوردەواری و ئاكارو هەڵسوكەوتی باوباپیرانی خۆیان ، ئەوان تەنانەت پێیان خۆشە نیە بڵێن ئێمە ڕۆژهەڵاتین یاخود دانیشتووی ووڵاتێكی موسڵمان نشینین ، هەموو ناوناتۆرەیەكـیان پێ قبوڵە تەنها موسڵمان بوون و ڕۆژهەڵاتی بوون نەبێ !؟

لەوێشەوە هەرچی جوانی و پاكیی ئێرە هەیە لەبەرچاویان بە خێوو جنۆكە كراوە ، لە بەرامبەردا هەموو شتەكانی دەرەوەی ئێرە بەڕەهایی بە‌ خراپ و جوانیەوە بەخوار و خێچیەوە كرایە بەهەشت و بیرو خەیاڵ و ئاوەزی گەنجانیان كەمەندكێش كرد ، هەر بۆیە لە ئێستادا جیلێكـ پێگەیشتووە بە هیچ شتێكـ ڕازی نیە ، سنووری حەزوو خەونەكانی ئەو لە كەشكەشەكانی ئاسمانەوە نزیكە ، هیچ بەهایەكـ پیرۆز نیە ، نیشتمان و نەتەوەو خاكـ و ئاو جێگای بایەخی ئەو نیە ! بە گومانەوە لە خۆی و دوروبەروو دەزگاو ناوەندەكانی ئەم ووڵاتە ئەڕوانێ ، هەست ئەكات بوونی ئەو لێرە زیادەیە ، بەهەر قوربانیدانێكـ بووبێ پێویستە ئێرەی دۆزەخی بەجێ بێڵێ ! هەر بۆیە سەرەڕای سەختی و دژواری و مەترسیەكانی ڕێگاو بان و نشینگەی پەناخوازان ڕێی هاتوو نەهات ئەگرێتە بەر ، مردنی پێ خۆشترە هەتا مانەوە لە ئێرەی چوواندنی بە زیندان و نزیكبوونەوە لە پەتی سێدارە ! بەداخەوە هەموو ئەم هەوڵانەی دەسەڵاتدارانی هەرێم‌ بۆ ڕاكردنە لە ئێرەی ڕۆژهەڵاتیەكان بە ئامانجی ڕازیكردنی ئەوان و گەیشتن بە كەناری ئارامی ڕۆژئاواییەكان !

ئەم بابەتە بەسەرهاتێكـ ئەخاتەوە یادم ئەڵێن پیرەژنێكی مەسیحی تەنها خاوەنی كورێكە زۆری خۆش ئەوێ ، ئەم كوڕە چەند ڕۆژێكـ پێش ئەوەی بمرێ موسڵمانبوونی خۆی لای دایكی ڕادەگەیەنێ ، لەو ماوە كەمەدا دایكی زۆر هەوڵ دەدات پەشیمانی بكاتەوە و بیگێڕێنێتەوە سەر ئاینی خۆی كە ئاینی مەسیحیە ، بەڵام كوڕەكەی قایل نابێ و دواتر ئەمرێ ، لە پرسەكەیدا دایكی زیاد لەوەی كە پێویستە شین و شەپۆڕی بۆ ئەگێڕێ ! ژنە دراوسی و خزمانی ئەیانەوێ بە ئامۆژگاری و گێڕانەوەی بەسەرهاتی مردوانی خۆیان دڵنەوایی بكەن ، وەلێ ئەو هەر ئۆقرە ناگرێ و دواتر هۆكارەكەی ئاشكرا دەكات ئەڵێ ئازیزانم خزمینە كوڕەكەی من چەند ڕۆژێكە لە ئاینی خۆی پەشیمان بووەتەوە و چووتە سەر ئاینی ئیسلام و بە موسڵمانی مردووە ، خەفەت و داخی من بۆ ئەوەیە وەك چۆن عیسی علیه السلام ی لە خۆی ڕەنجاند و پشتیلێكرد ئەترسم بەهەمان شێوە محمدیش نەیناسێ ( صل الله علیه وسلم ) ! هەربۆیە لەو ‌نێوەندەدا ون و سەرگەردان ئەبێ !


بەداخەوە ئەوەی لێرە ئەگوزەرێ لەهیچ ناچێ و لێچوو لەوچووی كەس نیەو تەواو تەواو نامۆو غەریبە ! جا ترسناكی ئەم دیاردەیە لەشەقام و كۆی ئەم ڕیتمە لەپەروەردە گوازراتەوە بۆ نێو كایەسیاسی و ڕیكخراوەكانی كۆمەڵی مەدەنی و دەزگاو ناوەندە ڕۆشنبیری و زانستیەكان و لەوێشەوە بۆ ناو بەشێكـ لەدامو دەزگاكانی حكومەتی هەرێم كەبەشێكـ لەو دەزگایانە خاوەنی بڕیارو گوێ لەمشت و فەرمانداری دەكەن ، بەمەش كاریگەری و هەژموونی ڕاستەوخۆ و ناڕاستەوخۆی لەسەر پێكهێنان و دروستكردنی ڕا گشتی و گۆڕانكاری لەهەڵوێست و ئاراستەكردنی دیدو تێڕوانینە جێاوازەكان بۆ ئەو دیدگاو ئامانجەی كە بۆ خۆیان بەگونجاو لەباری ئەبینن ! هەربۆیە لەگەڵ گرتنە بەری هەر شێوازو ئالییەتێكـ لەكاری سیاسی و دەربڕینی ڕاو هەڵوێستی تایبەت بەخۆت ئەگەر كتومت كۆپێكراوی ئەو نەبی خێرا هەڵوێستت لەسەر ئەگرن و بەڕاست و چەپدا قێزەون و خۆفرۆشی ! لێرەوە لەكاردانەوەی ئەم هەرزەییە لە سیاسەت و نەخوێندنەوەی بەرانبەر وهەڵپەو پەلەقاژەی بێ ئامادەسازی بۆ گۆڕانكاری و كاریگەر بەفەیسبوكـ و سەرسوڕمان بەچەلەحانێی سەر شاشەی كەناڵەكان هێندەی تر لەخزمەتی بەكەڵەگانیكردنی دەسەڵات و قایمكردنی جومگە هەستیارەكانی دەوڵەت و بەیاساییكردنی گەندەڵی و شەرعیەتدان بەتاڵان و ئاودیكردنی داهات و سامانی گشتی وەڵات !


بەداخەوە ئەم كارو كاردانەوەیە جارێكی تر خزمەتێكی بێ ئەركی دوولایەنەیە بە دیاردەكەو ڕەنگرتن و بەرجەستەكردنی ئەو ڕۆشنبیریە‌ كە لەشەقامەوە دەست پێدەكات بۆ سەرجەم كایەكانی ئەم هەرێمە ، لێرەوە ئەكرێ بڵێن ئەوەی دەگوەزەرێ تەعبیرە لەتۆڵەو بەشێكی تری وەكـ هەستكردن بە بێنازی و كەمووكورتی و ئەویتری گیرفان بەتاڵی و بێكاری لەوێشەوە بۆ تەرجەمەكردنی ئەو زریانەی‌‌ كە بۆ كەس و هیچ لایەنێكـ ئاسان نیە بتوانێت ڕێگای پێ بگرێ ! دواجار نگرۆبوون و تیاچوونی دەستەجەمعی دەبێتە واقیعێكی حەتمی ! ئەگێڕنەوە دووپشكێ لەكەناری ڕوبارێكـ زۆر پاڕایەوە لە كیسەڵێكـ كەسواری پشتی بكات بۆ ئەوەی بەسەلامەتی بپەڕێتەوە ! كیسەڵەكە بەسەرسامێكەوە وتی : جا كێ لە ژەهرو ترسناكی تۆ ئەمینە هەتا من لێت دڵنیابم !؟ لە وەڵامدا دووپشكەكە وتی بەڵێن بێ پێوەت نادەم ئاخر خۆ كارێكی لەو شێوەیە خنكانی خۆشمی بەدواوەیە !؟ بەمە كیسەڵەكە باوەڕی پێكرد وەستا هەتا خۆی لەسەر پشتی جێگیركرد‌ ! كاتێ گەیشتنە ناوەڕاستی ڕووبارەكە دووپشكـی ستەمكار كلكی لە گەردنی كیسەڵەكە چەقاندو پێوەی دا ! كیسەڵەكە لای كردەوە دواوەو وتی : خۆ تۆ بەڵێنتدا پێوەم نەدەی !؟ دوو پشكـەكە وتی ئیتر ناپاكی خوویەكی منە ، خووش خەسڵەتێكی زاڵە ! هەردووكیان خنكان !؟