بەشداریمان لەكاراكردنەوەی پەرلەمان بۆ ؟

 

1- یەكگرتوو بەڕەچاوكردنی ئەو واقیعە سیاسیەی كە لەكوردستاندا زاڵە وەكـ خۆی سیاسەت‌ ئەكاو سەربەخۆیەو خاوەنی سیاسەت و ئیرادەی خۆیەتی ، ئەمەش بۆ چاوبەست و چەواشەكردنی كەس نیە ، بەڵكو وتەو لێدوانی بەرپرسانی تێكڕای لایەنەكان لەكاتی ئاسایی و دوور لەموزایەدەی سیاسی وجێگیربوونی بارودۆخی كوردستان بەزمان و لێدوانی خۆیان سەربەخۆبوونی یەكگرتوویان پشت ڕاستكردۆتەوە .
:
2- یەكگرتوو بەشێكـ نەبووە لەگرفتەكانی پەرلەمان و داخستنی ئەو دەزگایە ، هەروەكـ بەپیلان و هاندانی یەكگرتوو نەبوە هەتا ئەگەر بگەڕێتەوە پێویستی بەداتاشینی پاساو بێ یان پینەوپەڕۆكردنی هەڵوێستەكانی ، هەرچی تایبەتە بە19ی ئاب وەكـ دەیان جار حزبەكانی تر پێش یەكگرتوو ڕوونیان كردەوە تەنها بۆ چەواشەكاریەو ڕاكردنە لەبەرپرسیارێتی قۆناغەكە بەسوود وەرگرتن لە سۆزو ختۆكەی نەیارانی یەكگرتوو ! ئەگەرنا خۆ بۆ دەرچواندنی یاسای تر نمونە زۆرە بۆ ئەم خولە كە بۆ بڕیاردان لەسەر یاسایەكـ نەتوانراوە نیصابی یاسایی پەرلەمانتاران تەواو بكرێت ئەی بۆچی باس ناكرێ و لەبیرو یادەوەری كەسدا نیە ؟ كەواتە 19ی بەسیاسی ‌كراوە نەكـ هەڵوێست و سیاسەتی یەكگرتوو بێ !
:
3- ئەگەرچی هاوبەشیكردن لەگەڵ پارتی و یەكێتی بەلای ئەوانیترەوە خاڵێكی سەلبیە وهەڵوێستێكی لاوازە ، دەی خۆ هاوسەنگەری لەگەڵ گۆڕان و كۆمەڵ یەكسان نابیتەوە‌ بەفریشتە ، ئەزموونی ڕابووردوو سەلماندی سەرباری دەیان قۆناغی كاری هاوبەش و كارنامە و پاكێجەكان وەلێ ئەو دوو حزبە خاوەنی شاكاری شكاندنی پەیمان و كۆدەنگی بڕیاری پێنج حزبەكه ، ‌شەوی 19ی ئەزموونێكە بەعەمەلی‌ دەریخست بەرژەوەندیە تایبەتیەكانی حزب لەپێش هەموو ڕێكەوتنێكی سیاسی و كۆدەنگی نیشتمانیە ، كەواتە ئەوان هۆكارو دەستپێشخەربوون نەكـ یەكگرتوو ، دواتر بۆچی لەپێناو ئەواندا بڕیاری خۆمان دوابخەین ؟
:
4- پارتی و یەكێتی بڕیاری خۆیان دابوو‌ پەرلەمان كارابكەنەوە ، لەگەڵ كۆمەڵ و گۆڕانیش زیاد لە جارێكـ كۆبوونە‌وە ، هۆكاری پاشەكشەی ئەم دوو حزبە لەپێشەوە بۆ بەرژەوەندی حزبی و باس لەماف و ئیمتیازات بوو‌ نەكـ مووچەو خزمەتگوزاری ! چونكە هەردوولا مەرجی بەشداریان لەكاراكردنەوەی پەرلەمان بەستەوە بەدەستەی ئێستای سەرۆكایەتی پەرلەمان ، لەكاتێكدا سەرۆكی پەرلەمان دوور لەهۆڵی پەرلەمان و ڕێكارە یاساییەكان لەدیوەخانەكەی پارتی و له (‌سەری ڕەش ) بەسازان و ڕێكەوتنی نێوان گۆڕان و پارتی بڕیاری لەسەردرا ، هەروەكـ سكرتێری پەرلەمان بەشێوەیەكی كاتی و بۆماوەی چەند ڕۆژێكـ بە كۆمەڵ درا ! كەواتە ئەگەر ئەوە كارێكی یاسایی و دروست بووبێ لەكاتی خۆیدا دەی بۆچی لەئەگەری هەڵوەشانەوەی ڕێكەوتنی نێوان هەرسێ لایەنی پەیوەندیدار هەڵوەشانەوەی لێكەوتەكانی نایاسایی و كودەتا بێت ؟ یان بۆ دەبێ یەكگرتوو ئەو مافەی نەبێ هاوشێوەی ئەوان سەوداو ومامەڵە بكات ؟
:
5- كۆمەڵ لەلایەكـ هەست بەپەرواێز ئەكا و پارتی نایخوێنێتەوە لەولاشەوە پێ بەپێ و هەنگاو بەهەنگاو چاوی لەگۆڕانە ، گۆڕان گرفتی فرە مەرجەعی و دەرنەچوونی بڕیاری هەیە ، كۆبوونەوەكانی چوار ڕۆژو و سێ شەو وڕۆژەكانی چڤات و مانەوە لەنێوان ( بەڵێ و نەخێر و نیو‌ە بە نیوەی هەڵوێست‌ ) ! بەڵگەیەكی ئاشكرایە كە جگە لەخۆیان هیچ حزبێكـ ناتوانێ گرەو لەسەر بڕیارو هەڵوێستەكانی ئەو دوو حزبە بكات ، هەروەكـ ئەوەش دەزانن پرسە گورگانەیان پێكراوە ( وەكـ كوێستان محمد وتی ) ! كەواتە هۆكاری بەشدارینەكردنی گۆڕان و كۆمەڵ ڕوونە ! دەی خۆ ئێمە ئەو گرفتانەمان نیە بۆچی خۆمان بەوانەوە گرێ بدەین !؟
:
6- ئەگەر بڕیارە پەرلەمان تەنها هی كۆمەڵ و گۆڕان بێ ،‌ دەی با پێكەوە بڕۆن بەتەنها بۆخۆیان كارای بكەنەوەو دەست بەكاربن نەكـ له ‌دوورەوە قسە بكەن !؟ خۆ ئەگەر هی تەواوی حزب و لایەنە سیاسیەكانه و ‌موڵكی بەتەنها حزب نیە ! دەی بۆچی جگە لە گۆڕان و كۆمەڵ كەسیتر مافی ئەوەی نەبێ بەشداری بكات یان ڕەددی بكاتەوە !