نەوەیەكی شەرعی پۆپۆلیزم .. (لایكییزم) وەك چەمكێكی نوێ..!

 

پێناسە سادەكەی میللی گەرایی یان عەوامگەرایی (پۆپۆلیزم) بریتیە لەو شێواز و ستایلە سیاسەتەی كە هاوخەمی و لایەنداری و هەواداری خۆی بۆ ماف و ئازادییەكانی خەڵكی نیشاندەدات و خۆی دەكات بە تەڕەف و بەرامبەری ئەو نوخبەیەی كە لەدەسەڵاتدایە و بەناوی (خەڵك)ـەوە قسەدەكات، و پیرۆزییەكی لە ڕادەبەدەر بە چەمكی (جەماوەر) دەبەخشێت و دەیكات بە یەكەم و دوا دەسەڵات كە دەبێت ئامانجە سیاسیەكان بە خواست و ویستی ئەو (جەماوەر) دیاری بكرێن، بێگومان ئەمەش لە رێی كاركتەر و سەركردەیەكی كاریزماوە دەكرێت ..


بە كورتی جەماوەرچێتی (پۆپۆلیزم) دەیەوێت بە خەڵك و جەماوەر بڵێت كە ئێوە خاوەن دەسەڵاتی سەربەخۆ و ڕەهان بۆ هەموو بڕیارەكان، و ئێوە دەسەڵاتی هەموو گۆڕانكارییەكتان هەیە، هاوكات نوخبەی دەسەڵات و ئەوانەی لەسەر حوكمن وەك دوژمن و ستەمكار و پێشێلكەری مافەكانی خەڵك نیشان دەدات و بەهەموو شێوەیەك هەوڵی ناشرین كردنی دەدات .


لە ئێستادا بەهۆی كاریگەری سۆشیاڵ میدیا بەتایبەت (فەیس بووك) دەبینین چالاكیەكانی گەل و جەماوەر لە شەقامەوە گواستراوەتەوە بۆ تۆڕەكۆمەڵایەتیەكان، و ئەو شەحنەی ئۆپۆزسیۆنبوون و ناڕەزایەتیەی كە هەیە زۆرجار لە فیس بووكدا خاڵی دەكرێتەوە، دەتوانین بڵێین بووە بە تەنفیسێكی باشی هاوڵاتیان كە دەسەڵاتی خەنی كردووە لەوەی كە دوری خستۆتەوە لە تەقینەوەی جەماوەر پیایدا .


ئەو دۆخەی كە تیایدا تۆڕە كۆمەڵایەتیەكان و فەیس بووك جێگەی شەقام و جوڵەی ناڕازییەكان و هاوڵاتیانی گرتۆتەوە ، بێگومان گۆڕانی دیكە لە شێوازەكانی جوڵانی شەقام و گوتاری پۆپۆلیستی بەدوای خۆیدا هێناوە، ئەوەتا ئەگەر لە شەقامدا سەركردە و واعیز و سیاسیەكان بە بڵندگۆ قسە و ڕەخنە و شیعار و هیتافەكانیان ئاڕاستەی جەماوەر و شەقام بكەن و بە لافیتە و پۆستەری سەرسنگیان تەعبیر لە ناڕەزایەتیەكان بكەن، ئەوا ئێستا لە تۆڕە كۆمەڵایەتیەكان ئەوە تەنها بووە بە دابەزاندنی پۆستێكی فیس بووك یان تویتێك لە تویتەر ، هەروەها ئەگەر لە شێوازە كۆنەكەدا كاردانەوەی جەماوەر و هاوڵاتیان لەبەرامبەر ئەو كەس و لایەنەی كە شەقامی وروژاندووە بە كۆبونەوە و قەرەباڵەغی و خۆپیشاندان و شیعار وتنەوە و دەست بەرزكردنەوە و جادەگرتن و هەندێك جار بە بەرد وەشاندن بێت، ئەوا ئێستا بووە بە لایك و كۆمێنت نوسین بۆ پۆستەكە یان تویتەكە، لەبەرامبەریشدا دەسەڵات لەڕێی پەیجە سێبەرەكانی و ئەكاونتی بەڵتەجیەكانیەوە هەوڵی ڕەدی ئەو حاڵەت و دۆخە دەدەنەوە ئەویش بە كۆمێنتی توند و شەڕە پۆست و زۆرجاریش بە بلۆك و ڕیپۆرتكردنی ئەو پەیج و ئەكاونتانەی هێرش دەكەن و ناڕەزایەتی دەردەبڕن .!


كەوابوو ئیتر سەركردە مەیدانیەكان و چالاكوان و سیاسی و پەڕلەمانتارە ناڕازییەكان لەبری شەقام و خۆپیشاندانەكان وەك ئەمری واقیع دەچنە ناو دنیای سۆشیاڵ میدیا لەوێوە هەوڵی بەدەستهێنانی سۆز و دەنگی شەقام و جەماوەر دەدەن و دەیانەوێت بەتایبەت سەرنجی گەنجان ڕابكێشن ، دیارە وەك وتمان ئەمەش لە تۆڕە كۆمەڵایەتیەكاندا لەڕێی كۆكردنەوەی (لایك / اعجاب)ـەوە دەبێت، لێرەوە (لایكیزم) لەبری (پۆپۆلیزم) شكڵ دەگرێت كە لە كورتترین پێناسەدا بریتیە لەو شێوازە گوتار و سیاسەتكردنەی كە هەندێك حیزب و كەسایەتی سیاسی و چالاكوان و زۆرجار كەناڵی ئیعلامی و ڕۆژنامەنوسیش بەكاریدەهێنن بەئامانجی بەدەستهێنانی (لایك/اعجاب) و دەسخۆشی فیس بووك و ماڵپەڕە كۆمەڵایەتیەكانی دیكە، كە زۆرجار گوتار و تێزێك دەوترێت تا دوا ڕادە دوورە لە عەقڵانیەت و زۆر كڵۆڵە لە خوێندنەوەی واقیع چونكە گوتارێكە بەرمەبنای بیركردنەوەی قووڵ و فرەڕەهەند نیە بەڵكو زیاتر شەحنەی خۆی لە فیس بووك و قسە و حەماسەتی گەنجانی ناو تۆڕەكۆمەڵایەتیەكانەوە وەردەگرێت .
لەم شێوازەدا (لایكیست)ـەكان یان (لایكگەراكان) زۆر شت دەڵێن و دەنوسن كە زۆرجار خۆشیان قەناعەتیان پێی نیە و تەنانەت دژیشە بە پرنسیپ و پرۆگرامی حیزبەكەشی، جا ئەم تەسلیم بوون و توانەوەیە لەلایەك دەگەڕێتەوە بۆ نەبونی خیتابی سیاسی عەقڵانی چارەسەرئامێز و نەبوونی پەیامی سیاسی ئامانجدار، لەلایەكی دیكەوە بۆ ڕازیكردنی (لایككەرەكان)ـە بەو ئومێدەی لە هەڵبژاردندا پەنجەی شایەتومانی خۆیان ڕەشبكەنەوە بە دەنگدان پێیان .!


ئەگەرچی حاڵی حازر كاریگەری سوشیاڵ میدیا لەسەر ئاڕاستەی سیاسی و جوڵە و گوتاری حیزبەكان بووەتە بەڵگەنەویست، تەنانەت ڕویداوە بەهۆی شەپۆلی داخوازی یان توڕەیی ناو تۆڕەكۆمەڵایەتیەكان كەسی سیاسی لە ئاستی باڵادا بەناچاری دەستی لەكاركێشاوەتەوە، بەڵام ئەمە ناكاتە ئەوەی دەستبەرداری سیاسەتێكی عەقڵانی بین و خۆمان بدەینە دەست شەقام و تۆڕەكۆمەڵایەتیەكان و تەبەنی ڕا و خواستی ئەوان بین، ڕاستە گرنگە ڕێز لە ڕا و خواستی خەڵك و شەقام بگیردرێت و كاری جددی لەسەر بكرێت، بەس نابێت تەبەنی ڕای خەڵكی بكرێت و هەڵوێست و خیتابی سیاسی لەسەر عەقڵی جمعی شەقام هەڵبچندرێت، ئەصڵەن حیزبی سیاسی و سیاسەتمەداری سەركەوتوو دەبێت ئەوەندە كاریگەر بێت شەقام بجوڵێنێت، نەك بەپێچەوانەوە دوای شەقام بكەوێت و ئەوان چییان ویست وابكات .!


بۆیە هەڵەیەكی كوشندەیە لەبەرخاتری شەقام و لایكی فەیس بووك و لە پێناو كەسبی حەماسەتی خەڵكی دەستبەرداری قیەم و بەها باڵاكان ببیت و ئەخلاق لەناو سیاسەت ڕەچاو نەكرێت ..