ڕۆژی (4)ـی شوباتی هەموو ساڵێك بە ڕۆژی جیهانی ڕوبەڕوبونەوەی نەخۆشی شێرپەنجە ناسراوە، ئەو نەخۆشیەی كە ڕۆژ بەڕۆژ ئامارەكان ئاماژە و داتای دڵناخۆشكەر و ترسناك لەبارەیەوە دەدەن بەتایبەت لە وڵاتە دواكەوتوو و دەست و پێ سپیەكاندا لەناویشیاندا عێراق بە هەرێمی كوردستانیشەوە، ئەویش بەهۆی پیس بوونی بەردەوامی ژینگە و كاریگەرییەكانی جەنگ و بۆمب و تەقەمەنیە بەكارهاتووەكان ، و هاوكات هاوردەكردنی خواردەمەنی و دەرمانی بێ كوالێتی و (هەنێكجار ماوەبەسەرچووش) ئەمەو وێڕای هۆكارە بۆماوەیی و جینیتیەكانی دیكە.

نەخۆشی شێرپەنجە یان ڕاستتر دۆزەخی شێرپەنجە ئەو نەخۆشیەیە زۆر بێ ڕەحمانە وا لە مرۆڤی توشبوو دەكات كە بەردەوام هەست بكات لە سێبەری مەرگدا دەژی ، و بەردەوام مەساحەی كابوس و تارماییەكانی مەرگ لەسەر حسابی خەون و خولیاكانیان فروانتر و بەرینتر دەكات..

كەسی تووشبوو بە شێرپەنجە (گەورە بێت یان مناڵ ، كوڕ بێت یان كچ ، گەنج بێت یان پیر) خۆبەخۆ فێری ئەوە دەبێت بە قوڵی ڕابمێنێت لە كەسەكان و شتەكانی دەوروبەری ، هاوكات حاڵی دەبێت لەوەی كە هەنگاوەكان لێرەوە بەرەو كۆتا چەندە كورتن و ئاوابوون چەندە نزیكە.

لێرەوە ئەگەرچی بەتەنها (ووشە) و (نوسین) لیاقەتی ئەوەی نیە كە قوڵایی برینەكانی ئەوان بدۆزێتەوە و گەرمیەك بە هەناسەی ساردیان ببەخشێت و لە نیگا پڕ لە غوربەتەكانیان تێ بگات، و ناتوانێت وەڵامی (هەڵكێشانی ئاخ و هاواری ناخ ، ئازار و بێخەوی ، خەمی قووڵ و بێزاری و تەنیایی) ئەوان بداتەوە ، بەڵام جێی خۆیەتی لەم ڕۆژەدا لانی كەم (أظعف الإیمان) دەركی حاڵ و موعاناتی توشبوان بەو نەخۆشیە كوشندەیە بكەین ، بۆ ساتێكیش بێت بیریان لێ بكەینەوە و لەگەڵیان بژین.. ئاخر لەم ناوچەیەی لەمەڕ خۆمان لەناو ئەم هەموو قەیران و دەردی سەری و ئاڵۆزی و تەنگژەدا كە لە زستان نەوت و لە هاوینیش ئاو ، و لە هەردوكیانیش كارەبا نیە وێڕای نەبوونی مووچە و دەرامەتی پێویست ، لە دۆخێكی وەهادا تەنانەت بۆ ئەوانەش كە تەندروستن و هیچ نەخۆشیەكان نیە ژیان و گوزەران ناخۆش و دەردناكە ، چ جای بۆ ئەوانەی كە بەو نەخۆشیە كوشندەوە بناڵێنن..

باسەكە لێرەدا تەنها ترس نیە لە (مردن) بەڵكو زۆر قووڵتر باسكردنە لە هەستێكی شاراوە ، چونكە هەموومان حەتمیەتی ماڵئاوی لەم دنیایە و دواجار (مردن)ـمان لاجێگیر بووە و دەزانین كە مەرگ ئەو تەلیسمە پەی پێ نەبراوەیە كە ڕۆژانە وەك مۆتەكە ڕاومان دەكات ، هەرجارە و كەسێك لەگەڵ خۆی دەفڕێنێت ، بەڵام نهێنی ئەوەی كە ژیانمان لاخۆشە ، بوونی ئەو (هەستە شاراوە)یە كە كەسمان نازانین كەی دەمرین و كات و ساتی ماڵئاویی یەكجاری كەیە.؟!! كە بەداخەوە توشبووان بە شێرپەنجە زۆربەیان لەو هەستە شاراوەیە بێ بەشن، بۆیە هیوا و ئومێد و خەون و خولیا و ئاواتەكانیان وەك تاڵە تیشكە كز و لەرزۆكەكانی ئەو مۆمەی لێهاتووە كە لە دواساتەوەختی توانەوەی یەكجارەكیدایە.!


بۆیە ئەركی حكومەتە لەڕێی وەزارەتی تەندروستی و ئۆرگان و لایەنە پەیوەندیدارەكانی دیكەوە كاری جددی بكەین بۆ بەرتەسككردنەوەی ڕوبەری مەترسیەكانی ئەم نەخۆشیە لەسەر كۆمەڵگە و هاوكات درێغی نەكەن لە بەدەمەوە چوونی توشبوان و هاوكاری كردنی ماددی و مەعنەوییان ، هاوكات ڕێكخراوەكانی كۆمەڵگەی مەدەنی و میدیا دەبێت بە ڕۆڵی خۆیان هەستن لە بڵاوكردنەوەی هۆشیاری و ئاگایی پێویست بۆ دوركەوتنەوە لەو هۆكارانەی كە دەبنە مایەی شێرپەنجە..

لەكۆتاییدا لە پەروەردگاری مەزن دەپاڕێمەوە توشبوان بەو نەخۆشیە شیفا بدات و صەبر و ئارامی و تەحەمول بەخۆیان و كەس و كاریان ببەخشێ..