داڕمانی پەروەردە، یەكسانە بە شكستهێنانی نەتەوە

 

پەروەردەو فێركردن یەكێكە لە پرۆسە گرنگەكانی ژیانی هەر كۆمەڵگەو نەتەوەیەك و پێشكەوتنەكەشی بەستراوەتەوە بە رادەی پێشكەوتنی پرۆسەی پەروەردو فێركردنەكەی و بەپێچەوانەشەوە دواكەوتنی هەر كۆمەڵگەیەكیش بۆ خراپی سیستمی پەروەردە و فێركردن و قوتابخانە و ڕێز نەگرتنی مامۆستا و ئاستی ووشیاری ئەو كۆمەڵگەیە دەگەڕێتەوە.


بێ گومان رۆڵی مامۆستاو پەروەرشیار لەناو پرۆسەی پەروەردەو فێركردندا هیچی كەمتر نیە لە خودی پرۆسەكەو بگەرە وەك دەوترێت (مامۆستا+ قوتابی+ پرۆسەی پەروەردە و قوتابخانە) هەرسێكیان تەواوكەری یەكترن و شكستی هەریەك لەمانە ئەوە دەبێتە شكستهێنانی ئەوانی تر.


وەك لەیەكێك لە پێناسەكانیشدا هاتووە" مامۆستا كەسێكە خاونی توانایەكی بەهێز و تایبەتمەند وئەزمونێكی بەرفراوانە لەبواری پەروەردەو فێركردندا بۆڕێنماییكردنی قوتابیان و خوێندكاران و رەفتارو سلوكیان دەگۆڕێت بەوشێوەیەی كەپێویست دەكات."


هەربۆیەش ئەگەر رۆڵی مامۆستا گۆرانكاری و پێشكەوتنی كۆمەڵگە بێت ئەوە پێویستە كە مامۆستا بەچاوێكی پڕ بایەخ و هەستیارەوە تەماشا بكرێت هەروەك لەوڵاتانی گەشەسەند و پێشكەوتوەكاندا شوێن و پێگەیەكی بەرزی بۆدانراوە نەك وەك وڵاتی خۆمان مامۆستا شەقی تێ هەڵبدرێت و بەچاوی سواڵكەرو كەسێكی ئاساییەوە سەیر بكرێت .


ئەوەتا لەوڵاتێكی وەك وڵاتی چین دانیشتوانی ئەو وڵاتە تەنها لەبەرامبەر دو كەسایەتیەوە سەری خۆیان دادەنەوێنن كە ئەوانیش سەرۆكی وڵات و مامۆستایە یان لەوڵاتێكی وەك بەریتانیا هەركەسێك مامۆستا بێت ئەوە بە شكۆ و شانازی وڵات تەماشا دەكرێت یان لە ڵاتێكی وەك روسیا هەركەسێك بوو بەمامۆستا نابێت هیچ كارێكی تر بكات چونكە حكومەتی ئەو وڵاتە هەموو پێویستیەكی ژیانی بۆدابین كردوە ،لەوڵاتێكی وەك یابانیش موچەی مامۆستا دیاری كراونیە بەڵكو مامۆستا بەخواستی خۆی موچەكەی دیاری دەكات لەوڵاتی ئەڵمانیاش موچەی مامۆستا لەموچەی دكتۆرو دادوەرو ئەندازیار زیاترچونكە دەڵێن هەموو ئەم توێژانەی تر لە قوتابخانە لەلایەن مامۆستاوە فێركراون و پەروەردەكراون .


بەڵام لەوڵاتێكی وەك هەرێمی كوردستان كە مامۆستا موچەیەكی كەمی پێ رەوا نەبینرێت و دەبێت بۆئەوموچەكەمەش خۆپیشانداو بایكۆت بكات و زۆرجاریش سوكایەتی و ئیهانە و هەرەشەی كوشتنی لێ بكرێت .


لەوڵاتێكدا قوتابیەكانی دەچن لەدوكانی مامۆستاكەیانداپێویستیەكانیان بكڕن ،لەوڵاتێكدا مامۆستا بەهۆی خراپی بژیوی ژیانیەوە نەتوانێت وەك پێویست گرنگی بە پیشەكەی خۆی بدات و سەرقاڵی ئیشی دووەم بێت .


لەوڵاتێكدا مامۆستا لەڕیزبەندی دواوەی چین و توێژەكانی تردا بێت و حكومەتی وڵاتەكەش خۆی شكۆی مامۆستا بشكێنیت ئەوە بێگومان لەم وڵاتەدایە كە :
+نەخۆش بەدەستی دكتۆر دەمرێت و چاوی كوێر دەبێ.


+خانوو باڵەخانەو شەقام و پردەكان بەهۆی ئەندازیارەكانەوە بەرگەی لافاوێك ناگرن و دەروخێن.


+ كێشە كۆمەڵایەتیەكان زیاد دەكەن و شێرازی خێزان تێك دەچێت و زیندانەكان پڕدەبن و داگاكانیش بەر نەكەون و نەزانەكانیش ڕۆڵ بگێرن.


لەڕاستیدا ئەوە ڕاستی ئەو وتەیەمان بۆ دەسەلمێنیت كە دارمانی پەروەردو فێركردن یەكسانە بە تێك شكانی نەتەوە و وڵاتێك.