لە ڕاپەڕین و شۆڕش گرنگتر بونی (بدیل)ە.

بەرپابونی ڕاپەرین و شۆڕشەكان لە دژی دەسەڵاتە گشتگیر و پاوانخواز و نادیموكراسیەكانە، ئەو ڕژێمانەی كە ئامادەنین بە شێوەیەكی یاسایی و ئاشتیانە ئاڵوگۆڕی دەسەڵات بكەن، ئەو دەسەڵاتانەی كە پەنا بۆ هەموشتێكی نایاسایی و نادەستوری دەبەن لە پێناو مانەوەی خۆیاندا، جا لە بەرامبەردا بۆ ئەوەی هەر شۆڕشێكی نوێ‌ هەڵەكانی شۆڕشەكانی پێشوو دووبارە نەكاتەوە، ئەوا دەبێت بەرنامەی كاری تۆكمە و بەهێز و كارا بۆ (بدیل) ی ئەو دەسەڵاتەی كەوەلا دەنرێت ئامادەبكرێت، بە پێچەوانەوە گەر ئەو (بدیل)ەی كە باسمانكرد ساز و ئامادە نەبێت ئەوا شۆڕشەكان بێجگە لە ماڵ وێرانی و بەهەدەردانی سامانی وڵات و ڕژانی خوێنی بە ناحەق و هەروەها دەبێتە هۆی كوشتنی ڕۆحی بەرگری و بەرەنگار بونەوەش لە نێو هاونیشتمانیاندا، بۆ هەڵگیرساندنی شۆڕشێكی نوێ‌ پێویستی بەچەند دەیەیەك دەبێت تا جارێكیتر ڕۆحی بەرەنگار بونەوە لە نێو هاونیشتمانیاندا دروست دەبێتەوە.

گەر ڕاپەڕین و شۆڕشەكانی سەد ساڵی ڕابردوی وڵاتانی ڕۆژهەڵاتی ناوەڕاست بە نمونە وەربگرین، لە بەر ئەو هۆكارەی سەرەوە، ئەویش نەبونی( بەدیل) ێكی گونجاو بۆ پاش ڕوخانی ڕژێمەكان ئەوا هەمو ڕاپەڕین و شۆڕشەكان بونەتە بارگرانی و ماڵ وێرانی زیاتر بە سەر هاونیشتمانیانەوە، ئەمەش ئەو ڕاستیەمان پێدەڵێت هەمو ئەوانەی كە لە ڕێگەی نادەستوری یان هەڵبژاردنی ساختەوە و دەستی دەرەكیەوە دەسەڵات دەگرنەدەست لەوانەی پێش خۆیان پاشتریان پێشكەش نەكردووە.
هەروەها ئەو حەماسەت و توڕە بونەی كە شۆڕش و ڕاپەڕینەكان دروستی دەكەن پاش سەركەوتنی شۆڕشەكان ئەو بێ بەرنامە و بشێویەی دێتە ئاراوە هەمو جوانیەكان دەشێوێنێت، پاشان گەر شۆڕش بو ئەوا لەلاین كەمینەیەكەوە دەدزرێت، گەر ڕاپەڕینیش بو ئەوا دیسان كەمینەیەك سواری شەپۆلی توڕەیی خەڵكی دەبن خۆیان دەكەنە خاوەنی، بە تایبەت لە نێو گەلانی ناهۆشیاردا.
كەواتە گرنگتر لە شۆڕش و ڕاپەڕینەكان بونی(بەدیل) ێكی یاسایی و دەستوری و گونجاو و كارایە، نەك شەرعیەتی شۆڕشگێڕی، بۆ ئەوەی ڕوی ڕژێمەكانی پێشو سپی نەبێتەوە و پەشیمان بونەوە لە شۆڕش و ڕاپەڕینەكان نەبێتە خواستی زۆرینە.