یانەی ئاسۆ كۆنترۆڵی پاڵەوانیەتی پایسكلسواری عێراق كرد

10/08/2019 - 10:23 بڵاوکراوەتەوە لە وەرزش/كوردستانی

 

ئاری عەبدوڵڵا

پێشبڕكێكانی قۆناغی كۆتایی پاڵەوانیەتی پایسكلسواری عێراق بۆ ئاستەكانی پێشكەوتووان، لاوان، تازەپێگەیشتوان و كچان لە شاری دیوانییە بەڕێوەچوو، هاوشێوەی ئاستی پێشكەوتووان كە یانەی كۆیە پلەی دووەمی تۆماركرد، كوڕانی یانەی وەرزشی ئاسۆ توانییان لە ئاستی تازەپێگەیشتووان پلەی یەكەم تۆماربكەن و لە ئاستی كچانیش وەك هەمیشە كچە پایسكلسوارەكانی یانەی نەورۆز پلەی یەكەمیان كۆنتڕۆڵ كرد.

لەسەر ئاستی پێشبڕكێكانی كچان یانەی نەورۆز لە پێشبڕكێ تیمییەكان پلەی یەكەمی مسۆگەركرد هاوكات لە ئاستی تاكی گشتی كچە پایسكلسواری ناوداری ئەم یانەیە، (سۆزی دلشاد) پلەی یەكەمی پێشبڕكێكانی بردەوە.

لەسەر ئاستی تیمی كە ماوەی ٣٠ كیلۆمەتر بوو كچانی پایسكلسواری نەورۆز ماوەكەیان بە ٣ كاتژمێر و ٢٧ خولەك و ٥٥ چركە بڕی و پلەی یەكەمیان كۆنتڕۆڵ كرد.

هەرچی پلەی دووەمە بووە بەشی یانەی سەناعە بە تەواوكردنی ماوەی پێشبڕكێكە بە ٣ كاتژمێر و ٣٥ خولەك و ٣ چركە.

كچانی یانەی برایەتی پلەی سێیەمی پاڵەوانیەتیەكەیان بەدەستهێنا كاتێك ماوەی پێشبڕكێكەیان بە ٤ كاتژمێر و ٣٤ خولەك بەكۆتاهێنا.

لەسەر ئاستی تاكی گشتیش، (سۆزی دلشاد) پلەی یەكەمی بەدەستهێنا كە ماوەی ٣ كیلۆمەتر بە ١ كاتژمێر و ٧ خولەك و ٣٠ چركە بڕی.

هەریەك لە كچە پایسكلسوارەكانی یانەی نەورۆز، (موژدە رەفیق، كانیاو حسێن، لاڤان ئەحمەد) پلەی چوارەم تا شەشەمیان بەدەستهێنا.

لە پێشبڕكێكانی ئاستی تازەپێگەیشتووانی كوڕان كە ماوەكەی ١٥ كیلۆمەتر بوو، كوڕانی یانەی ئاسۆ رووێكی گەشی ئەم پاڵەوانیەتیە بوون كاتێك ركابەری بردنەوەی پلەی یەكەمیان بەرامبەر یانەیەكی بەهێزی هاوشێوەی (ئەولاد راجی) كرد و پایسكلسواری ئەم یانەیە (عەباس فەرحان ) توانی پلەی یەكەمی پێشبڕكێكانی تاكی گشتی تۆماربكات كاتێك ماوەی پێشبڕكێكەی بە ٢٥ خولەك بڕی.

هەریەك لە (وەهبی سلێمان و دلشاد فەرحان) لە یانەی ئاسۆ، پلەی پێنجەم و شەشەمیان تۆماركرد.

هاوكات لە پێشبڕكێكانی ئاستی لاوانی كوڕان، یانەی دهۆك بە بەراورد بە پێشبڕكێكانی پێشوو، پاشەكشەیەكی بەرچاوی كرد و لە پاڵەوانیەتی ئەمجارە پلەی سێیەمی بەركەوت. 

لە رۆژانی ٦ تا ٩ ـی ئەم مانگە لە شاری دیوانییە پێشبڕكێكانی قۆناغی سێیەم و كۆتایی پاڵەوانیەتی پایسكلسواری یانەكانی عێراق بۆ ئاستی پێشكەوتووان بەڕێوەچوو، لەسەر ئاستی پێشكەوتووانیش، پایسكلسوارانی یانەی كۆیە پلەی دووەمی پاڵەوانیەتیەكەیان بردەوە و پایسكلسوارانی هەولێر بوونە خاوەنی پلەی سێیەم و سەناعە بە پلەی یەكەم هات.

بەڕێوەچوونی پێشبڕكێكانی قۆناغی كۆتایی پایسكلسواری عێراق لەسەر رێگەی خێرای نێوان بەغداد-دیوانییە ئەنجامدرا و لە هەر سێ رۆژی كێبڕكێكان، كاتژمێر ٧ ـی بەیانی دەستی پێكرد.

بەهۆی ئەوەی یەكێتی پایسكلسواری عێراق ئامادەنەبوو پاڵەوانیەتیەكە بهێنێتە شاری سلێمانی، چەند یانەیەكی كوردی بایكۆتی بەشداریكردنییان كرد لەم پاڵەوانیەتیە و ئامادەنەبوون بچنە شاری دیوانییە.