كاتی دەسپێكی خولی نایابی كوردستان دیاریكرا

18/08/2019 - 09:31 بڵاوکراوەتەوە لە وەرزش/كوردستانی

 

ئاری عەبدوڵڵا

دوێنێ شەممە رێككەوتی ١٧ ـی ئاب لە بارەگەی خۆی لە شاری هەولێر، كاتژمێر ١٢ ـی نیوەڕۆ یەكێتی تۆپی پێی كوردستان بە ئامادەبوونی سەرۆك و جێگرەكەی و سەرجەم ئەندامانی، كۆبوونەوەی ئاسایی هەفتانەی خۆی ئەنجامدا و گرنگترین تەوەری كۆبوونەوەكەش دیاریكردنی وادەی دەسپێكی خولی نایابی كوردستان بوو.

 

دوای ئەوەی كۆبوونەوەكە نزیكەی دوو كاتژمێری خایاند یەكێتییەكە گەیشتە ئەم بڕیارەی كە خولی نایابی كوردستان دوای دوو مانگی تر و بە دیاریكراوی لە رێككەوتی ١٧-١٠-٢٠١٩ دەسپێدەكات.

لەم بارەیەوە (دلشاد ساڵح) وتەبێژی یەكێتی تۆپی پێی كوردستان رایگەیاند: "مەبەستمان لە دیاریكردنی وادەی دەسپێكی خولی نایابی كوردستان لەم كاتە زووەوە بۆ ئەوە دەگەرێتەوە كە لە ساڵانی رابردوو لەلایەن یانەكانەوە گلەیی ئەوەمان لێ دەكرا كە بە درەنگەوە كاتی دەسپێكی خولەكانمان رادەگەیاند و بەهۆیەوە یانەكان ئامادەكارییەكانیان وەك پێویست نەبوو ئەم حاڵەتەشیان دەخستە ئەستۆی یەكێتییەكەمان، بۆیە بە باشمان زانی ئەم بیانووەی سەرجەم یانەكان نەهێڵین و دوو مانگ بەر لە دەسپێكی خولەكە، وادەی دەسپێكمان راگەیاند بۆ ئەوەی هەر لە ئێستاوە تیپە بەشداربووەكان دەست بە ئامادەكارییەكان بكەن و یاریزانان بگوازنەوە ریزەكانیان".

دلشاد ساڵح وتیشی: "لە نزیكترین كاتدا وادەی دەسپێكی خولی پلەیەكی كوردستان و سەرجەم خولەكانی دیكە رادەگەیەنین چونكە ئێمە دڵنیاین لەوەی ئەم خولانە پێویستە لە كاتی دیاریكراو ئەنجامبدرێن و هیچ بەربەستێك لە پێشمان نییە بۆ ئەوەی ئەم بابەتە بە ئەگەر بهێڵینەوە".

خولی نایابی كوردستان بە بەشداری ١٤ یانە بەڕێوەدەچێت و دوای دابەزینی هەردوو یانەی ئاكرێ و گازی باكوور بۆ ریزی یانە پلە یەكەكان، خولی نایاب دوو میوانی تازەی بۆ هاتووە ئەوانیش یانەكانی سیروانی نوێ و سۆران ـن.

دەربارەی دیاریكردنی پاڵەوانی ئەم وەرزەی خولی فوتساڵی كچانی كوردستان ، ڕۆژی پێنج شەممە ٢٢/٨ یاری كۆتایی فوتساڵی كچان لە نێوان سیروانی نوێ و چۆمان لە شاری كۆیە بەبێ ئامادەبوونی ھاندەر تەواو دەكرێت

دوو تایمی ٥ خولەك كاتی زیادكراو دەدرێت، دواتر لێدانی سزا و پاڵەوان ئاشكرا دەبێت.