ئەمڕۆ هێزەكانی سوپای داگیركەری ئیسرائیل بۆردومانی چەندین ناوچەی كەرتی غەززەیان كردووەو بەهۆیەوە دەیان كەس شەهیدو بریندار بوونە.
بەپێی زانیارییەكانی كەناڵی جەزیرە، ئەمڕۆ سوپای داگیركەر بۆردومانی قوتابخانەی (دار الارقم) ی كردووە لە گەڕەكی (توفاح) ی خۆرهەڵاتی كەرتی غەززە كە پەنابەران و ئاوارەكانی تێدایەو بەهۆیەوە (30) كەس شەهید بوون، كە زۆرینەیان ئافرەت و منداڵن، شەش كەسیش بێ سەرو شوێنن و دەیان كەسیش برینداربوونە.
وەك پیشەی هەمیشەییان، سوپای داگیركەری ئیسرائیلی پاساویان بۆ بۆردومان كردنی ئەو قوتابخانەیە ئەوە بووە كە گوایە چەكدارەكانی حەماس لەوێوە هێرشیان ئەنجامداوە.
ئەمەو هەر تەنها ئەمڕۆ لە كەرتی غەززە (112) كەس شەهیدو دەیان كەسیشی تریش برینداربوونەو چەندین كەسیش بێ سەرو شوێنن.
